13-5-2014

頭條日報

追魂Call狂短訊 林峯遙距喪黐千語BB (視頻)

http://hd.stheadline.com/ent/ent_content.asp?track=news&contid=285385&srctype=n

※等埋位期間，林峯化緊妝都爭取時間send短訊。

34歲的林峯和二十歲嫩口女友吳千語BB蜜運近兩年，中晒BB降，更有報道指林峯已進駐女友堅尼地道香閨，同居試婚。日前Chok峯的新劇《使徒行者》舉行煞科宴，有指千語BB以女主人身份踩場，之後的劈酒局，BB更貼身監控跟到實。查實「七愛」林峯愛BB出晒面，連同劇對手佘詩曼都踢爆他拍戲時經常和女友傾電話。日前三位新劇主角林峯、佘詩曼和苗僑偉拍攝煞科戲時，一停機林峯果真成日主動遙距Check實女友，搞到機不離手，見佢係咁打電話或狂send短訊畀BB，個樣冧到爆，仲睇錶等收工，好鬼冤氣。採訪 ︰ 譚壹致

一年拍一劇的林峯，今年初和回歸TVB拍劇的舊緋聞拍檔佘詩曼合作重頭劇《使徒行者》，兩人朝夕相對，有傳恨入門的千語BB不時採取主動Check實男友，日前更被雜誌影到二人去選購價值二十多萬的king size大床，逼婚逼到出面。《使》劇煞科宴當晚，千語BB亦踩場盯實愛郎。被指做跟得夫人，千語BB日前出席活動時否認說：「係三哥（苗僑偉）和阿佘（佘詩曼）叫我去，我不是黐身女友。」更透露近日瘦了，體重不足一百磅。「牙籤人」千語BB再瘦，反而林峯就嗌自拍拖後增磅逾10磅，皆因女友廚藝了得，操肥Chok峯。

百人煞科戲

「峯語戀」甜蜜蜜，令旁人都覺得膩，難得兩人樂在其中鬥黐身。日前下午二時許，《使徒行者》在郵輪碼頭拍攝煞科戲，劇情講述飾演刑事情報科總督察的三哥手部受傷，和臥底探員阿佘和林峯上救護車，然後再諗計逃走。當日出動大批臨記扮演警察圍捕三人，老戲骨鍾景輝亦在場。近百人齊集碼頭先拍攝三哥左手受傷戲份，幾Take後就轉拍三位主角上救護車的ending戲。

三哥自拍Chok樣

埋位前，林峯爭取分秒狂send短訊，就算補緊妝都一邊企定定任人化，一邊笑笑口打短訊。此時三哥和阿佘行近嗌影合照，林峯只敷衍幾句，打完訊息再一齊影相，搞到西裝Look三哥好無癮，唯有自己拎部手機不斷自拍Chok樣。Send完一輪甜蜜短訊，叉晒電的林峯再走上救護車和對手拍攝，他先和阿佘望出車外，繼而三人齊齊睇準時機等逃走。最後一場都拍晒，皆大歡喜，三哥拆繃帶時，林峯已馬上打畀BB報告，見他甜絲絲傾電話仲成日睇錶，應該係約定當晚撐枱腳二人世界。最後，林峯拎住劇本行近海邊拍花絮，阿佘就最有heart不斷搵工作人員影合照，仲話拍攝了一○一日，有個美好回憶。

※三位主角上救護車拍攝，林峯都機不離手。

※一拍完，三哥忙拆繃帶，佘詩曼睇回合照，林峯就暱在後面蜜蜜傾。

※林峯傾電話報告時，仲不停睇錶等收工。

※煞科當日，佘詩曼主動搵藝人和工作人員合照。

※佘詩曼即時上載照片，慶祝大功告成。

※「峯語戀」甜蜜蜜，林峯試廚神女友手勢不斷增肥，反而BB就瘦。