11-4-2014

蘋果C1

現真身唔驚得罪人 偽文豪鬧爆TVB (視頻)

http://hk.apple.nextmedia.com/entertainment/first/20140411/18685726

記者：記　偽文豪：偽

記：點解要隱姓埋名唔用真名？facebook都只見到你半邊面？
偽：文人嚟㗎嘛，梗係用筆名啦，唔係都唔會叫自己做偽文豪咁搞笑。你話用真名唔係唔得，遲早有一日會有人知道我真名，但你叫我講我又唔鍾意呀。哈哈哈！我幅相都畀你哋翻loop咗好多次，嗰個都係我。
記：07-08年，做無綫助導係你第一份工作，係咪太辛苦好多嘢想要發洩？
偽：係我客觀觀察到嘅嘢，只係想分享經歷，本書好壞都有，但正面就少啲（偷笑）。大家可以當小說咁睇。裏面由我入去開始寫到點解要走，有晒起承轉合，唔係話第一篇嗰個人對我唔好，第二篇嗰個人對我差，咁冇意思，亦唔會睇得開心，大家當頑童歷險記去睇會開心啲。我講嘅嘢係其實發生過嘅嘢嘛。

三日冇返屋企瞓

記：你驚唔驚你書入面影射嗰兩個藝人（即吳卓羲和林峯），見到面會尷尬？
偽：唔係驚，但實尷尬。其實我對佢哋冇乜嘢，當然佢哋𠵱家會憎我。其實我喺本書度有讚林峯㗎！當然，吳卓羲我真係唔鍾意佢，但呢個世界上，你總有啲人係你唔鍾意啦！佢都唔需要鍾意我㗎。
記：當初點解又要入行？
偽：一直好想做創作，我都有好多仰慕嘅導演，好似杜琪峯、韋家輝咁。其實做PA（助導）之前都知辛苦，但冇諗過環境真係咁惡劣，我試過三日冇返屋企瞓，TVB有休息室畀你瞓，裏面有床鋪，但唔知幾耐冇洗。我又唔慣有人喺你隔籬扯鼻鼾，寧願自己帶睡袋匿喺辦公室瞓，但其實唔得㗎。
記：有乜促使你離開？
偽：有啲人話捱多一個月先啦、捱多一年先啦，咁冇意思，做到你唔想做咪唔做，我冇傷害任何人，我自己決定。嗰刻覺得份工冇前途，聽講以前啲叻人三年可以升做導演，𠵱家可能要八至十年都未得。我聽朋友講，之前港視挖角，TVB寧願搵番好耐冇做、轉揸的士嘅前導演回歸，但都唔肯升個做咗十年八載嘅PA，真係好奇怪。加上現今娛圈太狹窄，做電視嘅導演出唔到去電影圈搵食，電視業又寡頭壟斷，唉，老生常談，都唔使睇我講。
記：咁大膽出書爆無綫黑幕，驚唔驚得罪人？
偽：都得罪咗啦，但我諗唔使驚嘅，香港係法治社會嚟㗎嘛。我靠才華，人生係冇乜嘢需要驚！
記：家人擔唔擔心？
偽：少少啦，最好唔好提佢哋，𠵱家騎虎難下。
記：怕唔怕將來好難係呢行立足？
偽：我做緊《100毛》編輯，𠵱家只係普通寫嘢仔箒。唔諗咁遠，有乜做住先，過埋今日先講，哈哈，最可貴係活在當下，你成日諗過去、未來，你做唔番你自己，你要focus呢一刻。如果真係要講將來，我想做一個偉大作家，唔偉大都唔做，希望做得出色嘅時候就好似陶傑咁拍齣戲。
記：有冇考慮將來返無綫工作？
偽：去到呢個地步冇乜可能，除非有日TVB改邪歸正，但呢日好似狂派永遠係狂派，博派永遠係博派，我係對事唔對人，TVB Buddy應該明白。其實我最希望TVB改善對員工福利，對觀眾好啲，為觀眾着想，做啲觀眾想睇同高質素嘅嘢，照計有能力咁做。

捱得唔同唔想捱

記：網民對你評論有正面、有負面，仲有人話你係儍仔，介唔介意？
偽：我至今未做過呢樣嘢（儍仔），我諗冇人話鍾意聽，你可以話孫中山都係儍仔，林肯都係儍仔啦咁樣，蘇格拉底都可能有人話佢儍仔，因為佢哋都會做一啲人哋覺得好儍嘅事。
記：王晶都批評你唔捱得。
偽：係，唔緊要。俾人話梗係會唔開心，我哋呢啲80後全部飲晶哥奶水長大，我又唔好意思狠狠咁批評佢，但我又想回應呢件事。其實佢哋要分清楚，捱得同想唔想捱係兩樣嘢，我捱得都可以唔捱㗎，我點解一定要捱先？一代比一代係冇意思，因為上一代一定辛苦過呢一代，唔通王晶老竇同王晶講：「嘩，搞錯呀，你咁舒服，我嗰時唔係咁。」世界唔係以前咁樣，唔通我哋又講番秦朝，嗰時邊有車搭，要行一公里路，咁比咪冇意思囉。
記：點解搵陳志雲寫序？
偽：我淨係電視見過佢，做《100毛》時亦電話訪問過，佢好nice，佢連我乜樣都唔知，唔知我咁靚仔，哈哈哈！我亦有搵過王維基先生寫序，但可能佢係大忙人，冇留意我小小留言訊息，但我真係好支持佢，好有熱誠搞好電視。
記：覺得本書賣唔賣得？
偽：賣得嘅……應該，點會唔賣得吖。我比較擔心之後寫啲乜箒。本書聽日（今日）港島區可能有得賣，正式發售就下星期一。雖然部份係以前facebook寫，但作為有誠意作者，我都花咗幾個月時間重新雕啄過，其實我比較尊重啲讀者，我將佢哋放第一位，唔係將藝人幾差幾差放第一位，我想讀者睇得開心，本書好好笑，有笑點夾雜辛酸史。

