環球央行行長舊年為拯救經濟各出奇謀，功力高下立見，金融雜誌《 Global Finance》趁金融海嘯周年過咗冇耐，決定為行長評分，當中喺海嘯最嚴峻時俾人鬧減息太慢嘅歐洲央行行長特里謝，今年成績大躍進，躍升為 A級央行行長，相反大開水喉救市嘅聯儲局主席伯南克，同中國人民銀行行長周小川，就只得 C。


曾被鬧減息太慢
放大圖片

特里謝循序漸進減息，令佢成為 A級行長。　資料圖片

金融海嘯後，環球央行一齊劈息，但歐央行減得最多嗰次都只得四分三厘，相對其他國家主要央行吓吓減超過 1厘明顯輕手，所以當時佢不斷被批評太保守，但事隔一年，特里謝循序漸進嘅減息步伐，唔單止令歐元區喺減息與抗通脹之間取得平衡，仲為經濟復蘇奠下良好基礎，所以呢個 A可謂當之無愧。
身處海嘯源頭嘅伯南克竟然唔能夠預見危機出現，但念在佢救市有功，令經濟倖免於難，所以將佢嘅成績輕微上調到 C。
至於去年豪擲 4萬億元人民幣，仲放任貸款增長嚟救市嘅中國，雖然今年經濟可望保八，但已經埋下資產泡沫呢個計時炸彈，所以周小川嘅成績由 B-退步到 C。



全球央行行長評級
歐洲央行行長特里謝　今年評級： A　去年評級： C

澳洲儲備銀行行長史蒂文斯　今年評級： A　去年評級： B

南韓央行行長李成太　今年評級： A　去年評級： B

英倫銀行行長金默文　今年評級： B　去年評級： D

加拿大央行行長卡尼　今年評級： B　去年評級： C

瑞士央行行長羅思　今年評級： B　去年評級： C

日本央行行長白川方明　今年評級： B-　去年評級：─

新西蘭儲備銀行行長博拉爾德　今年評級： C　去年評級： D

聯儲局主席伯南克　今年評級： C　去年評級： C-

中國人民銀行行長周小川　今年評級： C　去年評級： B-

資料來源：《全球金融雜誌》