模范夫妻

别侬都见觉我两隻

是模范夫妻

但其实着厝礼

我共我老妈稠稠冤家

伓是我嫌伊生得呆

是伊生恰俊去

伊当时是学校其校花

但是我发现生得俊其侬

脾气都儥好

因为伊见觉

有乱发脾气其资本

就像我，我也是校草蜀蔸

我旁边真侈诸娘囝围礼

所以我脾气也真呆

离婚吧，我见觉真食亏

因为当时我花几十万彩礼

乍将伊讨转来

复买厝复装修使啰真侈钱

俪离婚，着分蜀半乞伊

仱蒋样做哩

固好啊，现在汝俪有钱

汝逢乇都会卖着

我就去淘宝礼去搜

果然发现有定做机器侬其

我交落定金以后

厂家就派侬来

伊就可以将我人体数据

全部扫描落来

甚至我头脑裡势其记忆

全部提取出来

现在网购速度就是快

过几工我我就收着货唠

我自家都看儥出

共我什乇区别

就像着境裡势其我

就像双生囝若

我趁我老妈无着厝辰候

告厂家着墙壁礼

安装落蜀种无线充电器

埋墙裡势，外首看儥出

但是机器侬自家会讨着

然后就告假其我转厝去

我着手机礼监视我老妈其情况

现在厝礼都有装礼摄像头

我想儥遘其是

“我”蜀拍开门

我老妈就躃过来

复抱复钟，真亲热

并且复倾茶倾酒

因为桌礼

早就煮好我爱食其饭菜

食完暝，“我”就共我老妈

讲啰真侈甜蜜其情话

因为我交代淘宝网其店主

软件裡势情话着侈侈喏

想儥遘我老妈也讲啰真侈

两隻固互相回忆

当时着学校辰候

底侬先追求底侬

最后两隻抱蜀堆大笑

最后倒眠床互相固抱礼睏

就像当初乍结婚辰候

我真奇怪

今旦我老妈

溪势突然对我会只满好

什是“我”讲啰真侈好话

所以伊真感动

我想老公妈是应该着好好讲话

伓通随便乱发脾气其

我有仂囝退悔买机器侬去骗伊

但是想起平常伊骂我咒我

我就真受气，肝火也真熧

我想反正现在我讨蜀隻侬替我

汝再骂再咒我也听儥着唠

就总款我着旅馆

抱礼蜀隻乍认识

无偌行其诸娘囝

共伊做乐做癫

最后也爱睶去

遘半暝囝辰候

我爬起拉尿

我看啰看手机

我看见“我”

坐椅囝靠墙壁礼

目睭礼

我会八伊着礼充电

但是我老妈哩

伊无着眠床，最后

我发现伊着另蜀只房间礼

也是坐墙壁，目睭礼

突然我想，呆去

衣裳也无颂清楚我就躃转厝

我拍开门，看见伊固是坐逢呢

我将伊头摸囇，也热

我想呆着，我赶紧拍开保险箱

发现裡势其银行卡

固有金链手指蜀大叠现金

都拍无去

我就告“我”

我讲汝看儥出伊也是假其吗

伊讲伊会八

但是软件裡势无提这要求

我赶紧拍电话乞我老妈

但是电话已经拍儥通去了

仱蒋做，只能等天光

去警察局躃蜀头

所以讲科学发达是好

但是着看汝使着什乇地方