曹家渡 三官堂桥

 
老上海人都知道沪西的曹家渡，说到曹家渡大家就知道附近有个三官堂桥了，民国18年（1929年），在渡口东首建木结构曹家渡桥（亦称：三官堂桥）。

三官堂桥周边老闹猛。天还呒没亮，“浜北”田里个蔬菜就开始从桥上运过来，脚踏车、黄鱼车、老虎榻车，统统当作运输工具。靠近桥个两边，纺织厂交关多，南面有绢纺厂、毛纺厂，北面有国棉 25厂（旧名：“达丰纱厂”），工人三班倒，一到上下班辰光，桥浪向来来往往个人，像苏州河水一样，川流不息。

三官堂桥附近街面。 

三官堂桥风景，还表现辣桥个两边，桥南面有三官堂庙，三官堂庙勿大，香火倒蛮旺个，特别是初一、十五，善男信女，都来烧香磕头，阿拉小人从门口朝里张望，只看到烟雾中一只只屁股翘得老高。庙旁有条小弄堂，不过二米来宽，弹格路，可以通前路脱后路。为了勿让大车子来轧闹猛，还用几块长条形个界石，竖辣两头弄口，只容一个人或者推脚踏车侧身通过。弄堂里两家烟纸店，卖眼香烛锡箔之类，生意勿推扳，忙个辰光，老板脱老板娘两个人还照应勿过来辣海。桥北面显得宽敞多了，人也勿像南面密集。因为有蔬菜批发市场、水果行，特别是装货、卸货集中辰光，有常时人声嘈杂，车水马龙。

 口

口

上世纪80年代初，连得《太阳帝国》电影摄制组也看相搿个当外景地，拍得个起劲。。。

时光赛过流水，如今，简陋、陈旧个三官堂木桥呒没了踪影，一座横跨苏州河两岸个现代化大桥代之而起，南头接江苏路，北面连曹杨路，将长宁区脱普陀区一脉相通。

曹家渡旧图三幅。 

2014 - 07 - 10  于  西雅图