我其先生(福州语微小说)

鲁迅先生有写过

蜀篇散文

名字号礼《藤野先生》

我见觉日本侬名字真有味

松本，龟田，野村，藤野先生

我见觉日本侬就像

都是乡下侬

鲁迅先生写伊先生

是着伊出名以后

侬俪出名

写什乇都会卖来钱

但是可惜

有侬去问藤野先生

先生讲，什乇，鲁迅

我无印象

说明先生一般都

儥记礼学生

因为学生过侈去

但是学生往往

都会记礼先生

特别是特别其先生

但我写《我其先生》

是希望我底日会出名

因为侬家一生中

有三分之一时间

都是共先生屈蜀堆其

如果讲学校像监牢

我见觉先生就是

监牢其看守

学生就像是犯侬

但是我真奇怪

全中国只满侈侬

坐啰廿几年其监牢

但是都无蜀隻侬承认

伊坐过监牢

反正我做细就发现

学校是监牢

我一直想躃出 监牢

虽然我会碰着

各种各式其先生

但是我对先生

基本无什乇好感

因为首先我着日日

去做先生布置其作业

都做半暝三更去

甚至寒暑假也无法

让我好好客遛囇

蜀看见嘻满侈作业

就像猴中王听见唐僧

念其紧箍咒逢款，头真疼

都做怨命去

所以无蜀回寒暑假作业

我有做完成其

仱先生就讲作业无做完

不能缴学费不能上斋

我想我固想去礼

所以我都是告我妈去交学费

所以我对先生

都是记礼伊其呆

儥记伊其好

嚽就像饲鸡

汝掏蜀把米蜀把粟乞伊食

鸡是会感谢汝

但是汝俪像连江鸡逢款

无管汝愿意伓愿意

硬筑，汝讲鸡会感谢汝儥

我对先生感觉也是总款

我见觉先生大多数

都是筑鸡筑胲

我总款讲自家先生

嚽说明蜀芘问题

就是我伓是蜀隻好学生

甚至伓是蜀隻好侬

着一年级辰候

儥八溪势，有蜀日

我其先生，伊号子奋

会踢我蜀股川

伊是四个眼

虽然眼镜真厚

但是就是总款

我固是也看见伊肝火真熧

但是关键我儥八

伊溪势肝火只满熧

估计伊做先生

都做遘无耐烦去

因为身边都是

伓听嘴其伲囝

伊最喜欢其事计

我想是吹哔哔响

估计这辰候

是伊最舒畅其辰候

就像鸡角早头告叫

像唱歌复像透气

鸡角头红红

鸡毛长长复漂亮

就像英国绅士逢款

仱鸡母都清醒去

都真羡慕伊

开始生卵比赛

但是根据我其印象

无底隻女其先生

会羡慕有，围伊边兜

围伊边兜其都是

伊讨厌学生

所以伊其兴奋是带水其

所以伊只能号礼水奋

子奋先生一直带我只班

带五年，遘我小学毕业

有蜀回，伊教拼音a o ü

我真讨厌拼音

虽然讲我现在拍字

都是使拼音

但是当时我见觉拼音

就像锯锯若会锯礼我神经

因为我头脑乞伊直透锯

所以我写出其拼音字母

笔划也都是带齿齿，像锯若

我有讲过着我学校

有真侈两个声同学

两个声厝礼条件

一般都比侬家农村学生好

所以伊都看儥起侬家

都是背后告侬家是地瓜

因为侬家每顿着食番薯

或者将番薯米掏调饭礼食

但是无办法啊

伊侬就是食其好颂其好

并且也比侬家

三山本土侬生得好生得俊

着四年级辰候

我突然就喜欢蜀隻

两个声诸娘囝

伊爱颂红红其衣裳

名字号礼迎春

伊就坐我前首

仱总款上堂辰候

先生讲什乇

我就都无听见去

现在侬估计都儥八

以前买什乇都着使票

伓是汝有钱就会使其

买米着有粮票

买肉着有肉票

买手表骹踏车衣裳车

也着有票

并且轮着汝乍有

仱有蜀回我爸就轮遘

蜀张骹踏车票

因为我爸去城里上班

着搭车，搭车就着使钱啊

所以我妈就想

乞我爸买蜀架骹踏车

但是厝礼复无钱

仱我妈就将粟卖两担赖去

就为买骹踏车

结果做遘日日食番薯

都食遘变成番薯戆去

我现在看见番薯就惊去

仱有蜀日

先生行裡真严肃讲

只学期学费未缴其学生

都乞我徛后墙壁逢呢

结果我共五六隻同学

都搦礼徛堂

我想我作业无做完

汝告我徛堂我无话讲

嚽也告我徛堂

完全是侮辱我人格

我见觉同学

都着礼看我

我特别无办法接受

我看见迎春目睭头就覆落

因为厝礼买骹踏车无钱

所以俪缴礼书费学费未缴

本底总款其事计

做先生其应该着私下

共学生讲囇就会使

应该照顾穷其学生其面子

嚽是做先生起码其修养

因为当时我也有12岁唠

也有自尊心唠

并且我当时固喜欢蜀隻

两个声诸娘囝

虽然伊是看儥上我

但是我见觉我固有

喜欢伊权利

但是乞先生总款做囇

就像我是犯侬掏游街示众

我变成真自卑去

我甚至连爱伊其权利

也乞剥夺去

我想汝嚽是什乇先生

所以以后我无考上大学

我只能七处做粗工

甚至我现在固是单身哥

我见觉都是我先生造成其

因为就是伊告诉我

穷，是我其原罪

以后我接我爸其班

去工厂做钳工

但是工厂复破产去

我开始做卖卤菜其生意

也趁仂囝钱

但是因为我无学历

所以固是乞侬看儥起

有蜀回先生带礼伲囝

来我只呢买猪骹

我讲先生是汝啊

汝好，汝好

我这猪骹无收汝钱

但是我坎猪骹辰候

力使真大，砰砰叫

砧板都乞我卜坎对爿去

先生都看惊去，赶紧走去

我心礼想，汝就是有钱

我都伓卖乞汝

我想底日墿中再碰着伊

我一定装礼无看见

但是可惜我以后

再无看见伊

我妈讲伊底日底日看见

子奋先生着底呢

我就想我估计

我共水奋缘分已了

就是行面对面

互相也是儥看见

先生死辰候我无着厝

就是着厝我也是儥去看伊

但是有蜀回清明节

我去乞我妈硩纸

我行陵园礼

我突然看见我先生其墓

我就掏蜀千万烧乞伊

我讲汝反正俪八钱

这蜀千万应该会让汝

使遘明年暝清明节

我就是总款无法忘记

我其先生