画相

伊囝结婚以后，伊就见觉

伊着厝变成蜀隻多余其侬

新妇共囝屈蜀堆不断讲话

有其辰候也会冤家，两下复好

煮粉干也无贮蜀碗乞伊

就像伊无存在逢款

就像伊俪使食空气

就会活逢款

伊真受气

决定着讨仂囝事计做

伊去山礼摘桃，然后掏街中卖

有蜀日，有蜀隻诸娘囝行过来

伊讲依伯，我乞画蜀张相蒋其

我是做毕业作品使其

伊觑啰觑伊，讲，会使，但是

汝着将剩落其桃都买去

诸娘囝讲会使

伊就坐着树下让诸娘囝画

伊有仂囝紧张，无敢去觑伊

诸娘囝真细心喏画礼

遘尾唠，伊掏20块钱乞伊

桃俪捡两粒就行去

过半个月日，诸娘囝来讨伊

掏蜀张票乞伊

讲汝一定着去看啊

伊看啰看，是蜀张美术馆其票

第二工伊就搭车去城里

伊透底也无来着总款其地方

看见裡势挂礼真侈画

伊蜀张蜀张看礼，突然

看见蜀张画，嘻蔸树，嘻条街

固有嘻隻侬，伊都真熟悉

啊，原来就是自家啊

再看画其名字：依爸

伊目滓就盪落来唠

因为已经野行无侬告伊依爸唠

以后几日，伊都着美术馆门口等

希望会看见嘻隻诸娘囝

但是再无看见

估计伊已经毕业去唠