小明 and NADIA

明: 小明 NA: NADIA

 

客廳。

小明獨自坐著, 沒有做任何事情, 就像第 1 幕和第 3 幕的開始。

NADIA 從門口走進客廳, 她拿著一個行李箱和一個旅行袋。

 

NA: HI! 返黎喇!

(她放下行李及袋子, 吻了小明的臉頰一下)

明: 做成點啊?

NA: 哈哈! 最後一場真係精彩啊! 阿風搵把刀拮我嗰陣, 把刀  “click”住左喺我件衫度啊! 有個觀眾睇睇 下, 暈左!

明: 我以為你琴晚返黎 TIM!

(NADIA 在旅行袋中拿了一袋小禮物送給小明)

NA: 琴晚? 點啊! 你個劇本寫成點?

明: 你唔係琴晚返黎咩?

NA: 咩事啊?

明: 冇嘢啊! 我就係想知咩事咋 MA!

NA: 冇事啊! 食左飯未?

明: 未! 咁你係今朝早返黎架?

NA: 係啊! 我事是整啲嘢食啦好嗎?

(她進入廚房然後立刻返回客廰)

NA: 嘩! 咁亂嘅! 四姐佢冇黎過咩?

明: 我打過電話去酒店啊!

NA: 幾時啊!

明: 琴晚, 佢地話你退左房

NA: 係咩?

(NADIA 把她的行李箱拖回房間, 然後返回客廰)

 

NA: 做咩嘢事? 點解咁樣架? 我地比人入屋打劫啊? 定係你搞成咁架?

明: 你究竟去左邊啊?

NA: 我係琴晚返黎嘅, 我唔知點解我話今朝返, 可能因為咁講我唔需要解釋咁多嘢, 我冇返去酒店係因 為我叫左一架車, 叫佢由劇院直接車我返黎

明: 廣州落黎係三個鐘?

NA: 你要唔要打比個伙記問下?

明: 咁你係深圳通宵 shopping 啊? 你同邊個一起啊? NA: 唔好問啦, 好嗎? 你唔係咁樣架!

明: 我, 係咁樣架!

NA: 我唔想你咁樣啊! 我覺得好侮辱啊!

明: 對唔住, 我唔係想侮辱你

NA: 唔係侮辱我啊! 係侮辱緊你自己啊! (停頓) 我同一個同事, okay,  我地一起坐車落黎嘅, 佢話有人會 黎接佢, 但係嗰個人冇黎到, 咁我地咪喺附近搵左間餐廳傾計, 傾完, 我就返黎, 咁多年黎你從來都冇問 過我一句架! 我冇諗過忽然間我要交代我去左邊囉!

明: 你同個同事半夜落黎黎傾計傾到而家?

NA: 係啊!

明: 同一個演員?

NA: 係啊! 我走得啦?

明: 咁你咪冇訓過? (停頓) 定係有啊?

NA: 有咩啊? 你想問我乜嘢啊? 你想問我會唔會講大話啊? 明: 你會唔會啊?

NA: 或者會架!

明: 咁你有冇?

NA: 冇啊! Okay? 我而家要入房執返啲垃圾啊!

明: 你想唔想知我想搵啲乜嘢啊?

NA: 我唔想知, 咁你搵唔搵到?

明: 搵唔到, 係咪阿風?

NA: 點解係啊風呢?

明: 我知道係佢, 呢個名成日都會彈出黎, 唔係有咩特別嘅原因, 真係好似一陣風一樣, 阿風, 阿風, 阿 風… 傾下啦好嗎? 唔好意思, 間房搞成咁

 

NA: 啲嘢亂左, 你係應該執返, 我可以當咩事都冇發生過

明: 發生左點可以當冇事呢? 傾下啦好嗎? 我係你老友黎架 MA, 我知道架, 開始嘅時候, 我地兩個就好似呢個世界唯一可以合得埋嘅拼圖咁, 根住就唔再係架喇, 真係好奇怪… 呢個世界從來都唔會為我地停低, 從來都唔會, 我都唔係想搵第二個人, 但係佢就偏偏出現, 佢唔係最靚, 佢甚至係可能有另一半,但係你知道, 如果有下一世, 嗰個就係佢, 係小小嘅暗示架咋 MA, 根住佢有少少嘅反應, 好似一塊窗簾拉埋左少少, 唔代表啲咩架, 仲未有耐去到嗰個地步, 但係你會見到有少少嘅可能性, 咁你睇到你禮貌上就會回應一下, 於是你又會行一步, 都仲係好安全, 輕輕一個 kiss, 但係忽然之間好似就要承諾好多嘢喇, 佢係我情人喇, 如果唔係, 下一次見面咪會好尷尬囉, 於是, 你就會再行多一步, (停頓), 係阿風, 係咪?

