爽報

【無綫輸晒】 苗僑偉鄧萃雯過檔維基 師奶觀眾大損失！

方才提過，黃智賢啱啱貼咗兩張新劇《點金勝手》天書(即劇本)嘅相，人物關係樹枝表複雜到冇人有，所以……一隻字都冇。

《點金》本來有三哥苗僑偉演出，夥拍黃宗澤再續《好心作怪》未了緣，但三哥臨時話有事要辭演，激到Bosco彈起猛嗌三哥要請食飯補飛。唉，食就食喇，只怕要食嘅，係餞行飯。

今日有報道話，苦等四年仍未獲發牌嘅魔童王維基又秘密發功，連撬兩名無綫好戲之人。一個係因為《金枝慾孽II》鬧爆戚周二人飛紙仔冇劇本兼自我、更因而同無綫交惡嘅鄧萃雯；另一個，正正就係三哥。

報道指，55歲嘅三哥因為想儘快回復自由身，所以臨時辭演《點金》，明剃無綫眼眉。加上佢又係黃日華死黨，華哥被無綫列入永不錄用名單都未驚過，幫口嗌埋自己好兄弟過檔亦一啲都唔奇。據報道中嘅知情人士所講，三哥04年返無綫，話就話為過戲癮，但演演吓由第一男主角變成第二男主角、變成小生陪襯品，三哥私底下都覺得「很不爽」。咁又係，明明唔係甘草，外型睇得，演技更加睇得，點解喺《雷霆掃毒》要做林峯下把呢？

有指三哥一早已心灰意冷想走人，本來諗住拍埋《點金》先離開，但王維基嗰邊下月已經有年度重頭劇俾三哥，女主角仲係張可頤，難怪連《點金》都拍唔切，急急想走人啦。

之前三哥接受本報訪問時，已曾謂：「話晒拍咗咁多年戲，做過好多唔同類型嘅角色，都要諗好多嘢。0依家基本上每年幫TVB拍一套劇，佢哋都會諗有乜嘢啱我做，不過我都覺得幾難諗，好似《學警》呢類型又拍咗幾輯，警察又做過好多次，仲有啲乜嘢可以玩呢？」流水作業嘅無綫，即使度身訂造劇本俾三哥，又係咪真係滿足到佢呢？ 

有報導指三哥曾抱怨為何要小生下把當陪襯。圖為《雷霆掃毒》劇照。林峯做男主角，三哥演既黑警排第二。