依婆

当伊60其辰候伊告侬来画相

因为伊见觉伊卜死去唠

但是伊70其辰候，看命先生讲

汝俪会活过73汝就会活遘90

结果伊伓啻活遘90

伊活遘卜99乍死去

伊就是我间壁其依婆

趁我有记时其辰候起

我就发现伊已经真老去唠

老遘我俪见觉

伊其目睭是会定动其

伊也真少共我讲话共侬讲话

伊蜀个侬住着蜀间僻榭礼

伊囝伊孙每顿送饭乞伊食

伊有辰候坐天井曝日头

听侬讲话，看侬拍麻雀

但是伊都无讲话

每当这辰候就让我想起伊丈夫

伊丈夫每日掼礼皮包

行裡行出，儥八伊做什乇

我基本共伊用无讲过话

我是着伊死以后乍八

伊是蜀隻医生

突然间有蜀日

侬都去嘻间厝囝礼去看伊

发现伊倒眠床，面色乌紫

伊本底皮肤也比较乌

然后伊就送去医院

过几工，罕不蜀时

我听见间壁侬大啼嘛其声音

我问溪势去，我妈讲

依伯死去唠，生癌

依伯其死是我见过最隆重其丧事

也儥八底呢来亲戚大细蜀区龙

花环将天井都排满去

棺材真大，漆红红喏，漆大几轮

然后悬顶固画啰真侈条龙

只呢蜀头，嘻呢蜀头

伊是春天死其

但是遘都卜颂半长腕辰候乍出葬

差罔多有三个月日

其间，固是有侬行伊大厝礼来啼嘛

有蜀日，有蜀隻女界行裡来，好好喏

但是行遘门垫逢呢就大啼起去

仱坐门垫礼罔啼罔念

我都看佩服去

依婆死其辰候我无着厝礼

我爸写批共我讲其

但是我见觉伊60岁共99岁

着我心中是蜀样其，因为

由我有记时起，伊就真门老去唠

最奇怪其是，伊丈夫死其辰候

我也看见伊啼

就是依伯死，我也乍八依伯是伊丈夫

依婆其性格尽落细腻平静

平静遘就像病哑

我无看见生活由伊身上流过其

痕迹