「論點無懈可擊」

記：你係咪自信心爆棚？
偽：有朋友咁講，都冇所謂，當你批評一個人自大，你要知道嗰個人有幾多實力。所以我會叫嗰啲話我自大嘅人，去諗吓究竟佢知唔知我有幾多實力先啦！過份自信唔代表唔聽人意見，如王晶先生講意見我會聽，但有時啲意見，唔係好work。有用嘅意見要聽，但我𠵱家係作家，好猶疑就冇說服力。我決心做一個作家，就要有自己睇法，其實我平時待人接物好謙厚嘅，通常人哋叫我做乜我就做乜，好似狗仔咁好聽話嘅。不過你問我對呢件事有乜睇法，我覺得我嘅論點係無懈可擊。佢哋道理上係唔可以完全擊倒我，而我係完全擊倒佢哋。
記：係咪好受女仔歡迎？
偽：（昂頭自信）如果話我有好多女，啲女就唔鍾意我，但我會話我鍾意啲女都會鍾意我，過份自信一定有啦！都試過有男仔約我去街。但其實我讀書麻麻，唔係嗰啲傳統意義上面嘅叻人，我一向係革命份子，思想反叛，唔鍾意聽人哋講，我都有自己嘅諗法。一睇我就知唔係啲乜優異嘅人啦，亦都唔需要得到佢哋嘅認同。

採訪：嵐山  攝影：陳俊強

梁乃鵬責志雲寫序 (視頻)

http://hk.apple.nextmedia.com/entertainment/art/20140411/18685734

對於遭前無綫PA偽文豪出書數臭，昨晚播出的無綫維穩節目《東張西望》，只以「最近有位TVB前助理編導，出書講述當年做PA的遭遇」而帶出事件，接着播出行政主席梁乃鵬前晚活動上的回應，他將矛頭直指陳志雲。

梁乃鵬說：「我唔知點解陳志雲先生會替一個佢完全唔熟悉嘅人作序，你知作序一定要對作者有認識，亦要對作品有認同，如果根據報紙報道，只係朋友託佢，而佢未睇過本書，我覺得做法有啲商榷。」他又說：「呢位PA同事根據報道工作咗7個月，一定唔可以代表TVB所有PA嘅工作生涯，否則唔會咁多人到今日喺TVB工作幾十年，有啲仲變咗知名導演，你睇杜琪峯、王家衛，你睇吓幾多人尊重佢？」

與此同時，節目又安排一名任職4年的PA、助理總經理區偉林、監製李添勝和陳耀全唱好PA生涯，區偉林說：「好似做拎機、場務嘅人，對晉升成PA係個夢想。有啲人覺得一日十個鐘就夠，呢啲人慢慢會流失做唔到PA。」李添勝亦說：「PA工作繁複，但前途好，公司會畀機會佢做導演，高級導演、監製、經理，一路做上去冇問題。」

偽文豪昨晚知《東張西望》反擊，他即在fb留言：「我聽人講，今日《東張西望》幫我本書做勢喎，係唔係有啲咁嘅事呀？所以話世上只有TVB好。」撰文：張曦彤

■梁乃鵬（右）質疑陳志雲為一個不認識的人寫序的做法。

王晶寸未夠資格鬧人

http://hk.apple.nextmedia.com/entertainment/art/20140411/18685738

在無綫做了7個月的前助導偽文豪，在網上和出書罵前公司的演員和上司，王晶日前在微博批評偽文豪的行為是無聊加無恥的「X樣」。昨日記者再致電給王晶，他說：「我覺得一個只做咗7個幾月嘅員工去批評呢個嗰個，真係未夠資格，呢種行為唔值得鼓勵，所以陳志雲作為某大傳媒機構高層竟然幫呢個人寫序，更加離譜。」

王晶認為這個無綫前助導的說話對某些人已構成誹謗，隨時要面對法律責任，他說：「如果講我，我一定告佢誹謗，佢只做咗幾個月助導，對機械操作可能未了解，對成個圈係點都未搞清就爆人料，會唔會太片面，要鬧要爆料真係未輪到佢。」

隨時被告誹謗

此外，李力持昨在微博留言指自己當年在無綫打工搵命博，不為錢，只為一張導演卡片。對於爆料的偽文豪，李力持留言說：「非常讚賞作者不用真名，假名不用上身又可以加些戲劇誇張，反正市場要八卦不要事實！最後祝前程錦繡！條條大路通羅馬！我期待在成功的山頂上遇到你！」採訪：鍾國仁

■王晶寸偽文豪只做了7個月工，根本沒資格鬧人。資料圖片