平直(福州语微小说)

事计是总款其

嘻日早头我去上班

我遘蜀隻墿口辰候

我看见前首蜀隻依伯

突然眩倒地兜

我本能其反应

就是刹车去扶

但是我头脑礼

就有蜀只声音响起

伓是老侬变呆去

是呆侬变老去

但是我固是将车停落

我看啰看头顶其摄像头

我复看啰看旁边蜀间药店

裡势有两隻卖药其依妹

我讲汝两隻也看见唠

伓是我碰其啊

伊两隻头啄啰涿

我想如果俪蜀隻

伊肯定讲无看见

因为侬都讲

多一事不如少一事

所以有辰候数量也真关键

量变会遘质变

我固儥安心

我看见墿口固徛蜀隻

维持秩序其师傅

伊手腕戴礼红袖章

我讲师傅我现在

带依伯去医院

汝乞我证明囇

伓是我碰其

师傅头也啄啰啄

所以讲如果伊无戴红袖章

伊肯定也儥乞我证明其

我有想告120其

但是我想120蜀来蜀去

会耽误时间

无一定依伯半墿会断气去

所以我决定直接

带依伯去医院

医院讲依伯着抢救

告我钱先缴700

我想我做好事固告我掏钱

我就真退悔

但是我复满行去

我手掏依伯身礼摸啰摸

摸遘蜀架手机

固有400块钱

400无遘，医院讲

我头脑灵光一现

我将依伯其手指

掏手机碰囇

指纹解锁

手机拍开去

我按照最近其通讯录

就拍过去

接电话其是蜀隻依姐

我讲依伯侬眩地兜

汝快来医院缴钱抢救

我就复掏300乞医院

我讲，赶紧抢救吧

仱我就拍电话乞我部长

我讲我送蜀隻依伯去医院礼

部长讲汝迟到就是迟到

讨总款其理由

我讲蜀隻依伯眩倒地兜

伊讲我无察汝

反正迟到扣100

我讲，但是我儥八蒋样讲唠

固好嘻隻依姐马上赶遘

是依伯诸娘囝

伊讲真感谢我

讲留蜀只电话

下日请我食饭

总款我就赶紧躃去上班

过几工，依姐拍电话乞我

伊讲依伯住院观察几工

现在出院唠

伊讲告我来饭店聚啰聚

我想儥遘其是

迎接我其除啰

依伯共嘻隻依姐

固有记者，对我大夹相

依姐钱掏蜀千感谢我

我俪收300

剩啰都掏填伊

总款我做好侬好事其事计

就变成先进事迹

上啰电视台

原来依姐着电视台工作

仱三山市政府讲

现在做好事其侬

罔变罔少去

侬家着表彰总款其青年哥

所以乞我2000块奖励

固告我讲当时蒋样想其

我自然不能讲我退悔

我着配合电视台

我讲嚽是我应该做其

以后碰着总款事计

我固是会去做

仱我真欢喜

我就拍电话告我女朋友

讲今晡侬家去食饭

但是想儥遘我女朋友讲

伊见觉侬家儥适合

侬家固是分开吧

我讲溪势去

伊讲我扶其依伯也是伊依伯

依伯讲我侬是好

就是恰平直

会去做扶老侬总款闲事

伊讲伊姐也讲

像我总款其平直骹

以后是无什乇发展前途

因为侬恰平直

所以我就失恋去

有媒侬介绍我去看亲

诸娘囝蜀看见是我

每蜀隻都讲儥适合

因为现在全三山侬

都认识我唠

我肝火真熧

拍电话乞依伯

伊两隻讲无讲什乇啊

就是讲我是好侬侬真平直啊

我公司看见政府表彰我

伊也着表示囇

迟到钱还我

另外固奖励我1000

并且固提拔我做部长助理

仱部长就将伊伓爱察其事计

都告我去做

我乍发现去管理侬

着勾心斗角

比去扶老侬复杂真侈

稠稠自家受气

我想依伯讲无绽

我是恰平直去

但是现在最关键其是

我着马上想离开三山市

无其啊

我连老妈

都无块讨去