熟悉其生分侬(福州语微小说)

去民政局墿中

伊有问我

汝想好未

我也无应伊

遘民政局门口

伊复停下骹步

熏掏蜀条出来

点着去，看礼天空

复问我汝想好未

我讲无什乇好想其唠

我心礼想汝直透问

汝到底自家想好未

伊是蜀隻医生

我是蜀隻护士

因为工作其关系

所以稠稠共伊有接触

但是伊乞我其感觉

就是真严肃

每回伊经过我其窗口

我都爱金金目看礼伊

伊真像也有注意遘我

但是我共伊

也俪讲礼工作上其话

各侬去医院都有总款其感觉

就是医生都是真严肃其

因为医生无办法不严肃

面对嘻满侈愁苦病侬

医生只能保持总款表情

并且严肃也是蜀种自我保护

相反做护士其

因为都是诸娘囝

诸娘囝屈蜀堆爱讲话

所以固会看见笑面

仱护士长看出我其心思

就讲俪无我乞介绍囇

我头啄啰啄，也算答应去

总款我共伊就恋爱去

因为都敆蜀间医院

所以我见觉

也无什乇好了解其

我就是贪伊侬生真俊

悬悬喏，戴礼眼睛

虽然严肃，但也见觉

文质彬彬

伊儥爱讲话

就是谈恋爱其辰候

每回也都是我讨话题

我讲蜀句伊应蜀句

碰着节日，譬如讲情人节

520，七月七夕

伊也像别隻男界喏

会买礼物送我

有其是玫瑰也有是卵糕

我印象最深是有蜀回

伊送我蜀架苹果手机

因为伊自家都俪使小米

所以我真感动

仱真快我共伊就结婚去

蜀年以后就有啰

蜀隻丈夫囝

但是矛盾就是

由这辰候开始啰

因为伊工作表现出色

伊现在已经是主治医生

事计是总款其

有蜀隻侬得蜀种怪病

经病侬就去上海北京

大医院看病

几隻专家都讲

着使四五万乍有办法治好

仱病侬惊真很

所以固是转来侬家三山市

仱经过侬介绍讨着伊

结果伊俪使蜀千块

病就治好去

因为只件事计伊固上啰

侬家其《三山日报》

因为现在侬对医院印象真差

都是讲医院为啰趁钱

告汝七检查八检查

蜀只简单其感冒都让汝使千把

但是报纸讲伊是对症下药

无开什乇大药方病就治好去

是侬家三山医生学习好榜样

所以伊就提为主治医生

虽然工资也有加仂囝

虽然伊是各侬学习其好榜样

但是真像对我共伊其爱情

无什乇帮助

相反我俪见觉

我共伊罔离罔远去

平常伓使讲唠

礼拜日固着去值班

现在伊固有仂囝应酬

因为医院着采购药品

医疗器械等等

所以就有侬请伊食饭食酒

并且总款其应酬

也无办法拒绝

所以每日伊转来

侬都真蒻，倒床就睏

本底就儥爱讲话

所以现在我想共伊攀讲

伊都无力共我讲话

并且夫妻之间

爱爱其逢款事计

也真少做去

伊蜀心扑着工作上

有闲都是看资料写论文

伊讲着评职称

但是我共伊相反

我是比较喜欢浪漫其侬

我爱看小说，爱写诗

但是由伲囝出世以后

我根本无时间看书

甚至伓惊汝笑

我连洗衣裳上卫生间其时间

都着事先想好

侬都讲有几种职业其诸娘囝

儥适合做老妈

其中排头头名就是护士

因为伊将时间精力

都奉献乞病侬

所以转厝

伊根本就无力奉献什乇

因为伊就像手机无电逢款

都拍儥开去

仱伊侬真蒻我也无力

伲囝放礼啼

衣裳着洗，卫生着做

菜着买，也着有侬去煮

总不能日日告外卖啊

但是伊乞我其感觉就是

供囝，伺候丈夫

嚽都是女界应该做其

我就真受气

共伊冤家

伊也伓讲话

所以会变成无话讲

蜀讲话就是冤家

蜀冤家就是冷战

我看儥着

总款日子底日会出头

我其诗共远方着底呢

我不能再总款共伊过落去

浪费我其青春我生命

所以我提出离婚

伊也无讲话

民政局其侬也无为难我两隻

因为财产蜀侬蜀半

伲囝伊讲告伊妈来带

所以手续真快都办清楚去

行出民政局

我看礼悬悬其蓝天

侬突然特别轻松

但是复有蜀种

空虚其感觉

蜀墿中也无讲话

伊俪讲我妈俪做手术

伊可以帮我讨侬

并且讲手术费伊出

我讲我先转厝

汝去幼儿园接伲囝

也让汝体会囇

每日带囝去感觉

我将卜带其乇都类好

但是我行半墿中复想起

有蜀双鞋我未掏

所以我复回转头转来

我遘门口辰候

我突然听见

伊着裡势啼嘛

我透底我无看见伊啼嘛着

并且伊共伲囝讲

依妈伓挃侬家唠

我目滓突然也盪落来

我一直见觉伊儥理解我

但是我现在乍发现

我也根本儥理解伊

对我来讲

伊突然会变成蜀隻

熟悉其生分侬