2-5-2016

 

ON.CC

【有粉絲撐】林峯唔怕同黎明撞期開騷 (視頻)

http://hk.on.cc/hk/bkn/cnt/entertainment/20160502/bkn-20160502024801484-0502_00862_001.html

 

林峯話完騷最想做嘅係飲罐汽水。

 

之後工作好密，都會盡力KEEP身形，只係會食嘢方面放縱少少。

 

林峯好開心有咁多粉絲支持自己。

 

三場演唱會爆滿，林峯話好多朋友都冇飛嚟睇，咁幾時開PART 2先？

 

【on.cc東網專訊】 林峯喺紅館舉行一連三場嘅演唱會去到尾場，最後在encore部份，林峯又在台上感動表示這幾年在音樂上沉澱過，演藝事業亦正在消化緊，想有更多新突破，因為入行都已經十幾年：「好多謝大家依幾年嘅等待，演唱會之後我會投入影視工作，排到出年年底，不斷有作品推出。」為演唱會畫上圓滿句號。

 

強調冇撞傷頭

 

林峯完騷後出席慶功宴，接受訪問時，被問到網上流出他疑似撞到頭部的片段，他直言沒有受傷：「嗰吓『呯』一聲係急速降落嘅鐵閘聲，有心有心，冇事。（女友有冇呵番？）好小事啫，ok啦，仲唱得跳得，唔影響。（唔會痛？）今日總算圓滿結束，值得嘅。可能聽日食返餐好啲嘅囉，依樣嘢係我比較期待嘅。減咗廿幾磅，食嚟食去都係食個兩三樣嘢，最後嗰段時間覺得番薯好好食。（想食咩？） 好多都想食，一陣想飲番罐汽水。好難得有個演唱會會令我有個目標去做依樣嘢。」他表示日後都會盡量keep住身形，食嘢會放縱少少，但都會盡量食得健康啲。

 

摩打燒咗冇得倒吊

 

至於問到尾場為何沒有凌空吊起，林峯坦言感到可惜，原本安排了很多動作，亦想倒吊唱歌，但因為第一日有技術上的問題，而令到摩打燒咗，又搶修唔到：「唔係想畀人睇到有幾危險，同有幾難。其實都係個創舉嚟嘅，同山頂嘅朋友係最近距離接觸，滿足到大家就好。」

 

唔怕同黎明撞期

 

問到演唱會頭場同黎明撞開騷，可會覺得焦點去了對方身上？林峯直言每個藝人都有支持自己嘅人，都想每場爆滿，所以就算有好多朋友問有冇飛，自己都唔能夠滿足晒朋友嘅要求：「已經meet到target，每班入場嘅觀眾係有surprise，滿足到佢哋。咁多個月嘅努力，出嚟嘅成果係超乎我哋嘅想像。（冇唔開心？）因為都冇時間concentrate係依樣嘢度。」

 

吳千語畀膽騷肌

 

其後，他又表示正考慮做巡迴演出，但因為開戲同劇都要開到年底，加上有更勁嘅工作傾緊，但現時未能夠宣布，但如果要做巡唱就好想將整個舞台搬到其他地方，所以可能要一年時間，笑言身形都要keep一年。另外問到女友吳千語睇完演唱會，可有甚麼評價，他笑言：「佢話show多啲畀人睇啦。 」

 

同黎明撞晒期開騷，林峯就話唔會理呢啲嘢，最緊要滿足歌迷。

 

有指林峯撼到個頭，佢就話係部升降機急降嘅響聲，自己冇受傷。

 

因為摩打燒咗，尾場演唱會冇得玩半天吊。（資料圖片）

 

女友吳千語睇完個騷話林峯應該騷多啲畀人睇。

 

已經唔着衫，再騷多啲……唔通吳千語想叫林峯除埋條褲？

 

 

 

消失幾年再開騷　林峯自爆最怕冇人捧場 (視頻)

http://hk.on.cc/hk/bkn/cnt/entertainment/20160502/bkn-20160502020822476-0502_00862_001.html?eventsection=hk_entertainment&eventid=402883474ddd0ef9014df61489025b10

 

【on.cc東網專訊】 歌手林峯在紅館舉行一連三場《HEART ATTACK LF LIVE IN HK》演唱會尾場，全場爆滿，獲黃百鳴、鍾舒漫、許靖韻、洪杰、鄧智偉、馬天佑等撐場。