NA: (輕聲地) 係

(停頓)

明: 我愛你

NA: 我都係, 如果唔係我唔會係呢度

明: 話比我聽

NA: 我愛你啊

明: 唔係啊…

NA: 係啊, 比著我我淨係需要知咁多

明: 你需要知得多啲

NA: 唔需要

明: 我需要知, 我係可以接受你同阿風有嘢, 我接受唔到我唔知道你地有冇嘢, 咁樣我會做唔到嘢 NA: 你唔好恐嚇我好嗎?

明: 比著係你都會問我

NA: 我從來都冇問過你

明: 因為你知道從來都冇嘢啊 MA

NA: 大把啊! 起碼頭一年, 你出去見所有四十歲以下稍為睇得上眼嘅女人全部都係 明: 但係你知道係冇嘢

NA: 我淨係知我唔 care, 呢度又冇嘢綁住你, 咁你又唔走, 我就假設你係想留喺度囉, 其他嘢我唔 care! 明: 但係我 care, 究竟係點?

NA: 我講左比你聽喇, 我同啊風一起傾計, 傾左好耐, 我一開始唔係咁樣講, 係因為我咁樣講聽落去我 真係好似去左偷食, 但係而家你淨係想知道我同阿風有冇上過床!

 

 

明: 係, 你有冇?

NA: 冇!

明: 你想唔想啊?

NA: (激動地) 馬小明!!

明: 你都可以問我

NA: 我會尊重你嘅私穩

明: 我冇私隱架, 我唔要架!

NA: 尊嚴你要唔要啊?

明: 你係成熟過我, 我係唔鐘意成熟架, 我係唔鐘意啲相敬如賓嘅關係, “相公有禮, 娘子有禮”, 我,係鐘意, (愈來愈激動) 眼淚, 鼻涕, 自殘自廢, 剝光晒佢啊! (停頓)

唔 care, 同唔愛, 有咩分別? 你有冇? 你有,  係咪?

NA: 你咁樣唔係叫做 care 啊! 如果我真係有第二個係因為我有咁嘅需要啊! 你要 care 嘅係我有呢種需 要啊! 你唔好以為咁樣我會內疚, 我唔會架, 因為呢啲嘢根本唔需要內疚!

明: 唔…你嘅需要…咁, 你成晚同風傾啲咩呢?

NA: 主要都係關於白家傑囉!

明: 唔…我都估到…

NA: 阿風都想做個戲

明: 你幾時再見佢?

NA: 佢黎緊就會即刻去排第二個戲, 我應承左去見佢, 我想去見佢 明: 咁, 我地幾時去啊? 姐係…我都去, 係冇問題架 MA?

NA: 梗係冇問題啦, 你最好唔好眨眼啊, ‘目及’實我啊小明!

明: 幾時啊?

NA: 星期六

明: 去邊?

NA: 廣州

明: 阿風同你坐車落黎, 然後, 又自己坐返車返上廣州? NA: 係

明: 而我就應該表現得好成熟…好有尊嚴……我諗我做唔到囉, 我除左嗰樣嘢我乜都諗唔到

NA: 你唔可以係咁樣架, 如果你除左愛我之外你乜嘢都冇, 你連你自己都冇左, 你真係再冇嘢值得我去愛啊! 入面間房, 啲嘢比你搞到咁亂, 你咁樣好差啊, 係你對你自己好差啊, 你以前唔係咁樣架, 我愛嗰個係你啊!

明: 星期六我諗我去唔到喇, 你一切順利

NA: 多謝  (NADIA 前往房間)

明: 咁…阿風話白家傑個戲點啊?

NA: 佢話佢唔識寫嘢

(NADIA 返回房間, 小明拿起 NADIA 送給他的禮物袋, 把禮物拿了出來, 是一件恤衫, 他很快便放下, 無語)

(燈暗, 響起火車的聲音)