单纯

认识伊以后

我心真欢喜

每日都像做节若

因为蜀落班伊就来接我

然后去小摊礼食暝

礼拜日固可以七处客遛

无偌行伊就共我讲

希望我做伊其女朋友

我复欢喜复担心

我讲汝到底中意我什乇

单纯

现在像汝只满

单纯其诸娘囝

已经无块讨唠

伊讲

单纯，我问自家

我是单纯其侬吗

我单倒见觉伊真单纯

我见觉伊就是

我做梦都想讨其侬

但是我越总款想

我越惊会失去伊

因为我以前……

我真想将我过去

发生着我身上其事计

告诉伊

但是一直无敢开嘴

因为会惊伊无办法接受

只回伊出差去

无着我身边

我复考虑这问题

伊会儥接受

一旦底日伊会八去

伓啻伊痛苦我也真痛苦

现在固未结婚

也无伲囝

固有机会

但是告诉伊

做为蜀隻男界，我想

伊肯定是无法接受其

但是扼我心礼

我侬也真喫亏真儥受

我着讲出去

我不能讲

讲出去伊肯定会离开我

所以我不能讲

我就总款倒眠床礼

因为烦恼讲伓讲

侬真烦躁，睏儥着

最后我突然爬起去

将以前事计写落来

写完以后

侬也见觉轻松真侈

我轻轻扼囇 发乞伊

我已经做好

最呆其 准备

头日，伊无声音

第二工，固是无声音

我也无敢问

什是伊出差工作特别忙

但是就是忙也无可能无看手机

无看信息啊，特别是我其

伊肯定思想也着礼斗争

第三工，遘半暝

伊突然发几字乞我一一

单纯伓是讲是蜀张白纸

下底固有几粒红心

我看礼真激动，流礼目滓

这辰候我听见开门其声音

我看见伊掼礼行李行裡来

我赶紧爬起去

我讲汝溪势提前转来去

伊无讲话，行过来

将我紧紧抱礼

像抱蜀隻伲囝

我见觉头发做热热喏

我头岳起

看见伊也流礼目滓

我见觉伊真其真单纯