幸福(方言微小说)

就着高三嘻年

我妈住院

蜀检查，发现生癌

并且是晚期

伊共我爸讲

伓使治，受怪礼钱

钱留乞伲囝读大学

以后结婚使

我流礼目滓

我爸无做声

我会八伊也真儥受

三个月日之后

我妈就行去唠

我爸告我安心读书

准备高考

但是我看见我爸面真乌焦

侬也无精神

因为以前有我妈照顾伊

伊已经习惯有我妈其存在

突然我妈行去

伊就像蜀头鸟囝

俪剩蜀芘翼翼

飞儥定动去

我看礼伊总款

我心肝真难过

但是无办法帮伊

固好我高考发挥固无呆

考裡侬家三山师范学院

我爸也真欢喜

伊送我去学校

将银行卡交乞我

讲学费生活费都着只裡

新其环境，新其同学朋友

让我心情尽落愉快

我像日头下底其花逢款

享受阳光其钟吻

罔发罔俊罔漂亮去

但是礼拜日转厝

我看见我爸

孤孤单单蜀个侬

个郎日无讲话

见觉伊老真侈

我心就真痛苦

因为伊下岗去

只能七处去做工

趁礼钱自家也都儥舍使

都是乞我买衣裳

买我爱食其乇

伊讲诸娘囝着装俊仂囝

我就共间壁伊依婶讲

希望乞我爸介绍蜀隻女界

依婶讲有乞伊介绍

但是伊惊汝儥同意

惊周围侬讲闲话，伓肯

我就转去问我爸

我爸讲，我俪再讨

惊我共伊合儥来

我讲我现在都着宿舍礼住

就是拜六礼拜乍转来

会有什乇矛盾

我现在也无能力孝顺汝

汝俪会幸福我就安心唠

嘻日我转厝

看见厝礼坐礼蜀隻依姨

依姨看见我马上就爬起去

依姨讲菜都乞我煮好唠

就等我转来食饭

我鼻着菜香

突然心中涌动家温暖

但是依姨讲伊囝儥同意

讲我妈只满大唠

固去做新妇，侬会笑话

我讲汝电话乞我

我想共汝攀讲囇

电话裡势是蜀隻

丈夫囝其声音

伊讲，明旦着我

学校门口见面

原来伊是三山大学其学生

共我同岁

我讲现在都俪蜀个囝

老侬蒋样照顾

汝有想过汝妈蜀个侬

着厝礼苦闷无

侬家其照顾都比儥上

伊两隻互相其照顾

我讲孝顺就是让

爸奶见觉人生其幸福

伊讲想儥遘我想只满深

但是，伊讲，伊会惊

我共伊妈佮儥落

惊伊妈受气

我讲我已经都做好准备唠

以后我自家住宿舍

工作以后自家租厝买厝

因为敆蜀堆就是

容易产生矛盾

伊听我总款讲

头啄啰啄，乍同意去

以后拜六我就共伊齐转来

伊来看伊妈

看见我爸共依姨有讲有笑

伊心真欢喜

我心真温暖

仱今旦看见

有侬将我厝其事计

发遘网上

虽然无指名道姓

我会八就是讲我爸

伊讲我爸将钱掏去

自家讨老妈

然后女界

将诸娘囝逐出去

会总款冤讲

我真受气

我着下底疲劳讲

用道德其铰刀

将有血有肉其侬

剪成纸片

然后让侬按照汝想法生活

汝有想过爸奶共汝蜀样

也有心理生理需求

汝只把铰刀剪侬都无血

我将链接发乞伊看

伊讲我讲野好

情人节嘻日

伊买礼玫瑰花送乞我

我心真感动

我见觉伊侬也真好

正好着门口乞同学看见

仱有侬就讲我谈恋爱去

我也措伊

我见觉人生在世

汝俪生活着别侬其眼光下底

汝固不如蜀头头牲

侬着讨着自家其幸福