我是麦利和(福州语微小说)

我是Maclay

我俪总款讲

估计无几隻侬会八我

但是我俪讲我是麦利和

我估计对福州方言

对福州基督教历史

有了解其侬

应该就有听过我其名字

汝讲无绽，我就是编

《榕腔注音字典》其麦利和

我昨暝晡去孔夫子

旧书网去跞

我看见现在网上也有卖

福州话字典

盗版其十把廿块

正版其两三百块

但是我估计汝都想儥遘

我编其嘻本字典卖偌夥钱

我让汝猜十回

估计汝也猜儥着

因为我自家都看凝去

8000块，汝看无绽

我去数啰数有几粒零

一二三，确实是八千块

我估计无侬买

会买其侬

估计也是公家其侬

譬如讲大学学校

或者爱好收藏其侬

反正我自家是儥去买其

因为伊是我编其

所以都着我头脑礼

并且我现在办公室礼

就有蜀本

想当初出版只本字典

我固送乞侬真侈本

我是1848年4月12号

来遘福州其

我溪势会记只满清楚哩

因为我有写日记其习惯

我是米国侬

我蜀厝都是信基督教其

我公我爸都是牧师

受伊两隻侬影响

我也做啰蜀隻牧师

因为我见觉做牧师

会受侬尊重

但是我想做牧师

我其实固有蜀芘

真大其兴趣或者讲目的

就是想去世界各地看蜀看

因为我做细就真

爱看《马可波罗游记》

我想也像马可波罗逢款

去七处旅游，我见觉

总款人生乍有意义

也真有味

做牧师做传教士

就有可能出国

我来福州之后

我就八着赶紧学福州话

因为福州侬讲其话

我听儥会意

我传福音

福州侬也听儥会意

许辰候我着仓山天安堂讲道

我讲道辰候，都是我讲蜀段

仱告会八英文其福州侬

翻译出来乞各侬听

但是伊翻译会准儥准

我就儥八唠

因为如果翻译绽去

天父肯定是儥欢喜其

无一定会告魔鬼

带汝去地府去参观囇

所以我希望我可以直接

使福州话来讲道

当时也无手机

也无翻译软件

所以我只能蜀字蜀字看

蜀句蜀句学

我先讨来《戚林八音》看

但是看仂行

我头就看昏去

目睭看眩去

我想我固是着生活中去学

譬如讲早头碰着福州侬

伊都是问汝食去未

我就着问嚽是什乇意思

伊讲是eat a meal

但是伊真正其意思共

Good morning差罔多

是蜀种礼貌是拍招呼

但是汝俪问

溪势会讲食去未

伓是讲拉去未

伊也讲儥清楚

但我慢慢观察发现

因为真侈福州侬

(当时福州侬固俪有25万)

