我共李白

李白其诗各侬都会八

但是李白坐其驴估计

无几隻侬会八

但我会八，因为

我就是嘻头驴

我会八福州侬儥喜欢驴

见觉驴真憨

告乡下侬是海驴

海里有无驴我儥八

但是海驴其意思我会八

就是刺溪侬

讲兹隻侬无见过世面

真OUT

其实驴是真聪明其动物

汝看阿凡提也真喜欢驴

汝各侬真喜欢李白其诗

但是李白真喜欢我或者讲

伊共我感情真深

因为我救过伊其命

我带礼李白满世客遛

有蜀回天暗去

也无无讨着侬厝旅社

就随便倒树下睏去

半暝囝有蜀头狼来

我直透告伊，伊乍清醒

为啰保护伊，我共狼相拍

我股川乞狼咬蜀块去

疼真很，血泽泽落

固蜀回，也是行山礼

伊无注意由山礼加流落去

逿着溪水礼去

我不顾一切跳落去

咬礼伊衣裳，将伊脱上来

所以伊真感激我

伊去长安做官辰候

侬都是骑马

但是伊固是坐驴上班

别侬都看儥起伊

伊也无措侬

因为伊对我感情真深

本底官做好好喏

但就是因为伊爱写诗

结果官做无去

有蜀回伊写啰蜀条诗

诗歌是总款写其，我记真清楚

借问汉宫谁得似

可怜飞燕倚新妆

嚽就得罪杨贵妃去

认为李白讲伊恰肥

告皇帝将伊官免赖去

总款我共伊复去游山玩水

李白讲无要紧

总款侬家更自由

做官也真喫亏

有蜀回行遘安徽

桃花村辰候我病去

也就是着只回我病死去

当时其情况是总款其

我病真厉害

衰遘肋条骨都显去

李白真伤心，流礼目滓

仱真侈侬围过来

有侬讲，只头驴只满衰

提刣赖去，但是李白伓肯

伊流目滓，我也流目滓

这辰候有蜀隻村民

熬礼草药乞我食，希望救我

但是我固是无力活过来

李白就将我埋着桃花池边

固专门为我写啰悼词念乞我听

然后烧乞我，希望我敆下底

会食肥仂囝

最后伊离开桃花村其辰候

嘻隻村民复来送伊

李白真感动

专门为伊写啰蜀条诗

就是各侬都会八其《赠汪伦》

其实李白共我其感情

也像桃花池水若，真深

可以讲感动天，感动地

俪无我 李白蒋样写出

嘻满好其 诗