頭條日報

被林峯「7愛」的吳千語愈來愈風騷，全身名牌又黐坐林峯的160萬馬莎拉蒂靚車兼住中半山豪宅，闊太味極濃，就算未成功做到「廈門李嘉誠」林華國的新抱，都擺晒「峯嫂」高姿態，近期更以代言人身份幫林峯回應種種傳聞（見另文）。不過，林峯突然一反常態發表大男人宣言振夫綱，講明唔接受同千語BB一齊拍親熱戲：「我覺得唔應該將私人事搬上舞台畀人評論，亦唔覺得有需要用做話題！」他更重申，今後唔會再公開談感情事，看來林峯向千語BB作出了暗示，要成功入門，收口兼低調才是上策！ 

採訪：方騫平 攝影：張詠森

﹙林峯﹚Hair：DY@hair corner Makeup：Raymond Yip 服裝提供：Fairton ﹙盛君﹚Hair:：Linfa@il Colpo (tst) Makeup：Jan chan@ Annie G 服裝提供：Fairton 場地提供：都會海逸酒店

林峯與影壇新人盛君主演的驚慄片《詭嬰》將於月底上映，因為戲中同女友「千語BB」無乜關係，所以對手戲不多，更莫講親熱戲份了。曾表明唔LIKE女友拍咀戲的林峯，在新片中卻分別同盛君及子珊咀不停，跟後者的水中激吻更非常火辣，林峯坦言兩人「由水底咀到上水面，都咀好耐，咀得仲好肉緊。」回味時仍笑意盈盈，一臉爽歪歪，難怪有傳聞吳千語特地去監場。林峯即咆哮否認：「唔需要（監場），工作還工作，我講過，日後都唔再回答感情問題。」好Man呀。

情侶檔看誠意

為何千語BB不能寓拍拖於工作，順理成章飾演林峯老婆，而係做「姨仔」閒角呢？林峯繼續發表大男人論：「唔關（私）事喎，選角係由監製同導演揀，可能盛君外形比較成熟，好啱做呢，我覺得唔應該將情侶搬上舞台，因為每個人都需要生活，冇必要將生活搬上銀幕，正常合作就OK，所以日後都唔會咁做，情侶檔登台就可以接受，都係睇錢份上啦！」 雙重標準，峯峯好啱做高官喎。

拒絕再談千語

林峯拍了三部黃百鳴系電影，直言百鳴哥是他其中一位電影伯樂：「我係電影方面由零開始，好多謝百鳴哥鼓勵，等我有信心放膽去突破框框，嘗試唔同既片種，好似夠晒man既《忠烈楊家將》、搞笑既《男人如衣服》同埋今次既驚慄片，最初都懷疑自己，究竟可唔可以做到！（明年約滿無綫，會否同百鳴哥親上加親？）冇諗呢樣野，最重要睇劇本同角色，我同吳千語唔講公事，唔會將工作涉及生活中！」言下之意，峯峯同千語BB行埋就只係得談情說愛，情話綿綿？他一臉尷尬，欲言又止說：「我有我生活，唔使分享！」

暗示將離TVB

「親生仔」林峯快將約滿TVB，二○一三年還剩下兩個多月，他坦言勤力了十幾年，家陣要好好休息，做自己鍾意做既野！新任《華鼎獎》視帝林峯對未能在娘家奪視帝耿耿於懷，還兜了一個大圈暗示有離意：「有機會都想集郵，儲齊一套既，依家爭一個TVB？係卦！但冇所謂啦，我真係唔care！最重要觀眾鍾意睇我既作品。我第一份工就係TVB，公司教曉我好多野，我同TVB會keep住好好既關係，但暫時未諗到日後既合作形式。」

擁有42吋長腿，現年23歲的長沙美女盛君，畢業於著名的北京電影學院表演系，是趙薇、楊冪、劉亦菲的小師妹，畢業後，盛君被黃百鳴選中，簽約成為旗下演員，更於年初的賀歲片《百星酒店》中首度登大銀幕。《詭嬰》中將熒幕初吻獻畀林峯，咀完後大讚峯峯名副其實夠Chok，電力十足，搞到佢好鬼緊張，心跳加速，但就唔敢同千語BB爭仔。

林峯「代言人」

多得林峯，吳千語由二打六變成搶手暗星，每次出席活動都吸引大量傳媒，而接受訪問亦離不開林峯，久而久之，千語變身林峯的代言人，代男友否認離開TVB，地位好超然。

8月21日

傳吳千語迫婚不成出狠招，堅持要用男技師按摩，搞到林峯因呷醋而喊，她否認林係呷醋男友：「就算我身邊有一個路過人或助手，只要係異性就會被人寫。」

9月6日

有網友指身在橫店拍戲的林峯為免去探班的吳千語曝光，出手搶電話阻網友拍照，千語BB又代言：「印象中無發生過，佢好Gentleman。」

9月11日

傳林峯同TVB高層樂易玲不和，前者唔聽後者電話令她大發雷霆。吳千語說：「冇睇過篇報道，情節太誇張，好似匿係枱底知妁晒劇情咁！」又對於周刊指林峯為她背叛TVB，將與她老闆黃百鳴公司合作，吳千語即代為否認。

9月20日

吳千語和林峯出席黃子恒婚禮時，傳男方藉機求婚惟她冇心動。吳千語又代男友否認，仲Set死婚期要林峯等15年：「女仔通常過35歲先結婚，家陣我有自己工作，係搏殺期。」