3-3-2014

蘋果即時

【短片】【奧斯卡】用「埃瘋」定「三叔」？荷李活最紅11人 世紀自拍

http://hk.apple.nextmedia.com/enews/realtime/20140303/52242908

之後艾倫狄格勒絲又大玩自拍，點知佢嘅自拍引一大排紅星一齊影，有茱莉亞羅拔絲、珍妮花羅倫絲、安琪蓮娜祖莉、畢彼特、梅麗史翠普、謝勒力圖、奇雲史帕西、美國男星卓寧泰坦（Channing Tatum）、出爐女配角雷碧達尼安高（Lupita Nyong'o）同佢嘅兄弟，呢一張自拍，真係一張世紀自拍，幾年後拎返出嚟，可能會好值錢。艾倫狄格勒絲仲即刻貼咗張相去twitter。

而珍妮花羅倫絲喺影完張相嘅時候，條裙仲好似跌咗落嚟咁，一影完佢就要拉一拉，如在快手，如果唔係又會出醜喇。但最搞笑係， Ellen DeGeneres明明係用獲贊助嘅「三叔」note3嚟影呢張世紀大合照，但去番佢本人個twitter，卻顯示出佢原係都係用番自己部「埃瘋」。究竟「三叔」好定係「埃瘋」好呢？而有網民就用一句說話，形容艾倫狄格勒絲，就係。「身在曹營心在漢！」

不過相嘅質素都係次要，呢11粒星已經夠殺，張相upload之後，即刻被瘋傳，轉載次數直頭多過當年奧巴馬成功連任時與其夫人的合照！呢個植入廣告方式，「三叔」一定勁過「埃瘋」啦！