网红(方言微小说)

最近我姐做细坐火车其视频

突然着抖音悬顶“火”去

因为视频裡势我姐俪七岁左右

伊礼固迈礼我，当时我俪三岁

因为买其徛票，着徛12点钟

仱网友着下底评论真侈

爸奶哩，爸奶躃底呢去

溪势也无侬让座位

乘务员哩

兹只车厢无蜀隻侬有良心

兹只妹囝野阳光啊

伊其笑面偌夥灿烂啊

爱笑其诸娘囝都有福

希望以后伊幸福

兹只依弟下日着好好

报答伊姐，有总款其姐

是偌夥幸福啊

评论真侈，我无法

一一列举，各侬爱看

可以自家去讨

其实兹只视频是廿年以前其

汝看裡势侬包括我姐

都无戴口罩就是证明

因为当时都是绿皮火车

现在我家乡都通高铁唠

视频是蜀隻记者依哥拍其

我姐看见以后

就通过抖音账号私信乞伊

讲溪势现在发总款其视频噜

记者依哥讲

前几日着电脑礼讨材料

突然复看见这视频

看见现在伲囝都过娇去

所以就发出来

让各侬都看啰看

以前伲囝偌夥会食苦

想儥遘会引起只满侈侬注意

我姐讲当时其情况

无各侬看见其嘻满辛苦

就是因为放暑假

真想念我爸我妈

我爸我妈也真想看伲囝

所以我姐带礼我

坐火车去三山市

因为我爸我妈

都着三山工地礼做工

如果告我爸我妈转来

伓啻车费着使几百

俪几工，工钱固着扣成千

所以告我姐带礼我来三山

顺便可以来三山客遛

所以我公就送我两隻

去火车站

伊无得去，因为厝礼

固有鸭鸡猪着有侬照顾

我姐俪使买半票

我根本就伓使钱

我固着伊礼迈啊

所以见觉真合适

因为俪买着徛票

我公固做蜀只嫩嫩椅囝

所以我姐就坐着

两只车厢连接其地方

溪势讲当时

都无见觉辛苦哩

因为嚽是我共我姐

头头回坐火车啊

并且想遘可以着

三山客遛蜀个月日

所以伊真欢喜

蜀墿金金目看礼

外首其山山水水

城市乡村，风景真俊

我也真奇怪

溪势地兜树林都向后首躃

有蜀隻记者依哥

就注意遘我姐蜀个侬坐火车

伊就讲我录蜀只视频会使儥

我姐就笑礼讲会使会使啊

因为伊也想看啰看录像裡势

自家是什乇样式

其实就是兹只记者依哥

将座位让乞我姐坐其

根本伓是网友讲其逢款

蜀车侬都无良心

确实我只蜀世都着感谢我姐

因为初中毕业以后

我姐就无读书啦

因为厝礼真逼

俪容许我蜀隻读书

我姐伊讲伊对读书无兴趣

伊固载着厝礼对手我公做田

去山礼摘果子挖笋

我姐有蜀段时间

也去火车礼做临时工

总款伊认识啰蜀隻铁路警察

所以也有啰蜀只幸福其家庭

伊也养啰蜀只伲囝

仱我公也过世去

我爸我妈固是着外首做工

所以我姐只能转来做田

同时照顾我生活读书

时间真快，廿年过去

我由三山林学院毕业以后

现在着三山进出口公司礼上班

我真希望会帮我姐

我带礼领导来遘家乡考察

领导讲以后我家乡其果子特产

公司全部都收购去

仱我姐也真欢喜

但是想儥遘只几年

受疫情影响

出口生意伓好做

固蜀下现在栽果子其侬也真侈

做遘果农都折本去

甚至果子树都坎赖去

我就共我姐讲汝赶紧上抖音

着抖音哩卖

各侬都看见唠

我姐生真俊

所以马上伊就真侈粉丝

果子都卖完，特产也卖无去

我姐就去附近间壁乡去收购

我讲汝可以将平常其生活

拍成视频

譬如讲犁田，割粙

做年做节其风俗啰

家乡菜蒋样煮啰

家乡其风景啰 等等

都发抖音礼

结果引起真侈侬兴趣

粉丝马上达遘几百万

真侈侬都躃来我家乡旅游

现在家乡也真富去

我爸我妈也转来家乡

家乡政府乞我姐发礼蜀面大锦旗

表彰我姐为家乡发展做出其贡献

并且命名我姐

是家乡旅游形象大使

现在我姐变成蜀隻网红去

嘻隻记者依哥复联系我姐

希望采访我姐

讲再拍仂囝视频

但是讲千讲万

我固是希望各侬

多买仂囝果子共特产

嚽是对我姐最大其支持啊