家暴(福州话微小说)

有蜀回我将蜀篇文章发乞伊

因为我现在共伊讲话真困难

蜀讲话就冤家

伊讲嚽伊无必要看

因为像搓搓老干妈盖盖

总款其事计反正伊儥做

嚽是我其事计

讲我自家着注意仂囝

我想起当初共伊谈恋爱

几个月日唠

都无什乇发展

因为我胆真小

无敢去碰伊

但是有蜀日我去伊厝礼

我侬靠阳台礼

我兹隻侬手真贱

看见阳台上其花花草草

我就爱去摸

结果伊就拍我手

讲仂滴卫生都儥八

阳台上有真侈灰

花悬顶也喷有杀虫剂

我凝蜀下，就将顺势

将伊手牵过来摸

我看伊也无反对

我讲总款应该是卫生其吧

但是我以后发现我是绽其

伊爱使手拍侬是蜀种习惯

伓是伊中意我

因为我发现

伊妈也爱拍伊爸

所以我认为嚽是蜀种遗传

如果谈恋爱辰候

我固喜欢伊拍我蜀两下

但是结婚以后我就肝火真熧

我讲汝溪势拍我头

总款我底日会乞汝拍戆去

我复发蜀芘链接乞伊

我讲汝看，兹篇文章礼讲

有蜀隻女界因为

随便乱拍伊丈夫

结果伊丈夫乞拍做形去

我讲侬身礼都有穴位

俪无注意，就……

伊看啰看文章，无做声

但是过几工老毛病复犯去

我激烈反对

伊讲我兹隻侬仂滴都儥八浪漫

伊讲拍是亲骂是爱

我讲我儥喜欢总款其爱

有蜀回我带伊去看我妈

看见伊使手拍我

我妈就讲汝溪势拍我囝噜

我做爸奶其都儥舍拍啊

所以我妈过世伊后

每回伊拍我辰候我就讲

我妈现在就着头顶中

伊再总款拍我

我妈会讨汝麻烦

伊讲我固惊汝妈啦

伊都死去固管只侈

仱今旦因为

做卫生洗衣裳其事计

我共伊复冤家去

我讲汝嚽是假卫生

汝看兹只地方都无扫也无拖

侬讲扫厝扫厝角洗面洗耳角

伊讲我由结婚以后

透底都无做卫生

我无资格讲伊

伊面机关红

仱复开始洗衣裳

我讲俪看见汝日日洗衣裳

衣裳都乞汝洗破去

难怪我厝礼水电会使只满侈

这水电什是伓使钱噜

我讲像汝总款做保姆都儥合格

结果伊冲过来就是蜀巴掌

看汝嘴会只满挤，会只满挤

但是突然

伊手变儥定动

讲真疼

我讲好，报应来唠

仱伊跍地兜

左边手托礼右边手

伊讲着去医院

我讲汝爱去自家去

反正我儥陪汝去

我着厝礼写我其小说

但是我发现我写完第二章辰候

伊固未转

我就赶紧躃去医院

我看见医生着礼乞伊拍石膏

医生是蜀隻四十几岁女界

医生乞我看啰看拍其片

伊讲汝兹隻侬也无爱心

汝老妈手腕都褪骨去

汝也无陪伊来，像无事计若

我讲我就是让伊着有记时囇

医生讲什乇记时

汝老妈讲是自家无细腻跋蜀倒

伊固卫汝讲话

现在我见觉情况比较严重

我估计汝有家暴倾向

汝到底使什乇拍伊

会拍总款去

我讲，我讲无使什乇啊

就是使面啊……

医生听我总款我讲

伊觑啰觑我老妈

伊也凝去