甘：啊，Mitch啊Mitch，我當年一返到去大學嗰陣時呢，即刻寫咗封信俾你，你硬係冇回信，我係好嬲你咖。衹不過呢，我一路都保存你寫嗰啲專欄嗰啲紙報。

 

黃：係咩？喺邊吖？

 

甘：喺你送俾我嗰公事包嗰度囉。

 

黃：Morrie，我冇收過你封信，我發誓。我已經有一排冇拆過大學寄嚟嘅信。佢哋寄嚟嘅所有嘢，我跟手掉入簍紙蘿。

 

甘：（哼哼~）你話吖，係咪好彩我病吖？如果唔係，我哋兩個點好似而家咁吖？以前啲嘢都冇計了。

 

黃：Sorry吖，教練。

 

甘：你唔好講Sorry。

 

黃：唔係吖，你……你唔可以咁容易就原諒我。

 

甘：你睇唔睇到嗰邊嗰雕刻吖？係我呢咖。我有個朋友喺三十幾年前呢，整俾我，佢叫Norman。佢咧，就搞咗成幾個星期嘅。不過呢，我覺佢又捕捉到我嗰啲成日諗埋第啲嘢嘅本性。佢又同佢太太搬咗去波士頓。咁之後，我又到我太太病咗。佢又從來冇話嚟問候一聲，電話都冇個嘅啵。我好嬲，於時我同佢絕交。咁多年嚟咧，佢話就話想同我言歸於好，佢就話：“Morrie，我就好抱歉了。”但我自尊心太過強，我就話：“唔使講啲咁嘅嘢，冇咗就算了。”不過終於都冇完到，出現咗條裂痕嗰度弊咧，但我冇好好地咁處理，於是條裂痕越嚟越深，我哋兩個人嗰啲友誼，就咁就冇咗囉。

 

黃：咁……Noman卒知點呢？

 

甘：唔……佢……佢……佢死咗……佢舊年，佢都有cancer,咁我一路冇機會同佢好返。唉！我為咩事會為一單咁小嘅爭執就分開咗我哋兩個咁多年呢？唉！Mitch，假如有邊個人係關懷嘅，你又同佢嗌緊交嘅呢，我唔該你，你放過佢，你要放過佢……即使你百分之百啱嘅，佢又百分之百錯呢，你都要認錯。你原諒所以人、所有事。然之後就到你原諒你自己了。因為一直以來，你鞭策自己，我唔夠有錢，我唔夠靚仔，我唔夠醒目。其實你咪係度折磨緊你自己囉？但係，你去到我咁嘅田地嘅時候，你實會好似我咁，你就會後悔，唔對待自己好一啲。你原諒所有人啦，你唔好等吖。

 

黃：Morrie，你可唔可以原諒我吖？

 

甘：原諒你咩吖？原諒你冇回信俾我吖！

 

黃：因為我，我已經唔記咗“你”。我係唔記咗生命之中咩嘢係最重要，因為我一事無成為。我舅父病嗰陣，我當時好後生好蠢；而家我同你一齊，我就好老好蠢。你知道我喺度做緊咩，我係試圖補償返，我每星期嚟一日，咁另外六日呢我都唔知自己做緊乜。你明唔明點解我成日唔想同Irene嚟。

 

甘：你……你收埋佢俾自己嘆囉。

 

黃：我係收埋“你”，俾“我”自己嘆。喺呢一度，同埋你一齊，我就可以揾返啲啲，當日我覺得“驕傲嘅自己”，我唔想而家我呢一個“自己”摧毀咗我當日嗰個有啲啲“驕傲嘅自己”，我唔想俾你睇到我咁樣嘅樣。

 

甘：睇到你乜嘢吖？

 

黃：我變成咁樣。

 

甘：咁我估我頭先講原諒自己嘅說話，真係入到你心，入到你肺啦，嚇？

 

黃：點解你俾我返嚟度呢？咁多人想見你，我有咩特別啫？我都已經唔記得“你”添了，點解你俾我嚟？

 

甘：同我16年前，我收你嗰班嗰個原因一樣，我覺得你係同其他人完全唔同。你有啲光芒，你有吖，你自己唔知道咖喳。

 

