音乐盒

嚽是我年轻辰候其事计

但是遘现在我固是无法

忘记，无法原谅我自家

我大学毕业以后

就去《三山》编辑部工作

儥像现在，现在后生囝都会开车

有车开车成为年轻侬其标配

我许辰候是骑骹踏车

有蜀日，我无听见闹种响啊

爬起去，发现差三字

就遘上班时间唠

我当命骑礼，骹都骑酸去

突然看见红灯

我赶紧刹车，但是已经儥赴去

我碰着前首蜀隻依妹其车后轮

我讲对不住啊

依妹回转头觑啰觑我

笑啰笑，无讲话

伊笑辰候面上有两粒酒窟

伊颂礼红红其跳舞衣

侬就是总款奇怪

由嘻回碰车以后

我发现上班稠稠

会碰着伊

依妹看见我固是笑啰笑

我看见伊酒窟我心会动

看见伊跳舞衣我面会红

有蜀日，复是着嘻只墿口

依妹突然将蜀张批

抾我骹踏车篮篮礼

对我笑啰笑

然后伊转弯向左边骑去

我赶紧将批拔出来

原来是伊写其几条诗

最尾固写，我认识汝

我着电视裡势有看见汝

我想估计是我做记者

有去三山市采访其原因

遘编辑部以后

我再看落几遍诗

见觉有蜀首诗写真好

就将伊发表出去

过几工碰着伊辰候

我将稿费廮批袋掏乞伊

伊笑去，着早头其阳光下

伊其笑面就像红霞

就总款伊每回投稿

都是投我篮篮礼

但是都无讲话

就是我讲话伊也是俪笑啰笑

因为我年轻辰候胆比较小

看见诸娘囝面就红

所以也无敢共伊多讲话

但是有蜀日伊着诗稿下底问我

希望共我交朋友

我突然真感动

我再看伊其诗 见觉

都是写我共伊之间感情其

所以我就想买蜀件礼物去表白

儥像现在年轻侬都是买什乇

玫瑰花啰巧克力啰

我许辰候儥八买什乇

有其侬会买衣裳或者断布

掏乞诸娘囝

但是回都是基本确定关系

以后乍总款做其

虽然讲当时也有自由恋爱其

但是固是少，男女之间

大多数固是通过介绍其

我想来想去，买什乇哩

我捵礼骹踏车行着中亭街

突然我听见有音乐传来

各侬都八我真喜欢音乐

我蜀听就八是

贝多芬其《致爱丽丝》

我就行裡店

原来是蜀只音乐盒礼发出其

啊，就是嚽唠

音乐盒外形像蜀粒心

裡势有嫩嫩其蜀男蜀女

抱礼跳舞，有蜀把锁匙

锁匙将发条搓搓囇

音乐就响，两隻侬囝就跳舞

野有味

第二工着墿口碰着伊辰候

我想将音乐盒掏乞伊

但是旁边侬真侈

我也儥好讲话

其实我有将想讲其话写纸礼

因为我惊看见伊辰候

我会大舍叵

但是我固是想当面共伊讲

也想听伊会蒋样讲

所以我就跟礼伊

想遘伊单位辰候再讲

最后我看见伊着

蜀只学校门口落车

我赶紧也落车

但是我看见学校名字

我侬就凝去

我无敢再行兜去

《三山市聋哑学校》

啊，原来伊是病哑

难怪伊都无讲话

由嘻日开始我就换蜀条墿行

但是我固会收着伊寄来其诗

我固会发伊其诗

因为我见觉许诗都是写乞我其

我将音乐盒包好好喏

囥箱箱礼

今旦我老妈讨乇

突然翻出这音乐盒

就讲汝嚽固留礼做什乇

我讲有纪念意义

什乇意义

是我以前女朋友送乞我其

我老妈也无措我

伊讲像我总款写小说其侬

伊儥八我底蜀句话是真其

底蜀句话是假

但是各侬现在都八

这音乐盒其中其故事唠

我希望各侬伓通告诉我老妈

等下会做冤家去