人不贩我我不贩人(福州语微小说)

各侬应该都有看见

报纸电视希望裡势报道其

拐卖妇女伲囝其事计

看许拐带实在丧尽天良

真侈爸奶为啰讨着伲囝

钱都使澈家贿都卖光

满世界去讨

固是无讨着

因为拐带都是将

伲囝妇女都有卖遘

真偏僻其地方

但是我想儥遘其是

我有蜀日也乞侬拐去

更更想儥遘其是

我自家也做蜀回拐带

只件事计发生着廿年以前

许辰候我乍18岁

我记真清楚

因为是我高考完三工

因为厝礼真困难

我妈只能让我第读书

诸娘囝读嘻满侈书

无乇使，对象都伓好讨

其实我对读书也无兴趣

所以我有闲都是

对手我妈做田

插秧薅草割粙我都会

所以我体质真好

我着学校跳高比赛

每回都是第一名

但是我爸固是希望我

会读偌夥读偌夥

免礼以后怪伊

两样心

所以我高考我做样式其

我会八考儥上

所以高考完

就共同村蜀隻诸娘囝

准备去三山讨工作

我同学讲伊有亲戚着三山

如果讨儥着

可以暂时住伊亲戚厝礼

我出发其路程其总款其

先坐大巴遘火车站

再坐火车去三山

但是遘三山以后

我也无讨着

我喜欢其工作

屈几工以后

我伓想麻烦同学亲戚

所以我讲我先转厝

当我遘火车站

看见买票地方侬尅侬

并且无秩序

我最惊总款情况

所以我就赶紧去摸钱包

乍发现钱包身份证都拍无去

我估计是着公交车悬顶

我买票以后

钱包囥底呢就暴露去

结果乞贼囝拔马拔去

仱我就坐售票处大啼

许辰候我也无手机

我身礼也无钱

也无想坐车去同学厝礼

俪想溪势自家今旦只满背

我是头头回

去只满远其地方

透底也无碰着总款其事计

所以当时我其感觉就是

天昏地暗

就着这辰候我听见

有蜀隻女界其声音

依妹，汝溪势去

声音真好听

我头岳看见蜀隻女界

伊有30上岁

侬生白白俊俊

衣裳也颂真漂亮

像蜀隻好侬

我讲我钱包乞侬偷去

伊问我去底呢

我讲我转龙溪

伊讲也巧伊共我蜀墿

伊讲伓使惊

我替汝买票

我就真欢喜

我讲我一定将钱填汝

伊讲无要紧，渣渣钱

仱我就共伊坐火车礼

伊问我来三山做什乇

厝礼固有什乇侬

我一一都共伊讲

伊也掏身份证乞我看

确实是我嘻边侬

只不过隔蜀芘县其

仱我共伊罔讲罔粘牢

儥八其侬故难

我共伊是姐妹

落车辰候天已经半晡

大巴这辰候也无车

我讲火车站附近有宾馆

侬家去宾馆住蜀晡

明旦再转厝

伊讲伓使

伊讲伊舅就住附近

去伊舅厝礼就会使唠

我想会省落住宾馆其钱也好

所以就同意去

但是接落其事计

就引起我怀疑啰

伊拦下蜀架摩托车

带我去伊舅厝

但是我发现摩托车行其墿

罔行罔僻去

都躃农村去

周围伓是山就是田

但是我也无办法

因为我身礼无钱

差罔多半点钟以后

来遘村口再由村口

来遘蜀间厝门口

我看见蜀只老伯

伊讲兹隻就是伊舅

我看见伊两隻讲话

鬼鬼祟祟

我就见觉不妙

伊告我去房里休息

伊讲我俪想讨工作

‌伊村礼有蜀隻老板

开茶厂，正好着招工，

等两下带我去讨伊

然后就将门带上去

我再想去开门

发现门外首已经锁上去唠

我头脑就想起

拐卖妇女其电视画面

我想呆去，我碰着拐带

蒋样走去，也想儥出办法

我想啼也无敢啼

这辰候我透过门缝看见

伊舅带裡蜀隻男界

差罔多卜50岁

门拍开，嘻隻男界

真注意看啰看我

然后门复关去

我耳拔长长就听见

女界共嘻隻男界讲

5千固嫌贵，诸娘囝啊

固未结婚啊

汝先交两千做定金

现在天未暗儥安全

天暗以后我乞汝送去

我想报警，但是蒋样报警

无电话也无手机

关键我也无证据

伊两隻都是拐带

希望伊两隻会良心发现

是无可能其

仱蒋做

只能见机行事

我想

所以我假装无事计

伊告我休息我就休息

伊告我食饭我就食饭

我固食饱饱喏

天暗以后我固特意问伊

汝讲其嘻隻老板着底呢噜

仱伊两隻对我就安心去

也无逢款嘻满警惕

天暗以后嘻隻女界

就带礼我去讨老板

我想墿中走去

但是我会惊躃儥过伊

因为伊蜀告

村礼估计也有伊其侬

所以我只能头覆礼

差罔多行廿分钟以后

来遘蜀间破厝门口

开门其就是嘻隻男界

蜀裡门伊就将门关起去

我会八伊就是买主

但是我装礼都无注意

我问伊茶厂其事计

我看见伊掏蜀叠钱乞女界

我突然就讲，我嘴真渴

我想食开水

讲完我就行裡灶前

伊两隻固未反应过来

我就手掏礼蜀把菜刀

我讲汝两隻退出去

然后我档着大门口

伊两隻看见我有刀

也无敢过来

我对嘻隻女界讲

想儥遘汝是蜀隻拐带

正丧尽天良

汝，我对男界讲

汝会八买卖人口是犯法其儥

伊两隻都无敢讲话

我对嘻隻男界讲

汝就是买我

汝得遘我其侬

也得儥着我其心

我会想方设法走去

并且我会去公安局礼告汝

总款吧，我共交换囇

我将兹隻女界卖乞汝

伊卖汝五千

我俪卖汝五百

伊是拐带

伊无敢走，也无敢告

伊俪去告就是自投罗网

汝看蒋其

听我总款讲

男界就将就将女界其钱

都夺过来

再将女界拖裡房里

门关上

抾五百乞我

我掏完钱

拈礼菜刀马上就躃去

我听见后首嘻隻女界

大啼大告其声音

我就坐上摩托车遘火车站

我复讨蜀架的士

连暝赶转厝

我将碰着拐带其事计

共我妈讲

我妈第二早就带我

去公安局报警

真快公安局就将男界女界

固有嘻隻什乇舅都搦着

但是想儥遘是

我也乞公安局搦去

因为嘻隻女界讲

我是拐带

将伊卖乞嘻隻男界

并且男界强奸伊

仱法院就判我三年

我就不服，七处去告

报纸新闻电视

都报道啰我其事计

逢侬都讲

我也厉害也机智

碰着拐带

最后将拐带卖赖去

可以讲天下奇闻

仱就有蜀隻律师

听见总款事计就讲

伊免费替我拍官司

我讲人不贩我我不贩人

最后中级法院

因为舆论其压力

判我是正当防卫

无罪释放

我所讲其蜀句都无假

儥相信汝可以

去翻以前其 报纸