盪雨声

我共伊是别侬介绍认识其

伊汉码悬悬，面乌乌红红喏

无什乇话，但是侬真肯做

头回见面我就真中意伊

伊是开货车其，躃长途

我许辰候替别侬看店

共伊认识差罔多

三个月日以后

有蜀日伊讲只回去福州

问我什是愿意共伊齐去

顺便去看海去食海鲜

我真欢喜，就共老板请假

福建其山水正是真漂亮

山绿绿水清清墿弯弯

蜀墿中我都看迷去

但是暝晡辰候

突然雨盪真大

山洪爆发，塌方真厉害

墿都乞山塗共石头母堵去

所以只能坐车礼

底呢都无块去

按照小说电影其情节

这辰候应该发生逢款其事计

伊戴礼耳机，看礼手机

我目睭擘大大

想看外首，但是暗摸摸

逢乇都儥看见

我俪听见雨拍礼车顶

拍礼玻璃其声音

这声音像拍礼我身

我见觉侬真舒畅爽快

我就总款爱睶去

但是当我清醒辰候

我发现我靠伊肩臂礼

但是伊睏真着

逢乇都无发生

我赶紧坐正去，面做红红喏

以后事计估计各侬也会猜着

我共伊结婚去

结婚以后我有问伊

嘻晡汝对我有无想法，坦白讲

伊讲，做为蜀隻男界无想法

是无可能其，但是因为侬家

乍认识三个月日

我惊汝儥愿意

所以我无敢定动

听伊这话我发现

伊伓啻肯做

侬也真平直

我现在有两个囝

蜀男蜀女，伊也真满意

因为有伲囝

所以我不能再陪伊躃长途

我着照顾家庭

靠伊蜀个侬其收入无够使

所以我着自家门口

开啰蜀间店囝

因为我有替侬看店其经验

所以会八蒋样撷货

什乇货好卖

我都是告伊替我带转来

但是伊每回出门蜀来蜀去

差罔多着十工甚至半个月日

转厝之前伊都是

先去汤池店泡蜀泡

遘厝辰候侬复蒻复疲劳

倒眠床话都伓讲就睏着去

我就讲汝什是去汤池店

告小姐按摩

伊讲无

我讲汝每回去外首只满行

有无想讨别隻女界

伊讲做为蜀隻男界无想法

是无可能其

但是我惊囝伲

以后看儥起我

因为伊面

本底就是做乌乌红红喏

所以我也看儥出

伊什是讲假话

但是我固是儥安心

只回我将积其钱都掏出来

买啰蜀间百二平方其厝

装修辰候我特意买啰

蜀芘热水器

总款伊转厝辰候

就伓使去汤池店

我告伊去卫生间洗汤

但是我突然发现

我真爱听伊洗汤其声音

我耳拔长长去听

伊行出辰候

看见我面做红红

就问我溪势去

我讲无 无事计

因为我发现

我固是真怀念嘻晡

盪雨其声音

虽然逢乇都无发生