编辑部其故事

各侬会八

我着《三山》编辑部礼工作

朋友真羡慕我其工作

讲应该是真舒畅

每日就是食茶看报纸

但汝想儥遘

像我总款其工作

也会得罪侬

前蜀段

《卡遛帮》其陈编辑

发蜀篇小说乞我

名字号礼《人体模特》

这名字就让侬想看落去

伊讲其故事是

有蜀芘艺术学院

有蜀隻先生卜画蜀张

女界其裸体画

准备掏去参加画展

伊着学校贴出告示

讲愿意其侬来报名

蜀点钟250

结果来啰三隻女界

但衣裳都颂礼，对礼伊

伊告女界衣裳都褪赖去

伊看见台中其嘻隻女界

比较符合伊其审美观

就告其他两隻先退落去

就告嘻隻女界面车过来

但是发现嘻隻女界一一

是伊老妈

汝来做什乇

伊肝火野熧

赶紧衣裳颂去

硩落死侬去

伊老妈讲

汝告示裡势讲

是女界都会使

汝讲嚽是艺术

我底呢硩落侬去

我就拍电话乞陈编辑

我讲这故事写无呆

就是有仂囝假

报名其侬应该有名字吧

自家其老妈也应该看会出

我讲着修改囇

伊无应我

过两工我发现这小说

原封不动发着《青橄榄》礼

下底固有姓林编辑其按语

讲只篇小说偌夥好偌夥好

我看礼茶水都吐蜀桌

总款其吹捧托，让侬无语

然后我复接着蜀篇小说

作者就是《青橄榄》其林编辑

名字号礼是《红玫瑰》

裡势讲什乇哩

讲蜀隻侬去看伊朋友

但是伊朋友无食熏儥食酒

并且朋友是蜀隻诗人

所以伊儥八买什乇好

最后决定买蜀蒲红玫瑰乞伊

伊见觉这礼物对诗人比较适合

但是开门辰候看见其

伓是伊朋友

是朋友其老妈

女界看见伊捧礼红瑰花

真欢喜，就讲赶紧坐，我去倾茶

汝丈夫哩

女界讲，我丈夫去出差啊

伊听囇，只好讲 回 只蒲花

就送乞汝吧

我有事计，先转去，下日再来

女界接过玫瑰

面红礼也像玫瑰若

伊赶紧行出门

女界讲有闲来坐啊

伊行着街中

看见对面有蜀间酒店

真闹热，电光红红绿绿

后生囝真侈，男男女女

门口写礼：情人节快乐

伊乍想起今旦是情人节

仱蒋做，蒋样共朋友解释

无法解释，越解释越缠

结果 伊做遘再无敢

去朋友厝礼

我拍电话乞林编辑讲

汝构思真好

但是有仂囝缺陷

就是伊去朋友厝礼

应该着先拍蜀只电话

现在逢侬都有手机

固有情人节现在逢侬都八

伊蒋样讲会儥八

伊买花辰候

花店门口肯定也有写

情人节快乐啊

伊溪势无看见

溪势着等最后乍看见

希望汝修改囇

但是同样无几工

只篇小说也是原封不动

发着《卡遛帮》礼

同样下底有陈编辑其推荐文字

讲小说构思巧妙，偌夥好偌夥好

我看礼牙齿卜笑逿去

总款明显其吹捧托，让侬无奈

最近我也写啰蜀篇小说

我见觉我写真好，但是

发乞《卡遛帮》无声音

发乞《青橄榄》也无声音

最后我只能发着侬家福州话群礼

就是各侬看见其《我共李白》

所以讲现在编辑部

故事也真侈

都是互相发对方其作品

明明会八有问题

也着发出去

并且固着吹捧托

结果做遘作品儥中看

就像“近亲结婚”逢款

生出其囝都是破相其

但是各侬也啰理解

编辑也是侬也着食饭啊

像我总款老实其侬

现在做遘无饭食去

我现在只能去摆地摊

但是疫情复来

我地摊都无块摆去