东莞农校 （现名东莞经济贸易学校）
      
       呢个系我读中专时候的事情，  
地点在广东东莞农业技术学校（现叫东莞经济贸易学校），我宿舍系个8人宿舍，晚上到佐10点几就会自动关电要人训觉。有个室友到佐晚上定时关灯后就特别中意讲鬼故，晚晚都讲，唔讲唔舒服。有一晚，鬼故王买佐支百事可乐翻来，关灯睡觉时将支可乐放响床下面（呢个重点，后面提到），又讲鬼故，不过呢晚好奇怪，个个人都话总觉得佢块面特别白，虽然宿舍无灯光但睇上去特别青，有D荧光咁。
      
      个鬼故王讲讲下，突然指住阳臺大叫“快睇出面！快睇下出面！”我地顺住佢指咖方向看去，无野啊。我地开始以為佢吓我地。但个鬼故王反应越来越激，甚至响到哭，佢对面床咖同学觉得有D唔妥，又惊俾宿管话我地吵，即刻爬过佢张床到压住佢，又问佢见到咩。鬼故王好惊甘喊起话：“快睇啊！有个无面咖红衫女人罗住我瓶百事可乐坐起阳臺上对住我笑啊！”，然后一直好激动，接近癫狂咁震，3个同学上去压都压唔住。我地留意下佢床底支可乐，确实唔见佐！

       不过我地个个望出阳臺都睇唔到有野啊！有个大胆咖同学冲出去阳臺关门，一样见唔到。但系鬼故王仲好激动望住个阳臺，我地就叫佢既然怕就唔好望啊！不过鬼故王又喊：“我唔想望啊！但个身体不自觉咁望过去啊！”。当时我见到个鬼故王块面真系好青，表情好恐怖，虽然环境好黑暗，不过唔知点解睇上去佢块面好似有层白雾咁笼罩住。特别明显。最后办法我地几个一齐用棉被套住佢，压住佢起床上，唔俾佢望。


        就系咁坚持10分鐘左右，终於慢慢稳定落来。不过鬼故王已经好虚弱，晕下晕下咁，呢个时候宿管都惊动过来了解情况。见到个同学咁虚，就叫我地班同学轮流背住鬼故王去学校后面间第三门诊部睇医生。医生话佢惊吓过度，问我地做咩来？不过医生点会信我地讲噶话，肯定话我地痴囵线啦，最后打瓶吊针就算咯。个鬼故王后来都好好多咯。（呢到鄙视其中一个同学惊到拉尿···好臭·） ，搞到近天光先返到宿舍。
      
          第2日，响宿舍，真系点都稳唔到鬼故王放响床下支百事可乐。问返佢昨晚具体情况，鬼故王冷静好多，话虽然见到只红衣女鬼系无面，罗住佢支可乐，但唔知点解会感觉到女鬼对住自己笑，而且自己噶身体不由控制咁望住佢，后来只女鬼翻身跳佐落去就唔见佐。 事发之后，鬼故王以后都唔敢讲鬼故，各位夜晚真系唔好讲鬼 ！
         
          事情到我写呢篇野已经有7，8年咯。中专毕业后就一直都无联系佢。不过好不幸，就无几耐前听其他同学讲，佢有晚去酒吧HIGH完野，交通事故去佐咯··· （所以话我系唔会罗过佐身噶同学乱开玩笑，乱作故仔）
         
          另听闻我地栋宿舍以前系女生住的宿舍，因為前几届有个女生响我地宿舍同一层楼最尾间房為情响冲凉房用水管吊颈自杀后，之后就换佐俾男生住。唔同系因为男生阳气重同胆大？（点解又系為情？唉··）。另同样系我地班，就系响传闻自杀得最尾一间宿舍噶同学话自己响宿舍都撞过邪。有晚半夜起身哦夜尿，突然厕所变得通红，有个黑色类似人头咖野一闪而过，吓得佢冲出厕所······。


           前排返学校睇来，依家栋宿舍仲响到，仲系俾学生住，就系楼下有一排小卖部果栋，至于系几楼同边2间宿舍就唔讲咯，费事吓春师妹师弟，

-----------------------------------------------------------好靓仔咖分割线--------------------------------------------------------------------

东莞二中（旧二中，运河边果间）

         件事发生响我旧同学身上，呢个女同学起二中某班，不过佢天生就有某种病，病发时身边如果无人照顾噶话就好容易出事，病发时神情同肢体都会系好恐怖，所以好多人都唔系好愿意接近佢，不过，佢身边有几个好好噶朋友，唔会介意佢有病，成日一齐玩，病发时会去照顾佢，感情好好（具体唔讲咩病，尊重死者）
      
