玩車除咗講求實用，身份象徵更加重要！像意大利名牌 Tonino Lamborghini，日前就發表以自家名字推出嘅第一款手機—— Spyder系列。用料上乘、嚴格嘅裝嵌程序已不在話下，佢更一口氣連推六隻型號

3D Logo　正中央

呢六隻型號，包括一款銀鋼、兩款黑鋼、玫瑰金、黃金以及黑金，每一部拎上手都極具份量。刻有 林寶堅尼生招牌，已成例行公事， Spyder採用上闊下窄設計，底部呈尖形，模仿跑車車身，無論前或後，都印有「 Tonino Lamborghini」嘅名字，但數到最型，就要留意 Keypad中間及背脊鏡頭嗰隻 3D狂牛，用不銹鋼切割而成，手感一流，着機嗰陣更會透光；據講，選用材質以及裝嵌過程，全部都經過鐘錶王國——瑞士專人操刀，連機背也紋上「 Assembled in Switzerland」，就知道唔講得笑。

超豪禮盒跟藍芽

Spyder對手工用料要求也高，除咗機殼部份，屏幕也經加硬玻璃以及藍寶石鏡層面組裝，硬淨之餘，仲唔易刮花壓爆；稍嫌 2"闊屏幕有點不夠用，加上機內不設林寶堅尼賽車 Video以及經典照片，作為 Fans感到有啲可惜。
或 許包裝上可彌補功能方面嘅不足。 Spyder以一個巨型「珠寶箱」作手機盒，連揭蓋嗰陣都以油壓方式打開，型爆！跟機配套好齊，除咗印上 Logo嘅入耳式立體聲 Handsfree，另配一個掛耳式藍芽耳筒，啱晒揸車人士；但要留意， Spyder不設限量發售，盒內亦都無出世紙編號，不過若只為興趣而收藏，又有乜所謂！

特別版　廿萬鑽石狂牛

除咗六款唔同質感鋼材，想玩得再癲狂， Spyder仲有一款鑲滿碎鑽嘅特別版。無論係機身四條邊，抑或係 Keypad周圍地方，均清一色由幾百粒碎鑽組合而成！據講售價高達廿幾萬，只可惜僅限於今次展出，本港並無發售；但講番轉頭，矜貴成咁，擺入保險箱仲好啦！

Focus Point