以下係黃子華《娛樂圈血肉史II》11月8日香港場特別版endding，係觀眾偷拍嘅冇字幕。子華話呢段話喺其它場冇講過，我睇完之後好大感觸，就將段片內容譯成文字作為保存。由於我啲普通話水準真係好普通，只能直譯成粵語文字，本人文筆一般，不太懂粵語的華迷，請多多包涵。

咁反而呢，我而家講嘅嘢呢,我係冇一場講過咖。咁永遠嘗試新嘢係未必一件好事呢咖。講真，我一直度呢個show，呢個show對我嚟講係好困難。我度呢個show呢，我不停掛住一個年青人，一個茄哩啡。呢個茄哩啡咧？嗱~唔係人人都叫茄哩啡，除非你自己做過茄哩啡，唔好就走出街指出人哋“茄哩啡“”，我哋做過可以咁講。

喺一年，我喺中國嘅地方叫做橫店拍戲，拍嗰套戲扮演一個角色叫做宋世傑。咁呢喺休息嘅時候，走嚟一個年青人，即係茄哩啡，佢做兵。走埋嚟問我，其實佢唔係好識我佢係內地人，佢唔識我，但係見呢條友以應該係主角啦問下佢啦，“阿主角先生，我喺橫店已經做咗兩年兵了。”你知啦橫店好荒蕪嚇，除咗拍戲基上乜都冇。“我已經做咗兩年兵，我真係好想做明星做戲，你覺得應唔應該堅持落去？”

我當時見到佢嗰樣都幾似我咖。我好想即刻同佢講“你不如考保安吖？”你起碼有兩年兵嘅經驗吖嘛，係咪？因為保安又唔係真正嘅兵吖嘛，咁你而家都係扮兵啫。嘩！真係天衣無縫啦，係咪先？咁係睇真啲，佢雙眼真係有一pair“煙”咁咯波。咁我又唔敢膽咁同佢講。于是我咁同佢講：“咁啦，你繼續試啦。試到真係覺得試唔到，咪試嚇第樣啰。”

我覺得真係，人生夢想呢樣嘢幾似追女仔。啫有啲人追女仔係咁嘅“我溝你，你受唔受溝吖？”。嗰女仔話：“我都唔鐘意你。”“OK,shit!”有啲唔係，有啲係死緾爛打到係要嗰女仔講：“你吃屎啦你！”（失望嘅回應）“唔呃……”有啲女仔要同佢講“你吃屎啦!”（嘻皮笑臉嘅回應）“哈嚇，boshit……”“你一陣吃屎吃埋狗嗰啲。”“OK.”咁呢啲人有可能終於得到個女仔嘅芳心，連埋佢只狗消化咗嘅狗糧都唔定。我覺得無所謂咖，每個人嘅耐力去度邊？人人唔同，有啲好堅持，有啲好快放棄都無所謂。你最梗要記住，呢個世界唔係一個女仔嘅，呢個唔得係有第二個，揾到個得為止。

二十年前，我有個朋友本來做呢個時裝設計師，喺二十年前好少人做呢樣嘢。咁佢就，因為家境嘅關系呢逼佢做護士。佢原本每日就係想去搞嚇啲紅黃藍白黑，點知每日面對屎尿血膿痰。咁佢頂唔順，佢結束咗自己嘅生命。

我二十年前，大家睇到嗰《娛樂圈血肉史》，就係我夢想破滅嘅時候。我就係嗰種，破滅咗死都唔肯走再試嚇。咪住，你吃屎，我吃一陣啦。吃嚇吃嚇，又唔知點解嚟到日呢個地步。當然我一啲都覺得自己有咩咁大不了，只係覺得喺呢廿年裏面，都算係……嗰首歌，羅文嗰首叫咩吖？我而家已經開始隨口噏咖，《幾許風雨》開頭第一段只係咩吖？都係幾多風波又經過……幾樣衰我都經過呢廿年，但係同時又靚仔過。唔係講嗰啲靚仔吖，即係咁如果你，一嗰女仔唔接受你，你就當冇曬，咁結束咗實在太可惜啦，咁我唔知咁嘅完結算係咩嘢？

但係總之我覺得非常幸運了，因為我估唔到吖嘛。當日，我好想做一個演員，但係如果今日你要用一個演員嘅身份同我交換企係呢一度，就算你俾最好一部戲我，即係甄子丹代我做動作替身，梁朝偉替我文戲替身，我唔知做咩啦當然係。總之無論嗰套戲幾好，人類睇完好感動，動物睇完好沖動，我都唔會將呢個位置同你交換。

所以我哋冇人知嘅，呢樣唔得，試嚇第二樣。多謝！

個人感言:

好多人小時候講過我第日大個想做乜乜，憧憬住美好嘅童年夢想。但係，經過十幾年寒窗苦讀之后，畢業出嚟社會工作，面對呢個殘酷現實嘅社會，往往做唔到自己想做嘅理想工作。有人為咗兩餐溫飽放棄自己嘅夢想，被逼做自己唔想做嘅工作，過住庸庸碌碌嘅生活。亦有人死唔認輸，依然為自己嘅夢想打拼，到最后終於得到成功。呢個亦都係黃子華所講嘅“有囉”定“冇囉”。

咁鄙人就係眾多“冇囉”族中其中一個。我做打工仔做咗十幾年，我工作嘅上班時間係日夜輪班。返工時候等放工，呢啲枯燥乏味生活有時我感到疲憊。有時候我會停底問自己究竟係為乜？究竟我想需要乜嘢？我要尋找我嘅夢想喺邊度？黃子華話50歲，依然充滿喺迷惑。我三十幾歲，對人生前景依然充滿迷惘。夢想，to 堅持 or not to 堅持？