我其野蛮女友(方言微小说)

各侬应该都看见唠

我共女朋友着街中

冤家其视频都乞侬

发抖音上去

我看下底其评论

有讲估计是我出儥起彩礼

所以共提出共女朋友分手

女朋友伓肯

伊使力抱礼我

伊力真门大

我想捵都捵儥开

仱有侬就讲估计我欠

女朋友其钱

钱无还就不准行

有其讲我女朋友

去外首复讨蜀隻男界

现在希望我原谅伊

但是我就是无法接受

仱有侬就讲

再乞伊蜀只机会吧

侬都有犯错误其辰候

其实都伓是

事计是总款其

最近我公司做体检

发现我肺部有蜀只影影

我想完去，估计是呆乇

我就想起我单位

有蜀隻男界

发现肺部生癌

伊厝礼侬儥甘愿

带伊七处看病

钱使十把万

俪半年就死去

黄泉墿上无老幼

我真惊

我心礼压力真大

上班都无心绪

也无敢共厝礼侬讲

因为我俪蜀个侬

着三山工作

爸奶离我真远

我有谈蜀隻朋友

但是伊现在着外地出差

暝晡女朋友拍电话来

讲溪势最近也无联系

我讲工作真忙，日日加班啊

伊讲平常汝也是日日加班啊

汝什是共别隻女界着蜀堆

我讲无

伊讲我肯定有事计瞒伊

我讲无事计

我只是见觉侬家儥合

我嫌汝脾气真强

逢事计都着听汝其

希望汝自家再讨蜀隻

伊讲侬家两隻好好喏

溪势突然会讲总款话

汝等我，我着车礼

再过蜀点钟我就遘厝唠

伊拍来电话辰候

已经是暝晡卜10点唠

伊讲伊拍我其门

也无侬应

我到底着底呢

我讲，我这辰候目滓流出了

伊听见我啼嘛其声音就问

汝到底着底呢

我讲我着18层

我见觉我活礼已经无意义唠

跳落去对我自家对我爸奶

都是蜀种解脱

伊讲汝千万伓通做逢款事计啊

蜀边讲蜀边伊自家也啼去

我听见伊啼其声音

我心也软去

这辰候伊已经躃上18层

将我抱紧紧

第二工伊带我去医院检查

医生讲最好着做穿刺检查

就告我女朋友

着家属逢呢签字

我讲伊只是我女朋友

固未结婚

我想手术着使真侈钱

手术后固着化疗

定期检查，事计真侈

我爸我妈也无着面前

我讲我伓做，我就躃出去

所以汝各侬就看见

我共女朋友抱蜀堆其视频

伊讲使伊钱

我讲我伓挃汝其钱

伊讲无一定是良性其哩

我讲肺癌检查出来都是晚期

因为肺礼无神经，儥疼

我讲癌总款乇无乇牧

最后都是人财两空

医生医院但是骗钱其

千万伓通去体检

体检蜀身都是病

惊都惊死去

我真退悔只回去体检

伊讲钱无

侬家可以再趁

命汝俪蜀条

人生难得啊

着去博蜀回

我听伊总款讲

情绪乍安定仂囝

我讲我爸我妈

都无出门过

连火车都儥八坐

伊头覆礼

突然讲，伊来签字

我讲不兴啊，汝固未结婚

万一我底日死去

汝蒋样再做新妇啊

伊讲今旦汝去也着去

伓去也着去

汝快乞我爬起去

伓使再讲什乇唠

总款我就像死犬若

乞伊拖去民政局

过两工，伊复我拖遘医院

伊将结婚书排医生面前

就着家属签字地方

蜀笔蜀笔写下伊其名字

我流礼目滓

护士将我捵裡手术室

等我清醒以后，擘开目睭

我首先看见其就是伊

像花逢款漂亮其面

我讲，我讲，我固未讲

伊就讲，汝安安心

肺部其乇是良性其

讲完伊目滓也流出来

仱全病房其侬

都祝福 我两隻