先生先生(福州语微小说)

我是蜀隻先生

但是我真讨厌先生

各侬都八侬家三山话裡势

有蜀芘真出名童谣

先生先生面觑鼓山

爱食肉骨共犬相争

就是刺溪先生其

说明伓啻我讨厌先生

全三山其侬

有做过学生其侬

都讨厌先生

我旧底做学生辰候

也真爱唱这歌谣

我着不断唱

我着早头爬起就唱

我乍有办法去斋

因为我都怒死我先生去

先生都讲伊偌夥辛苦

我讲正是

布置嘻满侈作业

去讨刁钻古怪其题目

告我做

是有遘辛苦其

仱只隻先生布置几题

嘻隻先生布置几题

我作业着做遘半暝囝

汝讲底侬辛苦

有蜀回做完作业

我着下底写蜀段话

我讲先生，汝讲只满快

汝讲只满侈

我做都儥赴

也无法消化

关键汝讲其乇

我都使儥着

我讲汝总款赶

就像煮饭

水是滚去饭像熟去

其实是半生熟

甚至下底已经臭烧巴去

我想伊应该

着讨我攀讲乍是啊

但是伊伓是

伊个郎堂也伓上课

着礼直透刺溪我

伊讲有蜀隻磐石其学生

俪差礼指名道姓

伊讲无总款赶

蒋样实现国家其现代化

但是伊堂也伓上

就着刺溪我

说明伊根本就儥关心

侬家国家其现代化

伊就是我英语先生

我记真定

我以后看见伊

我都装礼无看见

所以我见觉

侬家真侈先生存在其目的

就是为啰让学生学什乇

讨厌什乇

所以现在侬家国家

离发达国家差真远

所以有钱侬都讲自家伲囝

都送乞米国去读书

有关讨厌先生其事计真侈

今旦我先讲遘只呢

有闲共各侬再攀讲

我所以去做先生

就是想证明我可以

比我其先生做更好

我卜做先生其先生

我现在是蜀隻语文先生

我上堂共别侬先生儥蜀样

我都是讲故事

将课本裡势其

小说诗歌散文

都变成故事

因为各侬会八

我对文学真兴趣

我写诗写小说编译歌词

我着三山名气真大

我所以喜欢语文

就是因为旧底我爸

真爱共我讲故事

我有今旦其成就

我根本无感谢我其先生

虽然我爸也是蜀隻先生

固有三山市作家协会

告我申请做会员

我讲有什乇要求无

伊讲无什乇要求

俪使汝钱缴五千

我讲有什乇好处无

伊讲总款汝就是

正式其作家唠

我可以发蜀芘证书乞汝

我讲快死拔透去

汝看汝裡势侬都写

什乇把把小说

汝就是想我钱

我儥共乞汝骗

所以我现在固是蜀隻

民间作家

但我学生爱听我讲课

我就满足唠

我见觉我是真正关心

国家现代化其侬

碰着什乇语法分析

我都直接跳过去

我讲我伓讲

我讲无蜀隻作家

是因为语法好

会变成作家其

语文课就是让学生

会八蒋样写文章就会使了

语法其事计各侬自家看

儥清楚其着微信礼问我

但是俪考语法

汝俪考儥好

汝伓通怪我

因为是汝自家无好好看

结果学生赶紧自家去自学

仱也有碰着学生侬真蒻其辰候

譬如讲语文课排第四堂

有辰候天真热，侬都爱睶

这辰候讲课其效果就比较差

我就讲外首有

蜀隻和尚固有两隻美女

仱马上学生就都清醒去

金金目耳拔长长觑礼我

希望听我继续讲落去

但是我根本无世落讲和尚美女

我复回遘课本其内容

我其目的是为啰

让学生清醒蜀下

但总款其笑话

直透讲就无效果去

但是我伓惊

因为现在抖音悬顶

有真侈笑话

汝讨都讨儥完

估计学生，家长

最关心其就是作文

但是我讲写作文是最简单其

就是去写感动汝其乇

伓是讲今旦是五一节啊

明旦是青年节啊

汝就去像扼牙膏逢款

硬扼仂囝乇出来

我讲汝着写感动汝其乇

譬如讲汝看见蜀头蒲蝇

或者看见两隻侬相拍

汝见觉真有味，汝就可以写

但是最后汝着想方设法

共五一节青年节挂上钩

作文就是总款写其

仱就有家长去校长逢呢告状

校长讨我

我讲我教学方法

汝伓使担心

俪使考书来证明

然后我就请假去

因为我都带身喜

七个月日唠

遘我月利做完头头日上班

我行裡课堂

我学生突然都围过来

复送鲜花复送礼物乞我

黑板上固写礼

祝先生生日快乐

我真感动，目滓都逿落来

因为我自家都儥记

今旦是我生日

说明学生真喜欢我

说明学生儥讨厌我

最关键其是

只回着三山市统考中

我班其语文成绩

是头头名

其他什乇数学化学物理

考什乇款我都无察伊

因为侬都是自私其

反正现在我可以对校长讲

我是先生其先生唠

仱肯定有侬讲

嚽都是汝自家编其

我讲汝讲无绽

我可以肯定喏告诉汝

确实嚽都是我编其

各侬爱看就会使唠