黃：咁你點知吖？

 

甘：因為我後生嗰陣，有人咁樣形容過第二個人囉。

 

黃：形容邊個吖？

 

甘：咁咪係我囉！嗱，我要你幫我做最後一件事。我揀咗塊地，你就將我埋葬喺嗰度，離呢度冇幾遠嘅嗻，嗰度有個山仔，棵樹下麵呢，就睇曬成個池塘，好靜吖！喺嗰度沉思就最好。

 

黃：你打算喺度沉思吖？

 

甘：我打算死喺嗰度。總而言之，你幫我做呢件事啦。我去咗之後，我希望你去我嘅墳探我，但就唔學似第啲人咁嚟拜嚇丟低幾枝花咁就上返車。我諗，你有時間先嚟啦，嚟嘅嗰陣帶張墊，帶啲午餐嚟咁啦。

 

黃：午餐？

 

甘：你次次嚟都帶啲嘢俾我吃咖。

 

黃：你從來都唔吃嘅。

 

甘：到嗰陣時我咪一樣吃唔到。你坐底，喺嗰度同我傾計，講你嗰啲濕滯嘢（指不開心事）過我知，講我知呢個世界發生啲乜嘢野？揀星期二啦，你一向都係揀星期二嚟咖。

 

黃：咪住先。你想我嚟墳場，喺你嘅墳前度野餐，同埋對住啲空氣講嘢……

 

甘：咪好似我哋而家傾計咁囉？

 

黃：點會啫，點會可以而家咁啫？到時你唔會應我吖嘛。

 

甘：咁吖，Mitch。我應承過你，我哋約定吖。我死後呢，凈係有你講，我凈係得個聽字吖。

 

黃：我，我唔想呢個星期二停，我唔想失去咗你。

 

甘：你唔會喺呢度嘅時候，你從來冇聽過我把聲咩？喺你腦海中，或者搭緊飛機嗰陣，都係咁咖。

 

黃：有，有。

 

甘：咁咪係囉。咁你咪冇失去咗我囉。我繼續喺度咖，喺你嘅腦度，喺你嘅心嗰度……你過嚟，你擺只手俾我,呢度，呢度.Mitch，我而家講俾你知，假如我可以有多個仔呢，我都想嗰個係你。

 

黃：多謝，教練。

 

甘：我係好想做你教練。

 

黃：我唔識點樣講Bye-bye……

 

甘：我哋咪講Bye-bye囉，我好錫你咖。

 

黃：我都錫你吖，教練。我下星期二會再嚟。仲有，我預咗你到時呢，就精神返好多啦，唔該你，嚇！

 

甘：好，好……

 

黃：唔

 

甘：Mitch吖。

 

黃：係。

 

甘：我仲整唔喊你……

 

黃：兩日之後，Morrie就停止咗呼吸，佢太太將喪禮整到好細規模，係Morrie嘅意思。之後我就返咗去底特律（是美國密歇根州最大的城市）。嗰晚我返度屋企，走落去地牢，聽返一啲我同Morrie錄嘅錄音帶，我成日聽到佢嗰一句“我講，我會聽”。我卒知明白，Morrie想教我乜嘢，係佢識而我唔識。假如你好似Morrie咁度過你嘅人生。係以其他人首要，你係不斷製造緊美好嘅回憶。你付出自己，咁到我哋死嘅嗰陣，我哋唔係真係去咗，我哋仍然生存喺每一個你曾經觸動過嘅人嘅心裏面。所以當佢哋去墳場掃墓，又或者一個人喺街上行嘅時候，又或者喺鋼琴度彈緊你教佢彈嗰首歌嘅時候，佢哋就會聽到，會記得，所有你俾過佢哋嘅嘢。下一次我去掃墓嗰陣，我帶咗返布同埋一啲食物，擺開份野餐。Morrie係講得啱，呢度係好靚一個角落，有樹，有草，有山坡。“你講，我會聽”我試嚇喺腦裏面就咁做囉。我講，我好開心咁發覺，我想像中嘅對話，真係好似有人聽緊咁。我望，我望嚇只手錶，睇到個表我就知點解了——今日，係星期二。