快乐人生(福州语微小说)

伊来其辰候

我已经着单位礼

已经做啰五年唠

所以我也算老员工唠

伊坐我后首

因为乍来

有真侈儥熟悉其地方

所以稠稠来请教我

兹只软件蒋样使

嘻种情况蒋样处理

有辰候我干脆带伊

去现场乍有办法讲清楚

为啰感谢我

伊稠稠都带礼

碎食其乇乞我

诸娘囝就是总款

嘴无停不歇

伓是着讲话就是着食乇

有蜀回加班遘卜10点

因为现在无论做什乇

老板都是急其

讲明旦图着画出来

汝就是加班遘半暝

伊也无察汝

所以老板一般血压都真悬

相反员工心理素质俪儥好

就着讨悬悬其大楼跳落去

我自家稠稠都有总款其想法

跳落去一切痛苦烦恼

就都解决去

但是我发现伊心理素质真好

我都无听伊有总款其想法

伊讲今晡固好有我帮伊

俪无图是画儥出也画儥完

伊讲请我去食烧烤

伊讲只间烧烤做真好

老板侬也真好疼

共我蜀样

我讲什乇共我蜀样

就是有问有应，伊讲

嚽是我头头回

共伊单独屈蜀堆

伊讲我有真侈优点

讲我真肯做做事计真认真

真有责任心真很食苦

然后伊问我对伊其印象

我讲汝侬真大框

也真聪明

固有就是 汝侬真漂亮

当我讲伊真漂亮其辰候

就暴露啰我对伊好感

伊马上就讲

汝有女朋友无

我讲暂时无

我可以做汝女朋友吗

想儥遘伊只满大胆

我无理由拒绝啊

就总款我共伊

就开始谈恋爱

并且无偌行伊告我

搬出宿舍去外首租厝住

我讲侬家乍认识三个月日啊

伊讲喜欢蜀隻侬就是

着共伊屈蜀堆生活

伊乞我看余秀华其嘻条诗

《穿过大半个中国去睡你》

我讲汝这思想野开放啊

开头其日子真甜蜜

每日都像做节若

看电影逛街食馆店

我讲我爱看外国电影

伊讲伊也是

侬家中国其电影真假

我讲我喜欢卡夫卡

伊讲伊喜欢杜拉斯

但是矛盾真快就来唠

起因就是使钱问题

伊逢乇都着买好其

伊讲卜换蜀架手机

我讲我乞汝买OPPO手机

真好看，诸娘囝都喜欢

但是伊一定卜挃苹果手机

我讲我自家都俪使小米啊

我讲我可以花3千

乞汝买蜀架国产手机

但是汝俪买苹果手机

我蜀分都儥出

我讲汝买其是奢侈品

结果伊自家买礼

最新其苹果，6千块

伊讲嚽是信仰

无办法讨论

伊看我受气

就讲下日侬家做什乇

都AA制

我对食颂都无讲究

但是伊不兴

伊都着食好其

每日牛奶面包麦片咖啡

伓想自家做自家煮

伊就告外卖

伊看见我日日煮面煮饭食

伊讲汝总款食也儥腻吗

我讲汝日日食面包咖啡也儥厌吗

衣裳，伊蜀件衣裳价格

会抵我三四件衣裳

按伊其观点蜀分钱蜀分货

我讲汝交真侈智商税

伊讲我死去都可惜

人生着八享受

我讲汝字典礼都无

节约只两字

汝伓是地球上其侬

伊也措我

所以因为三观不合

我见觉伊恰浪费

伊见觉我恰犴狡利

所以蜀年以后

伊就共我拜拜去

我讲汝是蜀隻好朋友

但是儥适合做老妈

伊讲我是蜀隻好朋友

但是做儥适合做丈夫

但是伊讲伊也无准备

讨蜀隻丈夫

所以嘻日我是共伊

拥抱礼告别其

告别以后伊也离开公司

我讲溪势只满急噜

伊讲伊无急

伊就是爱客遛

喜欢去各只城市生活

伊讲今年暝伊30岁

伊每年去蜀只城市工作

去30只城市

就60唠，就遘退休了

我喜欢各地美食

我喜欢各地其风景

我喜欢认识各种各式其侬

就总款生活遘老

人生就是蜀只旅行

伊讲

但是我喜欢