         不过有一日，佢响屋企时，一个唔小心，碌佐落楼梯，因为屋企无人，就咁去佐咯。当时屋企人同佢朋友都好伤心，我都系事后好耐听旧同学讲起先知。（希望佢依家已经稳到个好家庭投佐胎，有个健康噶身体）

          就响佢过佐身后第7日，就系头7果日，佢其中一个好好噶朋友心情仲未平复，夜晚上厕所时，开佐厕所道门，行佐入去，关上门口后······突然成个厕所变成绿色，就系鬼片到见到果种！仲见到佢去世噶同学起佢头上面漂浮，转下转下呢样，虽然佢好惊，但佢无叫出来（系太惊惊到叫唔出定系感觉到安全感，唔会伤害佢？唔知，无问）。过佐一阵，去世噶同学就飞出佐厕所，厕所随即变返原型，所有一却都归于平静。

          呢件事系个女仔亲自讲出来俾其他同学听噶。个个都话头7好猛，好恐怖，不过，其实去世噶同学应该系想返来见最好噶朋友最后一面，多谢佢一直照顾自己吧（友情无敌哦）

          呢到有个思考噶问题，上面农校个同学见到灵体时厕所系变成红色，而呢个系变成绿色，莫非怨气唔同环境会改变颜色？定系因为其他原因？各位探讨下哩~

-----------------------------------------------------------好靓仔咖分割线--------------------------------------------------------------------

东莞旧一中 （理工对面间，现莞中初中部）
   
曾经我读过一中，呢到有好多回忆，果阵读书真系好高兴，同依家工作后简直无得比，好，入正题
         
        都系8，9年前啦，当时好轻玩笔仙啊，招魂啊之类D野，可能睇到呢到有D人对于笔仙点玩唔系好明，介绍下：
        1.至少需要2个人
        
        2. 事前响张纸上写上你想要问咖也，最普遍最简单都系“YES”，“NO”啦，如果想问会考到咩大学高中之类，就写上学校咖名字。
        3.2个人面对面1人申出1只手，1个左手1个右手，手指互相交叉夹住支笔响中间，然后放松，竖起张写好字噶白纸上面。
      
        4.两个人心里不断默念“恭请笔仙，恭请笔仙······”
        5.有时会快有时会慢，有时都会唔成功，如果身边有灵体就会吸引埋来噶啦，响2个人都无用力噶情况下，支笔会自动起纸上面打圈（呢个现象无法解析，系人潜在噶心理因数定真系灵力？），呢个时候就可以问笔仙问题，例如问：“笔仙你系咪来佐？",支笔会自动移动到“是”，好过瘾。
        
        6.过程千万唔可以突然中断，唔唔想玩时就讲“请笔仙离开”，而且要等支笔移动到“是”，先可以放开支笔，如果移动到“否”，你仲要中断，据说后果好严重。

        （呢到讲下，我查阅过相关资料，笔仙原理其实唔系真系请神仙上来，而系靠人咖念力与灵界接触，如果身边刚好有游魂野鬼经过，而且想同人接触，就会通过支笔同人交禁。灵体噶性格因生前性格而定，有得喜欢恶作剧，你问咩佢偏要唱反调，有D会真系帮人。而且灵体因灵力修行大小，通灵能力都唔同，意思即系预测能力强弱不同，不过经过我以前多次玩同睇人玩，预测准确性真系麻麻。）
        
        有晚晚修完，10点左右，几个女同学照常平时活动，玩笔仙，我都照常响隔离同班男同学“滚死草”，睇下隔离班D靓女咁。
     
        呢几个女同学平时经常放学玩笔仙，今晚都一样，不过佢地今晚特别难招笔仙上来，招佐有成10分钟先招到，一如既往问埋D打天打鸭噶无聊问题，好似几岁结婚啊，稳唔稳到有钱男朋友之类。玩得正高兴，特然有个女同学讲佐唔应该噶野，问“笔仙，你系点死噶？”，个个吓一跳，死咯~~，问完后支笔定左几秒，之后系咁响纸上面乱转，吓到班女WIWAWA咁叫。就马上话“对唔住对唔住，然后恭请笔仙离开” ，不过，无论点叫，支笔就系咁移动“否”  字上面系咁乱转圈唔肯离开，即时2个女仔尝试用力移到“是”字上面，放松后都会移动返“否”字到。
   
        
        班女仔吓到一直咁讲“对唔住对唔住”，又唔敢离开张纸中断游戏，否者后果可能更严重。我地几个男同学都走过去望佐几眼，见到成班女仔惊到成到喊，不过都成11点咯，我地又唔系好信呢D野，就走先咯（系咪好无风度？咯咯咯~，依家捻返的确系······），剩下咖几个女仔一直讲对唔住讲到11点几，支笔终于移动到“是”字上面，咁先平息，张纸已经画到烂晒咯。

