頭條網

http://pop.stheadline.com/content.php?vid=7519&cat=f

http://hd.stheadline.com/ent/ent_content.asp?track=news&contid=274471&srctype=n

※林峯再揮拳打交。 

早前傳出Chok峯(林峯)受女友吳千語BB教唆，拍罷無綫新劇《使徒行者》後，就退出娛圈回廈門同細佬爭家產。講到溏心風暴咁款，千語BB梗係唔做衰人，死話無咁既事。不過農曆年假孖BB去北海道滑雪預支蜜月的林峯，近日拍新劇就好搏命，他日前和梁烈唯拍外景時，一個打十個，「丹爺」上身，Hero峯峯仲要突圍而出，拯救豬頭唯唯，勁Man。結果途人不停大讚林峯，但對化了重傷妝的唯唯就好陌生，猛話「白色帽果個邊個黎？」難怪成晚咁風騷啦！

採訪 : 譚壹致、車綺敏

去年拎了《華鼎獎》影帝的林峯，再幫TVB拍劇，新劇仲有回歸的佘詩曼，份量十足。劇中林峯跟阿佘同樣飾演警方的臥底而加入黑社會，勁多追逐打戲。

日前晚上九時，林峯和梁烈唯(唯唯)在上環拍外景，劇情講述唯唯被黑幫追斬，林峯就挺身相救，仲突然「甄子丹」上身以一敵十。未埋位前，林峯先在欄杆壓腿拉筋，非常認真。Roll機後，他就住被人打到豬頭咁款的唯唯逃生，逃亡兄弟咬牙切齒，幾Take收貨。途人大讚林峯演技好又靚仔，聽到途人稱讚，林峯風騷滿臉，任影唔嬲。

之後一行人在空地再拍林峯一打十的場面，被惡漢追殺的林峯突然舉起圍欄掟向仇家，再拳來腳往。雖然拍足五、六次，但林峯無黑面，仲依起棚牙扮「哨牙峯」搞搞笑，心情靚靚。可憐豬頭唯唯成晚無人識，途人猛話「白色帽果個邊個黎？」，搞到唯唯好無癮，成晚無笑容。