30-5-2009

蘋果男生圍
林峯　管家仔變臉登紅館

http://hk.apple.nextmedia.com/entertainment/art/20090530/12817983

林峯闖樂壇出道兩年，下月中已踏紅館開個唱。訪問中，演活《家好月圓》管家仔的他一直努力地建立歌手身份，洗脫電視的入屋味，同時也在撇清與鍾嘉欣的情侶關係。旁人眼裏林峯是吃不到葡萄，但林峯說，對鍾嘉欣，確實有感覺，但不是那回事，他說：「呢幾年都有令我有感覺嘅人出現，都有對我好好嘅女仔，但唔係嗰樣嘢，我好清晰。」撰文：吳佩思

林峯將於下月舉行演唱會，他笑言屆時博盡出擊，濕身、 T-back、勁歌熱舞，樣樣有齊。攝影：陳順禎

林峯下月中將會在紅館舉行處男演唱會，大家都很好奇緋聞女友鍾嘉欣會否擔任嘉賓？林峯日前劈頭便說：「冇喎。」再三追問，仍是那句：「我冇諗過請佢喎，而且唔係由我請嘉賓。作為一個歌手，我唔想畀人好電視嘅感覺。如果成件事都要圍繞 TVB，咁不如請晒所有 TVB藝人上嚟啦。」決絕若此，到底想跟電視圈短暫分家，還是要跟鍾嘉欣劃清界線？

林峯承認對鍾嘉欣有 feel，奈何礙於性格迥異難發展。資料圖片

 

 

嫌鍾嘉欣太固執

兩人的緋聞傳了近三年。由06年《溏心風暴》到去年的《家好月圓》，即使劇中未能人月兩圓，在觀眾眼中他們已是一對。但現實中，管家仔林峯被緋聞塑造成癡心闊少，為接近女方不惜包辦吃喝玩樂，製造親近機會。根據報章雜誌的劇情發展，林峯最近因為不忿慘食檸檬，怒斬情侶檔，還刻意劃清界線，鍾嘉欣則高呼甩難云云。

老實講，作為一個男人，如果屬實，都幾冇面。林峯的版本又如何？他說：「講咗成年啦，咪又係咁。如果要弄假成真，一早就成咗真啦，根本就冇，唔係嗰回事。我自己睇都覺得襯，咁又點啫？有啲嘢唔一定要試。我係好睇 feel，『啪』一聲，拍劇嗰陣，係唔係，你會知。」

「我同佢（鍾嘉欣）拍完劇之後再冇聯絡。佢係好女仔，工作上，熟就唔係好熟，但相處得好舒服。總之唔係……係好朋友囉。」倒是工作上兩人有商量，例如鍾嘉欣闖樂壇，演出前後都來問他意見。對於這位唔太熟的好朋友，究竟有冇 feel？林峯說：「有嘅，好坦白咁答你，但佢份人太固執，我哋拍拖，一定成日嗌交。」

有個「廈門李嘉誠」老竇做後台，鼻高高又靚仔，條件優厚，自然大把浪蝶撲埋身，但每次做訪問他例必說，入行十年來冇拍過拖：「呢幾年都有令我有感覺嘅人出現，亦都有對我好好嘅女仔，但唔係嗰樣嘢，我好清晰。」

曾有「啪」一聲的感覺，也有人願意投懷送抱，難得林峯仍守身如玉──你也可理解為揀飲擇食：「我唔會試，我有責任㗎嘛！而且我根本冇時間，令我少咗好多煩惱。愛情係好甜蜜，我仍渴求緊拍拖嘅感覺，我冇試過，我恨，但愛情唔開心嘅時候會影響工作，家仲係創業階段，我冇必要冒呢個險。」想不到形象明明是情場浪子，心態卻如懷春少男。

個唱任女 Fans魚肉

林峯兩年前加入英皇，出過兩張唱片，處男碟得過 IFPI最暢銷男新人獎， hit歌有《心領》、《愛不疚》、《愛在記憶中找你》……無綫小生， fans無數。講到踏紅館，似乎還欠說服力。林峯也覺得不夠。

林峯說：「最初我仲以為係搞音樂會，點知原來喺紅館，我就諗，係咪去得太快呢？我永遠唔會覺得自己已經 ready，我問可唔可以遲啲？佢哋話之前嘅歌 feedback唔錯，公司同 TVB都話呢個 timing啱啱好，仲話如果你覺得自己未 ready，咁呢世都未 ready，咁唔通話唔得呀？」

練腹肌捱痛

對於個唱宣傳賣點是性感，林峯說：「我以前差啲練到六嚿腹肌㗎，嗰陣痛到伸唔直條腰，冲凉攞毛巾都舉唔起隻手，後來因為要開劇先停咗。」可擔心到時女歌迷會飛擒大咬？林峯說：「嚟睇騷嘅都係女性，我都想同佢哋多啲互動，總之佢哋想點就點啦！」

髮型： D.Y.of Hair Culture