25-1-2016

蘋果

林峯衝紅燈　孖千語睇脊醫 (視頻)

http://hk.apple.nextmedia.com/entertainment/art/20160125/19465308

【心急衝燈】■林峯不遵守交通規則，衝紅燈過馬路，千語則乖乖停步等轉綠燈。DV圖片

 

【做柴可夫】■開車走時，林峯發現記者即手指指，千語BB則低頭玩手機。

 

■千語和林峯雙雙進入中環這間脊醫診所。

 

■林峯和千語拍拖超過三年，依然恩愛糖黐豆。資料圖片

 

【中環】林峯和女友吳千語拍拖超過三年，不時孖咇晒恩愛，前日下午2時許，即使寒潮襲港，氣溫驟降，但「峯語」都出動去中環拍拖，他們更帶同女助手做「電燈膽」，峯語就齊戴口罩掩人耳目。

林峯做柴可夫，駕駛他的白色Range Rover四驅車，載住千語BB及女助手，一行三人先把車子泊在中環中心，然後他們徒步行往附近一間商業大廈。穿上墨綠色外套配同色花圖案頸巾的林峯，戴住鴨舌帽和口罩，只露出雙眼，千語BB也同樣戴了口罩，黑色禦寒上衣搭穿窿牛仔褲配毛毛靴，包到暖笠笠出動，兩人沒十指緊扣，反而分開而行，相隔幾個身位，千語BB全程跟女助手雞啄唔斷。他們進入了商業大廈直上去看脊醫，大約一小時左右，峯語看完醫生落樓。林峯經常拍戲受傷，舊年又傷腳，未知這次是否舊患復發？

千語停步等綠燈

當林峯、千語BB和女助手行到燈位準備過馬路，兩女遵守交通規則停步等轉綠燈，但心急的林峯就懶理紅燈照過馬路，身為偶像卻做出錯誤示範，絕對是壞榜樣。他們其後到停車場取車後，林峯繼續做司機，千語BB則坐司機位旁，她上車即耷低頭玩手機。林峯取車駛出停車場時，眼利發現記者即手指指，跟住便驅車離開。

採訪、攝影：羅德光

24-1-2016

蘋果即時

【狗仔出更】峯語又孖咇蒲中環 唔濕平去睇醫生 (視頻)

http://hk.apple.nextmedia.com/enews/realtime/20160124/54684200

林峯同吳千語拍拖超過3年，不時出雙入對，即使呢幾日寒潮襲港，「峯語」都出動去中環。噚日林峯負責做柴可夫，揸住佢架白色Land Rover四驅車，載住千語BB同佢助手，一行3人先將架車泊咗喺中環中心，跟住佢哋行去附近一間商業大廈。

着住墨綠色外套配同色花圖案頸巾嘅林峯，戴住鴨舌帽同口罩，只係露出雙眼，千語BB也同樣做口罩黨，黑色禦寒上衣搭穿窿牛仔褲配毛毛靴，包到暖笠笠出動，佢哋兩人前後而行，隔咗幾個身位，千語BB全程同女助手雞啄唔斷。佢哋一齊行咗去商業大廈，直上去睇脊醫，大約一粒鐘，佢哋睇完就返落樓。林峯拍戲成日受傷，舊年又傷腳，唔知係咪去睇舊患。

當林峯、千語BB同女助手行到燈位準備過馬路，兩女好遵守交通規則停步等轉綠燈，但心急嘅林峯就懶理照衝紅燈。佢哋急急腳上番車，林峯繼續做司機，千語BB就坐車頭位，上咗車即耷低頭玩手機，林峯駛出停車場時，眼利發現記者即手指指，跟住就開走。

林峯同千語噚日現身中環。

匆匆趕去睇醫生

千語（左）同女助手行先，林峯（綠外套者）殿後

 

行行吓千語扭轉面同林峯講嘢

 

林峯過馬路時自己行先

 

等出停車場期間，林峯不忘整理儀容