我爱美女

做为蜀隻男界我承认

我喜欢美女

但嚽不能怪我

汝俪卜怪就怪上帝

因为上帝伊着造侬辰候

着男界其软件裡势

也就是DNA裡势

就是总款设计其

所以我是按照上帝其意思

共我老妈离婚去

因为共外首其女界相比

伊生儥俊

因为我现在是蜀隻大作家唠

但是我老妈流礼目滓

伊讲离婚可以

厝着留乞伊，固有

我着掏蜀亿乞伊

我想伊总款讲就是伓肯离婚

所以我心蜀硬就讲

蜀亿就蜀亿

共伊离婚去

我想反正我现在钱真好趁

我其小说

固有小说改编其电影电视剧

我都有版税

固有各只大学都请我去演说

我俪使五年就会趁蜀亿

以后其日子长长

我不能共我儥喜欢其

直透屈蜀堆

我也伓惊讨儥着老妈

上帝一定会送蜀隻

更漂亮其老妈乞我

然后我就搬去福州

因为我见觉福州历史悠久

风景真俊，空气新鲜

对我写作真有帮助

所以我共现在其老妈

就是着福州碰着其

也就像我小说裡势写其逢款

就是有蜀日我行出超市

看见雨盪真大

我准备去打的士

这辰候有蜀把伞

着我头顶撑开去

蜀隻女界其声音

行吧，我认识汝

汝是大作家K先生

我真崇拜汝

汝厝住底呢我都会八

不过今晡汝先陪我

去酒店礼食暝

我看啰看伊

哇，蜀隻漂亮其美女

我想反正也就是蜀顿饭

我出会起，并且美女陪我

我侬真爽快

总款其经历以后我都可以

写小说裡势卖钱

总款我就共伊行裡味中味

着酒店蜀坐落

美女就替点啰蜀杯红茶

并且讲着廮糖

复点落几盘菜

都是我爱食其菜

野奇怪

我讲汝蒋样八我生活习惯

伊讲伊是我其粉丝

我其所有作品伊都看过

我讲《我共李白》汝有看过无

伊马上就将故事重复蜀遍

固有《编辑部其故事》

《模范夫妻》哩

伊马上复讲蜀轮

就像录音机若

野奇怪，有其情节

我自家写完都儥记去唠

伊会记只满清楚

并且讲我作品裡势

有意识流有表现主义

有魔幻现实主义其成分

我讲汝蒋样八只满清楚

我是汝其粉丝，伊固是总款讲

饭食完，我准备去买单

伊讲伓我使，伊买

伊讲会共我总款大作家

今晡着蜀堆食酒伊真欢喜

所以单伊来买

但是有蜀只要求

就是希望我添加伊微信

我看儥出伊会骗我什乇

就答应去

以后其事计估计各侬也会猜着

因为着微信裡势罔讲罔粘牢

所以稠稠约伊或者伊约我见面

最后我共伊就结婚去

固生啰蜀隻丈夫囝

每日我转厝

伊都是饭菜煮便便喏

逢乇事计都伓使我做

我俪使去写小说就会使其唠

我见觉伊所做其一切

真像我原底其老妈蜀模蜀印其

但是外观上我看儥出

共我原底老妈有什乇相同

就是目睭有仂囝像

侬都讲甜蜜其日子

总是过真快

就总款过啰十年

我伲囝都上小学唠

但是有蜀日伊讲

最近伊侬真疲劳

侬也衰去

讲去医院礼检查囇

我讲千万伓通去检查

无病会检查出有病

我讲生死有命富贵在天

伊讲伊大姨也无来去

着去医院检查

我讲汝是鸡母扒粪扫

无事讨事做

我伓去，卜去汝自家去

我着厝礼写小说

结果蜀检查无要紧

发现伊得啰肺癌

医生讲已经是晚期唠

无乇牧了，告我准备后事

伊真痛苦，我也真难过

伊固安慰我

伊讲嚽都是命，无办法其

讲完伊告诉我蜀只密码

固掏蜀把锁匙乞我

告我去保险公司礼

裡势有伊留乞我其乇

讲完侬昏迷去

我赶紧躃保险公司礼

先输裡密码

然后使锁匙拍开蜀只盒盒

发现裡势有十把张

整容其发票

固有真侈整容其照片

但是头头张

是我原底老妈其照片

我乍八原来伊

就是我旧底其老妈

我赶紧躃转医院

但固未遘医院门口

我就接着医院其电话

讲快来，汝老妈已经断气去了

我大啼，躃裡病房抱礼伊大啼

现在疫情

所以丧事也无办法办

也无侬来看伊

我拍火葬场电话

火葬场派车来接

然后拍电话乞我讲

伊骨灰盒着底呢地方

今旦是清明节

我也无办法去看伊

只能着厝礼蜡烛笃囇

共我伲囝烧仂囝钱乞伊

写遘只呢

我发现我蜀只问题

就是溪势连自家老妈

都看儥出

我按照发票上其电话拍过去

我发现是韩国其号码

但是接电话其依妹

会听会讲侬家中国话

我讲无有办法做遘连自家老妈

都看儥清楚儥

伊讲会，不过着经过真侈轮整容

我讲难怪现在街中美女只满侈

原来都是整容其啊

伊讲正是啊，汝什是也想整容噜

我讲“完整”着偌夥钱

伊讲差罔多着蜀亿

我讲让我考虑囇

我将电话挂赖去

我想起以前有蜀只故事

讲蜀隻农村老伯去城里

着电梯门口看见蜀隻女界行裡去

过仂行，行出蜀隻诸娘囝

伊就转厝告伊老妈也来坐电梯

侬都笑伊是海驴

但是现在其整容技术

就是已经达遘总款程度唠

伊伓是使手术刀

伊是修改汝其基因

譬如讲汝原底是单目墘

伊俪使修改囇DNA

汝就变成双目墘去

野厉害，汝俪儥相信

汝也去试蜀试

只不过着使蜀大笔钱