2011-08-23 19:17:10

归档在 上海闲话专栏 | 浏览 186 次 | 评论 0 条

　讲起吃西瓜，拉垃搿个特殊年代个辰光有眼难，也老有意思。
　　首先讲“凭票证购买”。搿个辰光物事样样少，啥个侪要计划供应，凭票证购买。买西瓜呢要“小菜卡”，就是计划供应蔬菜、蛋、豆制品佬啥个卡，拉垃卡上敲只章，或者记个数就算买过了。“小菜卡”分大户、小户两种，5人及5人以上的家庭是大户，以下是小户。买西瓜多数是按人头算的，每人4斤，迭能一算，两三人个屋里向只好买一两只西瓜，有个辰光也照户头算，小户2只，大户三四只。西瓜的个大小侪碰运道了。今朝卖瓜人高兴了，搭侬拣只大个，超过计划数交关，算侬额骨头碰到天花板了；卖瓜人搭侬候分克数照计划数秤，侬对伊也呒没办法。其次叫“堂吃西瓜”。有段辰光上海农科院培养出西瓜新品种“华东26号”，西瓜供应数量小，连凭卡计划供应也不够，就想出堂吃西瓜个办法，拉垃闹猛地段寻个店堂，摆眼简单个台子矮凳。要吃西瓜个，拉垃门口排队，凭眼光拣已切开个西瓜，称过后付钞票就进到店堂，坐辣矮凳浪吃，不过西瓜籽勿准带出去，必须吐拉台子浪个淘箩里，搿些西瓜子是留种个。只能辣拉店堂里吃西瓜，阿拉就叫伊堂吃西瓜。再么叫“买西瓜釀”。有段辰光，听讲是上海一家罐头食品厂要生产“西瓜酱”罐头支援到非洲，“西瓜酱”是用西瓜皮做个，拉拉样样物事侪老少个辰光，倒是讲究节约的，西瓜皮做“西瓜酱”，西瓜釀就卖拨阿拉老百姓吃，做到了物尽其用，也拨阿拉有吃好西瓜个机会。常常是供应西瓜釀个店门口排起长队，因为供应个数量有限，起得晚还买勿到呢。有的买西瓜釀的地方老促克额，店门口朝西，下半日太阳火辣辣个，交关要买西瓜釀个老老少少只好拿湿毛巾、钢精锅顶着头浪排队，能买到是蛮开心啊，汗流得淌淌滴也顾不上了。
　　现在想想搿个辰光吃西瓜还是蛮有意思额，搿种苦日脚是勿会再来了。