细姨(福州语微小说)

我老妈最嫩其依妹

也就是我细姨

最近失恋

工作也做拍无去

讲去讨

但是伊讲也无讨着

伊讲厝租都缴儥起去

我老妈就安慰伊

讲来我厝礼先住蜀段

别乇都好

就是侬特别懒

早头会睏遘八九点

我暝晡转厝

故难伊会对手煮菜煮饭

想儥遘伊覭房里看电脑

我就真受气

但我老妈讲

伊现在真受怪

汝着理解仂囝

我讲起码其礼貌都儥八

固着告我理解

我实在也无奈无语去

但有什乇办法哩

伊是我细姨啊

遘暝晡我看见伊

蜀个侬着礼刷抖音

我共我老妈讲

我去超市买乇

汝屈厝礼看伲囝读书

然后我共我细姨讲

汝蜀日遘晚敆厝礼

也着出去行蜀行

来，跟我去超市买乇

伊真欢喜

第二工

我讲依妹啊

我今晡共侬客

去酒店谈生意

我公司礼嘻隻

做公关其依妹病去

汝食酒真厉害，帮我囇

依妹真欢喜跟我出去

我老妈目睭翻啰翻

共我囝讲，只满简单题目

复做绽去唠

第三工

我讲依妹啊

我正好有两张别侬乞电影票

侬家去看电影吧

我老妈肝火真熧

伊讲我卜做什乇

我讲无啊

汝妹现在失恋无工作啊

蜀个侬真孤单啊

汝讲着照顾伊

我老妈也无讲话

第四工

我转厝俪看见我老妈

我讲汝妹哩

伊讲，逐出去唠

只满大了

仂滴事计也儥八

蜀日俪八客遛

只满懒