Sandy(方言微小说)

我出门辰候

已经卜中午唠

我就行裡车站旁边

依忠拌面馆礼

我蜀边食蜀边看礼外首

看见侬行来行去

看见车停复开去

我想着赶紧将合同

交乞客户签字

因为客户今晡

就卜起身离开三山

等我卜食完辰候

我看见蜀头犬囝

伊坐外首直透觑礼我

真像我其Sandy

我再觑伊辰候

伊尾尾就巴腊蜀下

我想伊可能共我蜀样

腹佬也枵去

所以我复买啰蜀碗拌面

廮塑料袋礼

我掏出乞伊食

伊尾尾巴腊礼

赶紧来食面

我跍伊身边

我讲Sandy我共汝蜀样

也是蜀头流浪犬

着兹只城市七处躃

我也无时间也无精力养汝

只能买蜀碗面乞汝食

希望汝会讨着蜀隻好主侬

因为我做细有养过

蜀头犬囝，名字就号Sandy

养啰三年，但是

儥八得啰什乇病

突然间伊就死去

我尽落伤心

我爸掏蜀只大纸箱

铺上我旧其衣裳

再用我其棉袄将Sandy包紧紧

廮箱箱礼裡势

然后伊扛遘山上

着蜀蔸树下挖蜀只坑坑

将Sandy埋裡势

悬顶固使石头板硩囇

使塗填平再铺蜀层树箬

因为会惊别其犬囝会来扒

犬囝鼻真灵会鼻着

我爸讲以后汝看见只蔸树

汝就会记起Sandy唠

我是三山大学毕业其

因为我爸是三山侬

但是伊大学毕业后

乞分配着北方

伊真想念家乡

做细我就发现

伊共伊厝礼侬拍电话

都是讲蜀种

我听儥会意其方言

我讲我也想学

伊就教我一两三四蒋样讲

食饭蒋样讲，客遛蒋样讲

总款俪碰着秘密其事计

我共我爸都是使方言讲

我妈都听儥会意

保密性真好

所以我妈就讲

我是我爸其贴心小棉袄

以后考大学

我第一志愿就是三山大学

毕业以后我自然就着三山市上班

我爸希望底日伊退休去

会转来三山市

我老板同事真奇怪

我三山话比伊各侬讲固清楚

我讲汝可以加微信群啊

有先生专门教三山话啊

我看见公共汽车来

赶紧就躃上去

但是等我来遘绿岛大酒店305

客户住其地方辰候

我发现我带其文件拍逿去

老板讲只满重要其文件

汝做拍逿去

汝今旦无讨着

明旦汝就伓使来上班唠

仱我惊野很

我拍电话问公交公司礼

3路汽车司机讲无侬拾着

我想可能逿着依忠拌面店礼

所以赶紧回转头躃落来

遘门口辰候

门口两隻依妹固讲

谢谢光临

我也无心思应

我头覆礼向前行

这辰候我听见有犬囝叫其声音

原来Sandy坐着蜀蔸榕树下

嘴礼咬礼我其文件夹

我野欢喜，目滓都流出来

我想可能是我

掏拌面乞伊食

我侬跍礼辰候

文件夹逿落来

然后伊发现我坐车离开去

马上咬礼文件夹去逐我

但是我无听见

我俪八看礼手机

因为侬也比较侈

所以伊蜀墿中直透跟礼我

看见我行裡蜀间旅馆

但是伊无得裡

因为两隻依妹不准犬囝躃裡

所以伊只能着树下等我

实在野感动

我讲感谢汝Sandy

我摸礼伊其头

现在我虽然住着蜀间嫩嫩其

就像胶囊喏厝囝礼

但是因为有啰Sandy以后

茫茫人海中

我再儥孤独孤单寂寞唠

因为每日伊都会送我去上班

我落班辰候我

伊都会向我扑过来

嚽也是蜀种幸福啊

我想