 

凌空搵粉絲自拍

 

林峯先以紅色長褸吸血鬼造型躺在透明棺材出場，唱出《Heart Attack》揭開序幕。之後阿峯就換上白色造型，當個台升起嗰時，阿峯同其他dancers一齊去到升起咗個台嘅底部，雙手掹住扶手，好似做引體上升咁圍住個台轉，仲越轉越快，真係少啲臂力都唔掂！其後到演唱會中段，嘉賓農夫出場放笑彈，仲幫阿峯挑選5位女歌迷上台互動，而今晚嘅女粉絲質素都算唔錯，有女粉絲着超短裙晒腿上陣非常性感。之後到粉絲最期待嘅畫面出現喇，就係「凌空360」！畏高嘅阿峯企上透明底吊台，離地近40呎圍繞紅館一周，他表現非常鎮定，不過就冇凌空吊威吔，阿峯仲不時提粉絲拎電話同佢自拍，相當親民！

 

濕身誘惑

 

其後林峯換上白色貼身背心黑褲，大晒麒麟臂，與多位半裸男Dancers勁歌熱舞。唱到《Once Again》時，阿峯更扯爆背心半裸示人，大騷零脂肪body同六舊超明顯嘅腹肌，全場粉絲瘋狂大叫！之後當阿峯跳到台邊時，突然有水噴出嚟，噴到佢成身濕晒，相當sexy！但好可惜阿峯竟然只騷肌一首歌，之後就着返件黑色網衫。最後阿峯只穿上一件藍色外套回到台上，感觸地表示自己都抖咗幾年，直言：「有擔心過唔知會唔會有人嚟睇自己嘅演唱會，所以好感激在場嘅每一位，令我有信心期喺依個舞台上繼續唱歌。」

 

場場都爆滿，乜嘢信心都返晒嚟啦！

 

以紅色長褸吸血鬼造型打扮出場。

 

短裙晒腿，今次啲女粉絲質素高。

 

林峯差啲畀熱情嘅粉絲拉咗落台。

 

吊到咁高仲要伸個頭出去畀粉絲影相，林峯真係夠膽。

 

原地跳超過兩米……應該破到世界紀錄。

 

林峯爆肌。

 

林峯唱得勁投入。

 

林峯話抖咗幾年再開騷，都好擔心冇人睇佢嘅演唱會。

 

 

 

觀眾拍到疑受傷片段　林峯堅稱冇撞傷頭 (視頻)

http://hk.on.cc/hk/bkn/cnt/entertainment/20160501/bkn-20160501183712472-0501_00862_001.html?eventid=402883474ddd0ef9014df61489025b10&eventsection=hk_entertainment

 

【on.cc東網專訊】 「Chok王」林峯喺紅館舉行一連三場嘅《HEART ATTACK LF LIVE IN HK》演唱會，今晚已經進入最後一場，為咗今次演唱會真係博到盡，除咗吊威吔喺紅館山頂凌空漫步外。點知佢唱《Broken》就畀飾物割傷，搞到手流血，不過佢當時舞照跳，仲話冇事添！

 

點知尋晚林峯開騷又發生「意外」，今日有讀者爆料提供條短片，見到當時林峯唱跳緊《One More Time》時，大騷肌肉嘅佢，令到唔少粉絲尖叫，點知唱完之後，林峯要落去後台換衫嗰陣，見到佢好似個頭撞親咁，不過因為當時林峯背住鏡頭，所以唔肯定，究竟林峯係咪整親！？

 

林峯透過經理人向《東網》回應，強調自己冇撞親：「冇撼親。冇理由自己撼親都唔知，冇啲咁嘅事！」指當時大家睇到嘅應該係錯覺：「因為其實係落唔晒去，同埋林峯高過個台，所以變相佢要耷低個頭捐出去，再加上當時塊板又Chok一Chok，所以大家先有錯覺啫！」

 

有觀眾拍得林峯在乘搭升降機回後台換衫的片段（左圖）疑撞到頭，但林峯堅稱沒有被舞台裝置撞傷。

 

林峯乘搭升降機回後台換衫。

 

觀眾拍到片段，見林峯在乘搭升降機回後台換衫期間疑撞到頭。

 

林峯為今次紅館騷博到盡。

 

林峯強調冇接到頭。

 

林峯連火都玩埋，真係搏命。

 

林峯承認手掌被飾物割傷。