潜伏(福州语微小说)

我现在也是蜀隻小老板唠

我开啰蜀只小厂

厂无偌大，侬俪几十隻

但是我名字起真大

东方电器公司

仱有侬就讲

名字起只大儥好吧

我讲汝着用发展其眼光看问题

因为我这厂固着发展啊

我着乞伊留有余地

嚽蜀下，固蜀下

如果汝起三山电器公司

总款电器公司

侬家三山过侈去

无特色

汝俪起晋安区电器公司

复恰嫩

下日俪做大去

汝再去改名字

就真抠气

改名字会牵涉遘真侈乇啊

汝俪儥相信

汝现在将汝自家名字改啰改

汝就八偌夥麻烦唠

身份证户口册驾驶证

毕业证结婚书房产证

银行卡电话名字等等

都着改，想想头都会昏

所以我嚽是一步到位

仱侬讲我确实有

做老板其眼光

现在我公司罔做罔大去

三山真侈主公司都做儥过我

对我都怀恨在心

但是伊掏我也无办法

但是固着发展

发展是硬道理

卜发展就着招侬

因为公司员工

最近流动性比较大

譬如讲春节卜遘唠

汝就着发奖金啊

工人四五千

管理人员四五万

我也负担儥起啊

乍辰候我就着讨仂囝毛病

将看儥中意都乞辞赖去

汝伓通见觉我总款做心肝野搭

汝俪自家做老板肯定也会总款做

嚽是行业其潜规则

春节过后我再去

海峡人才市场去招聘

仱嘻日我亲自出马去招聘

以表示我对人才其重视

嚽普通话号礼求贤若渴啊

仱我就看见行来蜀青年哥

伊讲伊是做公关其

着世界500强公司都做过

伊讲汝俪想公司卜做大

公关真关键，公关就是攻关啊

我讲汝讲其有道理

我今旦来招聘

就是想讨蜀隻攻关其

我讲汝其名字

伊讲告伊依强就会使了

各侬都八

着侬家中国

就像现在看亲谈恋爱若

着去酒店饭店礼看

做生意也是总款

食会清楚，醉会透骹

生意就差罔多

就谈八九成唠

依强确实能力真强

裡来无几个月日

设备，电器，参数

图纸，加工过程

甚至电器蒋样调整伊都八

并且食酒讲脬胡搭喝也都会

所以我见觉伓啻倩蜀隻公关

伊固是工程师啊，野合适

现在别只公司

都苦无订单啊

我公司订单共雪片若

直透飞来，接儥赴，做儥完

现在公司发展真快

我见觉东方这名字都无遘大

着起太平洋电器公司

但是现在再改已经儥赴唠

仱因为稠稠去酒店

所以饭店老板甚至

服务员都八我是

东方电器其老板

总款过啰有蜀年

仱有蜀日财务部掏蜀叠

酒店其发票告我签字

我讲溪势会变只满侈

比原来会多五六倍

我看发票下底

都是依强其签字

都俪两三工就有蜀张发票

我就告依强来

依强讲，无办法啊

侬家东方电器

现在名气真大啊

侬都爱订侬家其产品啊

仱汝今旦开会明旦出差

我也讨儥着汝

只能我自家带客户去酒店

我想伊讲其也有道理

就是见觉食恰侈去

过几工我着酒店碰着老板

我讲底呢来只满侈发票

老板讲，哎啊，依强隔两工就来食

因为伊真中意

嘻隻服务员，号依芳其诸娘囝

稠稠固送礼物乞伊

我讲伊底呢来只满侈钱

依芳讲伊有回扣

现在依芳做事计

会变真粗心

蜀日都是共依强黏蜀堆

我准备遘月底乞辞赖去

我心礼想，依强啊依强

我工资乞汝只满悬

年终奖金我乞汝十万

汝固做回扣总款事计

我伓是月底辞汝

我现在就着辞汝

依强讲伓使我辞伊

伊自家会行

老板炒员工鱿鱼

我也可以炒老板鱿鱼

伊讲汝肯定会退悔其

讲完门摔囇就行出去

几个月日以后

三山复就开啰蜀间

电器公司

公司名字就号礼

太平洋电器公司

我看公司老板就是依强

嘻隻依芳就徛伊旁边

依强将我所有其客户

都带过去

仱现在我无订单

工人无钱趁都辞职

我现在伓是东方公司

我是塌方公司啊

我突然想遘

只几年我做电器

生意真化

依强肯定也想做

但是管理，技术，推销

伊都无经验

最关键伊无客户

所以依强来我公司应聘

也就是讲

依强是潜伏着

我身边其间谍啊

现在太平洋公司生意真化

伊其产品都漂洋过海

出口遘米国去

我想水能载舟亦能覆舟

我希望底日伊其船

着太平洋会摆冷覆去

我现在只能

总款安慰我 自家