无印象

当时我爸有讲

希望我去学手艺

总款至少有饭食儥饿死

我会八伊其想法

就是厝礼真逼真困难

无钱乞我读书

但是我妈伓肯

伊讲我着去读书

其实我对读书无什乇兴趣

蒋样读着班礼也是尾碌

但是我妈固是希望

我会读大学

以后我乍八

我妈伊是见觉

我俪会读大学

伊更有面子

所以我勉强介读落去

让我欢喜是，或者讲

让我有耐心读落去原因

是因为着我前首

有蜀隻漂亮其诸娘囝

所以我着上堂辰候

俪注意伊其头发

伊其衣裳，伊白白其皮肤

但是伊每回行裡课堂辰候

行着我面前辰候

伊都觑我，就像我是蜀隻

透明其侬，就像我是空气若

儥看见

伊是蜀隻两个声

我见觉伊讲其普通话

真好听，共电视机裡势差罔多

我讲其半咸淡其普通话

因为两个声都着工厂礼工作

所以我班礼两个声同学

颂其都比侬家农村伲囝像子

两个声一般都看儥起侬家当地侬

都是告侬家农村同学是地瓜

地瓜汝会八儥

就是侬家告礼番薯

因为上堂我着礼研究

前首其诸娘囝

所以先生讲什乇我都无听见

所以各侬应该也会猜着

就是大学我肯定无考上

但是汝猜儥着其是

伊也无考上

诸娘囝恰漂亮往往书也读儥好

并且我着研究伊其辰候

估计伊着礼研究英语先生

英语先生是蜀隻青年哥

侬生复悬复俊

真侈诸娘囝都暗暗喜欢伊

都落堂唠固去问先生嚽先生回

真可笑，目的就是

希望共先生讲几句话

我估计伊也着暗恋先生

因为伊也爱围兜先生

但是伊无讲话

儥像其他诸娘囝逢款

叽叽喳喳

所以我见觉先生讲什乇

估计伊共我蜀样也无听裡耳

其实我做手艺固无呆

高中毕业以后

我先去学修手表

就着火车站逢呢

儥八各侬有无注意我

以后因为电子表真行时

所以我做无什乇生意去

我去修理骹踏车

我罔修罔大去

以后我开啰几间骹踏车店

再以后骹踏车也无生意去

我开摩托车电动车店

我也讨礼老妈

是我隔壁村侬

虽然无真漂亮

但也有得去

我老妈对我也真好

囝乞我养两隻

我爸我妈也真欢喜

厝礼事计都做平平直直喏

唯一就是爱拍四色

不过我认为嚽也是

正常其娱乐活动

仱讲今年暝

我同学依强拍电话乞我讲

今年暝国庆是侬家高中同学

二十周年聚会

告我一定着参加

因为来参加同学

大多数是大学生

现在都着三山市

有做厅长其有做局长其

至少也是教师工程师

所以我都伓爱去

但是最近几年我开啰几间店

我也趁啰仂囝钱

我也算蜀隻小老板唠

我见觉自家也有仂囝派头唠

所以我决定也罔去蜀头

当日，来落真侈同学

固有先生

但是无英语先生

讲起真受怪

英语先生虽然侬生真俊

真侈诸娘囝都喜欢伊

但是侬发现伊喜欢其是丈夫囝

所以伊先生都做儥成去

现在儥八着底呢做事计

汝讲嚽会受怪儥

既然是聚会

所以各侬都出仂囝钱

我看一般同学都出两三百

我就掏两千出来

我见觉我有遘雄唠

着我共同学攀讲辰候

我看见伊行裡来

哇，伊比原底更漂亮去

颂礼旗袍，体型曲线嘻满俊

我都无敢看去

就像我无敢看

中昼其日头逢款

接落来各侬介绍囇自家

轮遘我其辰候

我讲我现在自家开店

但是有其同学真受怪

大几隻都下岗去

满世讨工作，只呢做几日

嘻呢做几日，野喫亏

轮遘伊讲话辰候我耳拔长长

固是标准其普通话

伊讲伊着某某公司做秘书

我突然见觉

伊天生就应该做秘书

介接落来是就是聚餐唠

我想儥遘其是

我共伊会坐蜀桌

仱同学之间都互相问候

回忆着学校当时其事计

轮遘我共伊问候其辰候

我讲汝会记我儥

伊凝凝喏看礼我

讲 无印象

我讲当时我就坐汝后首啊

汝有向我借米搭尺啊

伊固是头摇礼无讲话

无印象，仂滴印象都无

伊固是总款讲

我转厝辰候真受气

我想我对汝印象只满深

可以讲我是爱上汝，暗恋汝

溪势汝对我仂滴印象都无

有侬共我拍招呼

我也无注意

行转厝，看见我老妈

共伊比啰比，天差地去

但是老妈无办法换啊

伊对我对我囝对蜀厝

都真重要啊

我行房里看见伲囝着客遛游戏

我讲固伓去做作业

下日侬对汝都无印象去

伲囝看礼我

也儥八我话什乇意思

我倒厅中沙发礼

我想现在国家

连摩托车电动车都不准开去

我仱着蒋做

我想我着去开4S店，卖汽车

我想着伊公司对面开蜀间店

底日伊俪来卖车辰候

我就讲对不住，我儥认识汝

车无卖汝

不兴，总款不兴

总款会做无生意去

我想底日伊来修理汽车辰候

我将伊车罔修罔呆

狠狠收伊蜀笔钱

让伊有印象囇

但是我都想绽去

开店嘻日，我早早坐门口

我看见伊由宝马汽车礼行出

然后手邀礼蜀隻男界

行公司裡势去

估计嘻隻男界是伊老板

也是伊丈夫

我突然想起

《爱拼才会赢》嘻条歌

我只蜀世是不断使命去拼

乍有现在其生活

我英语先生也是

自学成才，考做先生

但是因为喜欢丈夫囝

所以做遘逢侬都看儥起

但是有其侬伓使拼就是赢其

天生就好命啊，就像伊

伊就是因为生得俊

我总款想辰候

嘻架宝马车开过来

由车礼行出其伓是伊

是伊其司机

司机讲车乞修理保养囇

所以讲我虽然我真努力

伊对我固是 无印象