爱之病(福州语微小说)

我见觉最近我丈夫

对我真冷淡

蜀礼拜半个月日

也无碰我蜀下

我心礼就儥舒畅

我就问伊

汝最近溪势都无精神噜

伊讲真忙啊

我儥相信伊其话

我就拍伊同事其电话

伊同事讲，正是啊

现在公司卜出蜀种新其机器

讲国庆节掏北京参加展览

所以每日都着礼画图

礼拜日固着加班

我听完乍见觉安心仂囝

但是过仂行烦恼复来讨我唠

如果伊两隻努礼骗我哩

也有总款可能啊

我想暝晡乞伊拍电话

但是伊俪讲伊着加班

固是问儥出什乇

我想去问伊领导

但是我见觉固是伓问其好

因为领导一般比较聪明

伊一定会想汝两隻老公妈

什是感情出啰什乇问题

烦恼直透讨我

说明什乇问题哩

SM我伓是真聪明

就是我食恰饱恰闲去

我会八男界真少共别隻男界讲

伊共伊老妈眠床上其事计

其中其原因我估计

着伊讲其辰候

伊会见觉别隻男界

会想象伊老妈其身体

嚽相当于就乞自家戴蜀顶绿帽

但是女界之间就不同

女界逢乇都讲

甚至都讲伊丈夫爱摸伊底泥地方

说明女界是比较大公无私其

将丈夫都掏出来分享

所以今旦我就将我闺蜜约出来

去蜀间新开其奶茶店礼攀讲

仱歠礼歠礼，我烦恼复来讨我

我复讲遘我丈夫其事计

我闺蜜就安慰我讲

汝无七想八想吧，汝食饱恰闲去

伊无讲我单倒无注意啊

伊讲这话，我突然想起现在

真流行其蜀句话

防火防盗防闺蜜

我就讲我会八什乇原因唠

什乇原因，我闺蜜问

仱下底其话都是我编其

我讲今旦我去翻伊其书

因为伊爱将

伊认为重要其乇夹书礼

我发现蜀张检验单

裡势有真侈缩写其英文

其中有HIV

我上网查啰查

HIV是艾滋病

估计伊会惊传染乞我

复满共我讲

所以只能冷淡我

我话固未讲完

我闺蜜就吐去

我讲溪势去

伊讲无事计

我讲什使我陪汝去医院

伓使伓使，我想起蜀件事计

我着赶紧转去咧

讲完伊就走去

我心礼想，哼

今晡看我蒋样修理汝