意义其节日(福州语诗歌)

买过真侈书

也卖唻真侈书

现在真少买书

有时固会翻出

以前爱看其小说看蜀看

就像蜀条歌唱其逢款

朋友固是老其好

其实嚽是蜀种偷懒

因为汝会八伊讲什乇唠

所以重新看伊

就像墿比较熟蜀样

伓使动脑筋

看书辰候我喜欢

着我见觉写真好其地方

使笔去划

着划辰候相当于

看第二遍

但是看第三遍辰候

就着换蜀种笔来划

譬如讲原底使红笔

现在就着使乌笔

原底使铅笔

现在就使钢笔

所以着我喜欢其书悬顶

都留有我看书其痕迹

我喜欢买旧书

蜀下，伊比较便宜

蜀下，我可以着悬顶

随便乱画

有其作家我特别喜欢

我会去网礼买蜀套精装版

但是我儥去随便去划伊

我会将伊像菩萨逢款供礼

所以每回买书

收遘新书对我都是真欢喜

真有意义其时刻

最近我想买蜀套书

但是伊真门贵

我有仂囝儥舍

所以就去讨伊其电子版

想儥遘其是

电子书有其伓使钱

有其俪使几块钱

并且我俪使几块钱

就会买着真侈在侈书

我真欢喜

但是欢喜以后

我发现曾经其

讨书，下单，等待

特别是收书辰候其激动

都变拍无去

也就是讲电子书

乞我带来真侈方便其辰候

我生活台中其蜀只节日

像飘浮其彩色气球

逢款意义其节日 拍无去