        但事件并未结束，玩笔仙个女仔喊到都好累，返到去就训觉咯（佢系训碌架床噶上床，面对天花板）。训到半夜，朦朦胧胧之间，个女仔突然醒佐，但全身都郁唔到（传说中咖鬼压床？），而且正对面天花咖地方有只又似狐狸又似人形状噶物体好恶咁望住佢，起到漂下漂下咁，虽然佢好惊，但点都郁唔到，又叫唔出声，惊到直程哭出来，就咁唔敢挣开眼，一直起心到念“对唔住对唔住”······唔知过佐几耐，先郁得返，但佢边敢望只也走佐未，立即褃埋被头唔敢郁。又唔知过佐几耐先训着·····
  
       天光之后，佢宿舍噶同学就问佢寻晚做咩？唔单只听到佢不断咁自言自语，时大声时细声，仲响床上面时不时好大反应咁弹下弹下，叫佢又无反应·······，吓春D宿友。佢就将件事讲出来，虽然宿舍咖同学话见唔到有狐狸，不过呢件事后，我地班就无人敢玩笔仙咯······

       呢到呼吁大家唔好乱玩交禁，好危险，特别系碟仙，超邪~！记得有次睇新闻报道香港一班后生一半死于非命，认为同玩碟仙有关··，

-----------------------------------------------------------好靓仔咖分割线--------------------------------------------------------------------


东莞最旧间一中 （万寿路佐丹奴隔离果间，依家系一小其中一个校区）

     呢个故事真正系老传闻啦，97回归前已经有，算系旧旧一中一个届届相传咖话题吧（当然，搬佐理工对面后相信无咩人会讲咯，依家搬到5环路，更加无人会知）
      
      旧旧一中唔知边个去过？就系依家东莞第一小学咖其中一个校区，万寿路佐丹奴隔离果间。响最入面亦者系最后面果栋楼（楼下有排树，篮球场后面，曾经1楼系饭堂），以前系个混合楼，1-4楼系课室，5-7楼系宿舍（最高系6楼高定7楼？唔系好记得，得闲返去睇下），依家变成小学课室咯，响97届之前都系高中男生留宿住，无独立洗手间冲凉房，天冬时都系集体冲冻水凉，仲要无得遮，可以想象天冬时一群男生面对面‘打比栋’冲冻水冻到系咁跳，系咁叫个情景······

      据师兄讲，佢咖师兄同佢讲，响“60X”号房系空噶，点都唔会有人肯入去住，呢间宿舍好猛！（系60几我真系记唔起，系上楼梯左手边果排中间咁上下位置）
     
      起N年前某一届临近高考？间宿舍系好正常4张碌架床咖8人男生宿舍，有朝早，呢间宿舍噶学生返学时，其中一个上铺咖同学话唔系好舒服，帮手请假，咁咪帮咯，中午落课后返到宿舍，见个上铺个同学仲训响到，点叫都叫唔醒，112到佐后，发觉原来已经死佐咯·····好似系咩急性咩病

      事发后，虽然宿舍D人好惊，不过夜晚都要住噶！唔通训街咩？头几晚个个都好惊，不过都无发生咩事，渐渐都放松好多，直到有一晚，响半夜，有位同学突然扎醒佐，半夜扎醒，同学又去世无几耐，紧系惊啦，佢挣开眼惯性咁望下四周，想安慰下自己话都无野，无事嘅咁······点知竟然见到果个已经去世噶学生坐响佢自己张空床到！
   
      呢一幕可想而知几恐怖，吓到呢个扎醒噶同学叫都唔敢叫，盖上头就训觉！
      
      虽然经历呢件事，而且已经流传开去，但学校根本唔会相信而俾佢地换宿舍，呢班学生晚晚都胆战心惊，据说唔只佢地，到后来接住入住呢间60X宿舍咖同学都曾经见过呢位临近考试而中途离开咖学生 。佢会响门口走入来，然后坐返自己张床到，虽然不断咁从复呢个动作，不过从来无害过人····
      
      听完呢件事后，响日头我上去睇过下传说中咖60X房，已经空置有段时间，隔佐几间宿舍先有人住，不过住宿咖人本来就唔多，不一定怕果间宿舍。呢间60X号房，除佐几张碌架床有D旧同凌乱之外，发觉唔到其他野，只系觉得有D阴凉。
      

      据说人死后会对死前所盼望所依恋咖事物会追随不去，不断重复。可能，呢位师兄生前真系好想考到好大学报答父母····

      想去睇睇传说中60X号宿舍咖老友，其实响正常落课时间可以俾家长入去接细佬仔，直接行入去就得噶啦，正面一直行到最后，有个篮球场，就系最后果栋教学楼，楼下有排树，或者后门入，左转就见到。行上6楼，右转，第几间真系唔记得，系响中间咁上下。