31-8-2014

蘋果

碧咸炒車傷右手 囡囡扁嘴呵番

http://hk.apple.nextmedia.com/entertainment/art/20140831/18850436

■碧咸上周四於日落大道發生交通意外，Harper一臉擔心，不時望着碧咸的傷處。

現年39歲的前球星碧咸（David Beckham）上周於荷李活發生交通意外，駕駛着電單車外出時座駕翻側，當時未見任何傷勢的他，昨日於洛杉磯機場現身時已包紮起右手，手抱的女兒Harper Seven未知是否見到碧咸受傷大為擔心，不但扁嘴，更不時查看碧咸手部的傷勢。

英國萬人迷碧咸上周四於荷李活西駕駛着自己裝嵌的懷舊款式電單車現身，他坐上電單車離開喜愛的荷李活著名紋身店Shamrock Tattoo，當座駕駛至日落大道時卻發生意外，有報道指碧咸想撇甩狗仔隊，失控翻側，當時電單車部份零件散落於街上，但碧咸仍能自行起身行走，身上不見任何傷痕。之後他脫下頭盔走入紋身店求助，三位紋身師傅齊齊出來幫碧咸，將電單車推回店中，當時不少報道都指碧咸並無大礙。

Harper疑體重超標

及至昨日，碧咸跟11歲次子Romeo、9歲三子Cruz及3歲孻女Harper Seven於洛杉磯機場現身，卻被發現右手前臂位置包着繃帶，右手手指公也貼上膠布。雖然有傷在身，但碧咸仍用受傷右手拖着Cruz、再用左手抱着女兒Harper步入機場。

未知是否見到老竇受傷，紮着孖辮戴着大蝴蝶結的Harper一臉不悅，不時查看老竇的傷勢，更扁起小嘴。網友見到碧咸女兒雖然大讚可愛，不過就直言她比同齡的小朋友肥胖，懷疑她體重超標並不健康。

助太太暫做湊仔公

其實碧咸並非首次發生交通意外，去年10月他駕着黑色越野車載着大仔Brooklyn外出，由比華利山的住所駛出時撞上一部私家車，因車速不快當時只是撞漽泵把，沒人受傷。

此外，碧咸嫂Victoria近日正密鑼緊鼓，為在秋季營業、位於倫敦的首間時裝旗鑑店裝修而忙碌，上周五她繼續到訪正在裝修的店舖巡視情況，難怪湊細路的責任，都暫時落在碧咸身上。

撰文：盧葦

■碧咸跟Romeo、Cruz及Harper現身機場時，被拍到右手包紮着繃帶。

 

 

 

蘋果即時

【人包鐵好危險】 碧咸炒電單車整傷右手 阿囡好擔心

http://hk.apple.nextmedia.com/enews/realtime/20140830/52850183

英國萬人迷碧咸（David Beckham）上個禮拜四喺荷李活當地發生交通意外，當時佢駕駛住電單車，由荷李活著名紋身店Shamrock Tattoo離開，有報道話佢為咗撇甩狗仔隊，喺日落大道時卻發生意外失控翻側，有唔少電單車零件散落喺地上，但碧咸就可以自行起身，仲去搵幫手，幫番間舖搵紋身師出嚟扶起架車，推架車推番入紋身鋪入面，當時碧咸睇落去傷勢似乎無乜大礙。

不過碧咸啱啱係洛杉磯機場現身，隻右手就已經包起晒。佢帶埋11歲次子Romeo、9歲三子Cruz同3歲孻女Harper Seven搭飛機，唔知係咪飛去倫敦搵處於當地嘅Victoria。不過Harper Seven睇落去就無乜心機，唔知係咪見到碧咸受傷，佢不時扁嘴，仲不停望住碧咸手部傷患處。Harper仲紥着孖辮戴着大蝴蝶結，十分得意。

Harper Seven睇落去就無乜心機。(c)SplashNews/東方IC圖片

碧咸炒車後零件散落係地上。(c)SnapperMedia圖片

 

碧咸抱着Harper，但Harper卻面露憂心。(c)SplashNews/東方IC圖片

 

碧咸抱着Harper，但Harper卻面露憂心。(c)SplashNews/東方IC圖片