《拷打红娘》
吴一啸撰曲
张月儿·上海妹演唱
红娘【银台上一句】
又听唤，身抖抖。
红娘【雨打芭蕉】
无限忧，真是无限忧，
查起上嚟恶干休，芳心惊透。
红娘【长句滚花】
哩趟眉头皱，眉头皱，至怕畀夫人来追究，
一定个里春光曾泄漏，如何说话问心头，
唉惟有巧语花言，将无作有(上)。
[口白]
旦：参见夫人。
丑：唉吔你个小贱人，都算好事多为咯你。
丑【连环西皮】
真真吖嬲，真真吖嬲！
骂声贱人，你知罪否。
旦【沉腔滚花】
唉吔吔，我不明不白，雾水一头。
【三脚凳】
[丑唱]
唉吔你去西厢做把守，当然会雾水一头。
[旦唱]
实在样样都与我无关，望夫人你认真嚟研究。
[丑唱]
你一味牙尖嘴利，仲响处撚滋油。
丑【快中板下句】
你快些讲明还可宥。若然唔讲无情留。
丑【滚花】
快啲把家法摆开来侍候(上)。
[口白]
丑：家法侍候！
旦：唉吔夫人你使乜嬲吖，又使乜话家法嚟侍候啫，
你向红娘问原因，我就向夫人道根由喺啦。
丑：咁你就快啲讲啦。
旦：咁夫人你听住嚹。
丑：你讲、讲、讲啦！
【士工慢板】
[旦唱]
请息雷霆怒，待我说因由，
[丑唱序]
言词一句都莫遗留！
[旦唱曲]
小姐倦绣停针，闻得张珙，病久。
[口白]
丑：闻得佢病又嚸致得格。
旦：咁我同埋佢去问候啦嘛。
丑：问候，问候，咁嚸解问病卜夜而不卜昼哩又？
旦：因为日来多眼见，夜里就少担忧啦。
丑：你两个都算胆大咯，咁见咗张生有乜嘢说话讲至得咖。
旦：咁阿夫人你再听呀。
【士工慢板】
[旦唱]
张生喜变忧，佢话夫人恩作仇——
[旦唱序]
良缘反悔恨悠悠。
[曲]
好似过桥抽板，至令到宿病，难休。
[丑唱]
我穷追究，你讲嘢莫轻浮。
[丑唱序]
后来嚸搞法先道其由。
[旦唱]
张生叫小婢先行，又叫小姐权时，落后。
[口白]
丑：唉吔，咁仲了得嘅咩。
【雨中花】
[丑唱]
男女不亲授受，嚸可以权时落后！
眉一皱，计上心头，务把红娘追究。
丑：佢留喺处做乜嘢呀又。
旦：咁大约都喺医病嚹啩。
丑：医病?!
旦：喺囉！
[丑唱]
佢又唔喺回春圣手，又唔喺医界名流。
医乜嘢病呀，问乜嘢候？你哋分明有别谋！
【龙舟】
[丑唱]
唉！我越想越火起，越想我就越心嬲，
佢喺红花闺女，嚸可以立乱勾留。
究竟有无苟且行为，嗄！你知道否？
丑：你知唔知，快讲畀我听，讲啦你。
旦：诶…诶…
丑：诶咩嘢，快啲讲啦！
[旦唱]
我都唔知唔见，佢哋自有春秋。
丑：咁你去咗边处呀。
[旦唱]
因为我在外厢来等候，
[丑唱]
致怕干柴凭火，两个都爱风流，
我思疑佢哋寡女孤男，嗯——都怕会有…
旦：有都唔定嘅嚹。
[旦唱]
我都思疑佢心猿己纵，意马难收，
我思疑佢倒凤颠鸾百事有。
丑：咁你嚸知道哩又？
[旦唱]
因为我等到露冷苍苔鞋冰透，都唔敢轻咳嗽。
丑：咳都唔敢呀？
[旦接唱]
思疑佢灯前拥抱——
旦【二簧】
思疑佢枕上，绸缪。
[唱序]
思疑佢成就了凤鸾俦。
[曲]
思疑佢情解相思，不必用神针，法灸。
【杨翠喜中段】
[丑唱]
可有，可有言荒谬！可有，可有言荒谬！
[旦唱]
不过你怀疑我亦估有咋。
[丑唱]
唉阿莺真下流，唉吔谂谂下。
【爽二簧】
[丑唱]
真喺令我，心嬲。
我叫你陪伴小姐，即喺行监，坐守。
谁知你筲箕冚鬼，唉吔夹计，同谋。
我要控告张生，话佢引诱良家，闺秀。
[旦坠慢接唱]
一日都喺夫人不是，与婢仆，无由。
[口白]
旦：唔喺话我多嘴呀夫人，讲起上嚟，实在你有三不是添呀。
丑：嗄！我嚸三不是法呀？
旦：嗱夫人，当日白马解围，喺你亲口应承张生嘅婚事咖。
丑：喺喺。
旦：谁知解围之后，夫人你又完全悔约囉啵，
亲口应承又喺夫人，反复悔约又喺夫人，
言而无信，出尔反尔，哩点就喺第一嘅不是嚹。
丑：咁第二点呢？
旦：夫人你既然悔约，就确不合再留张生在西厢居住呀，
仲叫佢哋认为兄妹添喎，唉正所谓痴男怨女，
有乜话唔喺日久生情呢，嗱咁哩点就喺第二嘅不是嚹夫人。
丑：咁第三点又如何呀？
旦：第三点呀！就算夫人你去告张生，你已经先有一个家教不严之罪。
旦【七字句反线中板】
所以动众经官，赚得两家丑。
不若得罢休时，且罢休。
旦【滚花】
最好你替佢哋撮成鸳鸯偶。常言女大不中留。
丑：咁就无法咯。
丑【快中板】
为保家声权迁就，好教儿女遂心头。
【滚花】
[丑唱]
红娘你快入香闺，叫小姐出堂一走。
旦：哦——
[旦唱]
凭我唇枪舌剑，撮合一对凤鸾俦。
曲终
加载中，请稍候......
加载中…
喜欢