9-10-2014

頭條網

《衛子夫》大紅 劉家豪搵林峯再演黃金劇

http://hd.stheadline.com/ent/ent_content.asp?track=news&contid=304189&srctype=n

※劉家豪讚林峯著上皇袍，霸氣十足。

前無綫金牌夫妻檔監製劉家豪和梅小青於2012年畀何麗全撬過now TV，兩人打造的首部電視劇《衛子夫》成為內地全國收視冠軍熱播劇，收看人次高達7億，而網絡點擊播放量更超過23.8億。兩夫婦獨具慧眼，成功為劇中主角林峯及周麗淇（Niki）在內地的知名度打得更響。梅小青開心地說：「今次林峯放低少爺仔身份搏殺，連眼神都識演戲；至於Niki演技亦自然到話喊就喊，仲成為內地最受歡迎藝人前10位，大家都好開心。」劉家豪仲希望原班人馬再拍一部古裝劇，繼續打造更多黃金劇。

由now TV同華策影視聯合製作，由林峯、周麗淇及其男友徐正曦、王珞丹等主演的《衛子夫》於8月20日登陸浙江、安徽及東方3大衛視黃金檔，開播以來收視節節上升，更高居收視第一，作為總導演的劉家豪及總編劇梅小青成功幫公司省靚招牌。除帶挈林峯成當紅炸子雞，周麗淇亦憑平陽公主一角人氣爆燈，高據內地最受歡迎藝人前10位。一炮多響，難怪劉家豪興奮道：「喺國內口碑傳得好快，因為一晚播足3集，煲劇好夠火候，香港根本無得比。」

香港劇無得比

梅小青又形容今次做到三贏局面，原來得來不易，始終兩地文化不同，又要做到有自己的特色就步步為營，即使係物色配音、編劇團隊，每件事都要親力親為，籌備足足一年，為求做到歷史劇又不失戲味：「《衛子夫》從一開始籌備就已經確定係以中國大陸市場為目標，為免『水土不服』，所以本劇的編劇團隊都係從內地到香港讀完中文大學的畢業生組成！」

林峯推完再演

今次致勝之道，家豪哥認為全靠劇本好，他自爆道：「我同林峯合作過《溏心風暴》、《溏心風暴之家好月圓》和《回到三國》等，大家有一定默契，但今次搵佢咁啱撞正佢熱戀期，而且佢手頭上有兩個大陸劇，梗係歸港心似箭啦！所以會面當日佢係禮貌式赴約推戲，點知佢睇過兩場戲既劇本就猛讚好正，為求好戲既林峯最終接左。佢仲放低大少身份冇遲到早退，我仲擔心佢啱啱拍完《陸小鳳》踩入劇組會捱到殘，提議佢不如先拍文戲，阿峯反而堅決話自己係老虎會全力搏殺。」

至於周麗淇，家豪哥亦激讚她演技比起9年前做《秀才遇著兵》時有好大進步，他說：「Niki做得相當好，切合我咃心目中要求既人靚、景靚、對白靚既平陽公主，仲話喊就喊，好神奇！所以我加重左佢既戲份好讓大家更加認識佢，擔保佢辛苦得來係有收穫。」

目前兩公婆再下一城，籌備下一部以唐朝為背景的大唐聖主李世民，家豪哥直言想搵番這個黃金班底再接再厲去創下佳績。

採訪：方騫平　攝影：李維隆

※劉家豪夫婦任職無綫時成日點石成金，曾捧紅過黎明、周星馳和陳豪等，成金牌監製。

※徐正曦和周麗淇憑《衛子夫》成當紅炸子雞，劉家豪夫婦希望搵二人演新古裝劇。

※周麗淇演技精湛，係平陽公主的不二人選。

※一劇爆紅，周麗淇成為劉家豪夫婦的御用女角。

※黎明梅小青寵兒，91年的《今生無悔》，騎電單車做浪子好搶戲；93年升至天王級的他重返無綫拍《原振俠》，指定由梅小青恩師做監製。

※周星馳　　89年劉家豪破格搵他擔正演出《蓋世豪俠》及《他來自江湖》，發掘周星馳成喜劇之王。