安定抱稳其生活

我就像蜀蔸树逢款

栽底呢，就一直着底呢生活

所以我不断积钱

我买厝买车

我讨亲结婚生囝

我每日按时去上班

伊着七处漂泊

但是伊讲伊伓是漂泊

伊是着七处客遛

最近我讲国庆节准备转厝

伊讲伊现在正好着三山市啊

见面辰候

我发现虽然十年过去了

但是伊固是像30岁若年轻

但是伊讲我有50岁唠

伊将我带裡

蜀间嫩嫩其厝礼

虽然嫩，但是真澈洁

装饰也做精美

我讲汝现在蜀个侬

伊头啄啰啄

讲乍共男朋友分开去

伊讲伊无办法

伊无办法共蜀隻侬

一直着生活蜀堆

伊讲婚姻是违反人性其

暝晡去睏辰候

我讲我去沙发礼睏

伊讲伓使，共伊齐睏就会使

我讲我会惊对不住我老妈

伊讲我总款其思想是老土

伊带无去鼓山客遛

带我去闽江一日游

带我去洗温泉

带我去食鱼丸扁肉

芋粿蛎饼粉干鼎边糊

我本底是三山侬啊

但是三山只十年变化真大

我墿都儥八行去

但是伊比我固熟

伊甚至用三山话

共我攀讲

伊会讲各地其话

我转厝以后伊复发真侈

着各地生活其照片乞我

看礼照片裡势其伊

我见觉伊其生活

是丰富多彩其

相反我其生活平淡复暗淡

我总希望伊底日

会发生什乇事计

拍电话来讲快来啊

快来帮我啊

以证明伊生活方式是绽其

但是我失望去

相反我自家

蜀日乞各种事计

都撩遘头都卜昏卜眩去

送伲囝上班

替伲囝做题目

操心伲囝去底只学校读书

下日伊新妇底呢讨我都想遘

我共我老妈蜀日都是声音

做年做节卜着行亲戚

头野疼，暝晡也睏儥着

始终我无自由快活其日子

做年做节伊都乞我

伲囝寄礼物来

我讲汝总款伓结婚

下日万一俪有病疼蒋样做

伊讲伊身边随时都会讨着男界

伊固讲有蜀隻大款卜包养伊

但是伊拒绝去

伊讲做大款其老妈儥自由

就像关笼笼其鸟囝蜀样

虽然衣裳颂真漂亮也无苦食

但是侬儥自由

然后伊就发乞我《囚鸟》只条歌

伊讲伊现在已经着十几只城市

生活过唠

也就是讲着十几只公司工作过

伊有丰富其设计经验

伊现在是高级工程师

伊讲工程师就像老中医逢款

越老越食香

伓使惊讨儥着工作

就是底日老去

伊有退休工资

再老儥定动去

伊就去养老院

俪病遘无药牧无乇治去

伊就准备安乐死

最近伊妈死去

伊是上海侬啊

伊妈着上海有两间厝

会值上千万

侬现在都是买厝保值啊

伊将厝都卖赖去

伊讲钱就是门票

过期作废

所以伊现在着米国

伊讲伊准备着每只国家

生活蜀年，也就是讲

伊开始周游世界

最近伊上啰抖音

着抖音做蜀只攀讲节目

名字号礼《快乐人生》

因为伊侬生真漂亮

复有真侈丰富其人生经历

所以伊讲其真生动

粉丝真快就达遘几百万

甚至有商家倩伊直播带货

伊复钱趁几百万

我虽然也上抖音

但是我不兴啊

我俪做三山话歌词编译

但是无侬唱

所以我其粉丝俪百几隻

嚽让我想起

做细就听我爸

讲其伊索寓言

讲红蚁蜀日遘晚都着讨食

将粮食存仓库礼

阿蛦都是着树礼唱歌

仱冬天辰候阿蛦希望

讨仂囝乇乞伊食

红蚁就刺溪阿蛦

讲汝夏天唱歌

现在汝就跳舞吧

其实我以后看啰蜀片

日本电影号礼《第八日》

我乍发现阿蛦是无冬天其

伊真正着树上其日子俪八工

我见觉我都乞伊索寓言骗去

红蚁蜀年忙遘尾

我也无看见底头红蚁变富去

相反遘现在

阿蛦快乐歌唱其声音

固着我耳边回响