都是食儥饱啊

所以伊最关心其

就是今旦会食饱儥

所以我着教堂除啰送书讲道

碰着做年做节，特别是灾年

我固送食其乇乞福州侬

所以福州侬见觉

我传其总款福音野好

因为来教堂会认真侈字

会八真侈人生其道理

固有侬送汝米面

所以来教堂其罔变罔侈去

因为汝去拜菩萨拜祖宗

都着烧香，固着供好食其乇

仱基督教就真简单

就是汝稠稠祷告

多做好事无做呆事

就会使了

有蜀回

有侬请我去伊厝礼客遛

伊告我食蜀种饮料

我问嚽是什乇

伊讲是茶

我仱就复学礼食茶

我开头儥习惯

因为伊有仂囝苦味

主侬就讲食茶会帮助消化

最大其好处是会提神醒脑

以后茶就传遘米国共欧洲

仱各侬都喜欢食茶

特别是福建武夷山其红茶

以后福州侬复请我食

鱼丸，肉燕，佛跳墙等等

我见觉真好食

但是就是做真喫亏

简单其事计乞做真复杂去

儥像我食其三明治

就是两楞面包片

台中夹蜀楞肉

真简单，我对食无讲究

汝现在去纽约看

米国侬固是总款食其

因为天父都是告诉侬家讲

着去做事计

着去帮助有困难其侬

譬如讲去做田办工厂

或者像牛顿逢款做研究

都会使其

伓通将时间精力都浪费着食上

以后我乍会八

嚽也是有钱侬乍总款食

一般老百姓食也真简单

蜀碗饭配蜀楞咸带鱼

或者两粒咸橄榄就当蜀顿饭唠

我都是随身带礼薄薄

将碰着其事计记落来

食饭未，茶，茶箬

鱼丸，肉燕，带鱼，橄榄

并且标上国际拼音

仱这辰候就使着《戚林八音》唠

因为我需要福州话文字

我着方言文字后首

都写有英文解释

方便自家其学习

所以我底呢有什乇语言天赋噜

就是我有需要，我自家肯学啊

仱就有真侈外国侬

都来福州做生意

伊各侬礼拜日

也都来天安堂做礼拜

伊听见我会讲福州话

仱都是请教我

我开头都耐心乞伊解释

但是请教其侬侈去

我应付儥过

再加礼我记其福州话其薄薄

都有十把本唠

所以我就想编蜀本

福州话英文字典

我就共摩怜牧师讲

伊讲正是正是，我对手汝编

印刷是无问题其

因为着仓山有蜀间

美华印刷厂

专门是印《圣经》其

但是我讲

乞我印福州话字典

伊就讲有困难

因为总部乞其钱

除啰乞各侬发薪水印《圣经》

已经无剩偌夥钱

我就拍报告乞总部

总部讲我现在也无钱啊

仱我就想遘蜀芘办法

告做生意其侬赞助

结果伊各侬都讲无问题

因为伊各侬着上下杭逢呢

蜀边收购中国其特产

丝绸，茶箬，脱胎漆器

牛角梳，木画，纸伞等等。

蜀边也卖香料、红木，铝等等

所以会趁真侈钱

但是做生意

就着共福州侬拍交道

所以遘1870年就出版啰

我共摩怜牧师合编其

《榕腔注音字典》

因为我是使国际拼音

所以标其音是真准其

以后来福州其外国侬

俪想学福州话

都着买只本字典

以后总部复派我

去韩国日本传福音

韩国侬真加三码

伊将由中国学其乇

都讲是伊自家其

譬如五月节八月中秋

甚至春节都讲是伊发明其

我讲我着福州屈真侈年

福州有两千几年历史

福州何必躃汝韩国

躃只远去学做节啊

嚽是讲儥通其

以后我复去日本

但是日本侬对基督教真抵触

都是将传教士逐出去

所以我见觉固是

中国侬比较好

譬如讲福州侬

伊信观音菩萨

但是灶公灶妈伊也信

甚至猴中王也相信

厝礼祖宗伊也拜

蜀蔸大榕树伊见觉是神

甚至碰着老蛇伊也跪

有蜀回着山礼拉尿

我看见蜀隻侬嘴礼固念

心肝搭搭伓惊菩萨

我就讲嚽都是上帝创造其乇

汝真正应该拜其俪使蜀隻侬

就是上帝天父

但是福州侬真奇怪

碰着事计，无管红白

伊拜观音菩萨

拜太上老君

拜上帝天父

伊见觉仂滴无矛盾

我有劝过

但是伊听儥裡

但是另蜀方面也看出

福州侬包容心真大

总其来讲

我对福州其印象是最好其

至少伊无迫害我

我回遘米国以后

我复写啰蜀本书

《生活在中国人之中》

其实就是根据我其日记编其

但是各侬估计也看儥着

因为现在已经无出版唠

网礼有卖，但是卖真贵

蜀本书千五块

也是生惊死侬

其实我也有着

福州话微信群礼

只不过我换蜀芘名字

我见觉这群礼恰冷清去

无几隻侬讲话

嚽说明什乇问题

就是裡势真侈侬

无需要着学福州话

像总款侬

我借中国侬其

蜀芘成语刺溪囇

就是号礼：叶公好龙

不过我看见群礼嘻隻K先生

编译其歌词，写其小说做真好

唱歌其侬也唱真好听

我同意K先生其观点

发展是对福州话最好其保护

仱今旦只能共各侬攀讲遘只呢

因为我寝寝接遘天父其电话

天父现在也有手机啊

伊讲赶紧转来

告我负责开发蜀芘

福州话软件

就是无管汝讲什乇话

汝语音输裡去

出其就是福州话

反过来汝讲福州话

汝选择底种话

伊就输出底种话

嚽也是对福州话其发展

天父讲总款侬家就可以

着手机网络悬顶传福音唠

伓使满世躃