蘋果即時

【視帝公投】 子華惡鬥Cool魔Sam哥 林峯慘被foul？

一年一度《萬千星輝頒奬典禮》仲有三個月左右舉行，去年視帝爭個你死我活，屬大熱之一嘅林峯呼聲係最高，但最後都輸俾「三屆視帝」黎耀祥。

今日有報道就話，今年林峯暫時喺香港冇劇集播出，加上佢同吳千語拍拖越拍越高調，結果惹嚟唔少TVB高層不滿，最近又盛傳佢唔會續約TVB，反而自組經理人公司或返去打理家族生意，令佢視帝呢個殊榮嘅距離越來越遠。

而今年無綫又玩公投選視帝，唔少強勁參賽者包括有《衝上雲霄II》兩位型男「Sam哥」吳鎮宇及「cool魔」張智霖、《On Call 36小時II》嘅「黑馬」馬國明，加上仲有無綫收視皇牌──黃子華擔正嘅《My盛Lady》，睇嚟今年台慶視帝又有一番龍爭虎鬥。

至於「三屆視帝」黎耀祥擔正嘅《巾幗梟雄3之諜血長天》，原本係今年台慶劇，可惜受祥仔之前演出嘅《神探高倫布》拖累，改為黎耀祥﹑陳豪加陳法拉嘅時裝劇《傳愛事務所》上陣，希望可以一洗布布頽風。

《My盛Lady》黃 子華大鬥《衝II》型男吳鎮宇加張智霖。(資料圖片)