殟塞（窝塞）

唐位位

昨日看了天气预报，讲今朝勿落雨，早浪起来我也没开窗轧苗头，就穿了新裙子新鞋子出门了。结果，落雨啊，回转去换也来勿及。短命差头来得难拦，总算来了一部，又溅了我一裙子个龌龊水，新鞋子也进水了，乃么搿身行头算出送了。侬讲殟塞伐？

隔壁人家小姑娘，跑到剃头店，搭艺术总监讲：“我要改变形象。”艺术总监亲自动手，又烫又染又剪。几个钟头过去，原来文气清秀个长头发小姑娘，变成又武腔又老气又凶相个乱发中年阿姨，剪下来个头发又装勿回去，钞票么勿好勿付，明早哪能有面孔去上班？侬讲殟塞伐？

三楼爷叔做纸黄金，看见金价一路飙升，算算十万块赚好了，家主婆要伊抛脱捞现钞，伊讲等一歇还会涨，让我上只马桶再抛，作兴多赚两钿。啥人晓得，一泡屙个工夫，十万块揩脱勿算，还倒赔进去勿少。侬讲殟塞伐？

辛辛苦苦写好个文章，自家看看蛮得意，发出来一看，人家根本呒没兴趣，想想殟塞啊；学生子考试，题目简单，一口气做好，自以为好吃100分了，结果小数点看错脱，100分吃勿着覅去讲伊了，连平常考勿过自家个同学也吃100分，想想殟塞啊……

朋友，侬有啥殟塞个事体伐？

上海闲话小词典：

“殟塞”，作为上海闲话常用词，通常写作“窝塞”。梅玺阁主《上海闲话》里向讲：“这个词或许还真是这么写的，表达一种‘窝在心里、塞在胸中’的委屈感……‘窝塞天’是一种让人伤怀的天气，闷热、潮湿……”阁主个用字及诠释既有形象感，又有“看勿见摸勿着但一想就想通”个感觉。

现在回到正字“殟塞”。《吴下方言考》云：“物之不得出气而微烂者亦曰殟（乌骨切）”；吴语学堂对“殟塞”个解释为：“心里郁闷，难以言表；天气湿闷”。

上海闲话考考侬：

    请写出一到两个“殟塞（窝塞）”个近义词。