7-2-2014

蘋果

求驗客手記：邁阿密做班主  碧咸勢班紅魔兵 (視頻)

http://hk.apple.nextmedia.com/sports/art/20140207/18617444

■披上粉藍色頸巾嘅碧咸（右二）喺記者會後同班粉絲一齊影相留念。法新社

碧咸禮拜三喺邁阿密宣佈攞到一支以邁阿密為基地嘅美職聯新會專營權，據了解，佢只係出咗1,500萬鎊，即大約25%，其餘嘅4,500萬鎊就由佢啲拍檔畀。聽聞佢仲搵緊家陣效力熱火嘅NBA球星勒邦占士，同佢一齊搞波㖭。雖則佢隊波𠵱家百冇，而且最快要到2017年先會參賽，但佢圍住條粉藍色頸巾嚟見傳媒，意味隊波嘅主色有可能同曼城一樣，都係粉藍色。另外，佢話會簽世界級球星返嚟，仲計劃起一個可以坐25,000人嘅新球場。

38歲嘅碧咸話：「我哋決心打造一支全球化嘅球隊。而我亦會全力以赴，令隊波取得成功。」呢位踢過曼聯同皇馬嘅英格蘭名將又話：「除咗喺歐洲及南美搵食嘅球員，我哋都會畀機會年輕球員，我哋想培育有天份嘅本土球員，唔可以獨沽一味喺外面簽球星。」

碧咸佢開口，大把星級球員肯跟佢搵食。我求大俠相信，曼聯七小福包括加利尼維利、史高斯同埋畢特等都係佢嘅目標，搵佢哋幫手搞管理或教波。至於傑斯、里奧費迪南同埋林柏特呢啲同佢合作過而又有啲年紀嘅球星，話唔定都肯嚟美國踢波。話時話，家陣有19隊波嘅美職聯，喺2015年會有兩隊波加入，分別係奧蘭多SC同埋曼城有份嘅紐約城，去到2017年加埋碧咸隊世界聯隊，到時肯定好精采！