乞绑架其节日(福州语诗歌)

最早来北方生活

看见北方侬过五月节

各侬都八伊侬

都是告礼端午节

端午节就着食粿粽

伊各侬都是告是粽子

伊使其箬箬伓是

侬家逢款宽宽其竹箬

北方真少看见大蔸其毛竹

都俪仂仂嫩其竹囝

所以许箬箬也俪仂嫩嫩

共鸡角指喏

伊各侬都是使苇箬

苇箬也儥大

俪有两指半宽

我儥八裹粽

所以看见伊各侬裹粽

我就见觉特别食力

最儥习惯其是

伊将工厂发其手络

掏扯开去，线掏捭出来

也算就地取材吧

掏去缚裹粽

所以每蜀回食裹粽

我见觉都食着

手络上油污其味

尽啰儥受

有其侬无敆工厂做工

无手络，就直接使

包装使其塑料线去缚

我就会食出有塑料味

我是爱写诗其侬

侬讲写诗其侬有想象能力

所以我估计总款味逢款味

都是我头脑自家想出其

民间总款做也是无办法其

但是我看见五芳斋其裹粽

蜀粒粽卖大几块钱

也掏总款做总款缚

我就真佩服五芳斋

设计人员其审美观

五月节是农耕社会其节日啊

汝使工业社会其白线去缚

嚽就像颂衣裳乱由颂

悬顶颂礼汉服

下底颂礼皮鞋

蒋样看也“不搭”啊

侬家福州侬缚裹粽

都是使专门其裹粽索

伊是蜀种植物其藤藤箬箬

可惜我都儥记去伊号什乇

所以食其辰候真自然

儥像食鱼逢款

突然会食着鱼骨鱼刺

所以我无管伊什乇斋

我是儥去买伊其裹粽其

因为我见觉

让侬欢喜其五月节

都乞伊缚大几下其白索

乞“绑架”去